ਨਵੀਂ ਦਿੱਲੀ, 23 ਅਗਸਤ (ਪੋਸਟ ਬਿਊਰੋ)- ਭਾਰਤੀ ਮੈਡੀਕਲ ਕੌਂਸਲ (ਐੱਮ ਸੀ ਆਈ) ਨੇ ਇਟਾਵਾ ਵਿਚਲੀ ਇੱਕ ਯੂਨੀਵਰਸਿਟੀ ਨੂੰ ਰੈਗਿੰਗ ਲਈ ਕਾਰਨ ਦੱਸੋ ਨੋਟਿਸ ਭੇਜ ਕੇ ਪੁੱਛਿਆ ਹੈ ਕਿ ਕਿਉਂ ਨਾ ਉਸ ਉਤੇ ਜੁਰਮਾਨਾ ਲਾਇਆ ਜਾਏ ਅਤੇ ਘੱਟੋ ਘੱਟ ਇੱਕ ਸਾਲ ਲਈ ਨਵੇਂ ਦਾਖਲਿਆਂ ਦੇ ਲਈ ਅਯੋਗ ਐਲਾਨ ਕਰ ਦਿੱਤਾ ਜਾਏ।
ਪਤਾ ਲੱਗਾ ਹੈ ਕਿ ਭਾਰਤੀ ਮੈਡੀਕਲ ਕੌਂਸਲ ਦੇ ਬੋਰਡ ਆਫ ਗਵਰਨਜ਼ (ਐੱਮ ਸੀ ਆਈ ਬੀ ਓ ਜੀ) ਨੇ ਇਹ ਵੀ ਪੁੱਛਿਆ ਹੈ ਕਿ ਕਿਉਂ ਨਾ ਯੂਨੀਵਰਸਿਟੀ ਦੇ ਐੱਮ ਬੀ ਬੀ ਐੱਸ ਸਿਲੇਬਸ ਦੇ ਸੀਨੀਅਰ ਬੈਚ ਨੂੰ ਘੱਟੋ ਘੱਟ ਇੱਕ ਮਹੀਨੇ ਲਈ ਕਲਾਸਾਂ ਲੈਣ ਤੋਂ ਰੋਕ ਦਿੱਤਾ ਜਾਏ। ਵਰਨਣ ਯੋਗ ਹੈ ਕਿ ਸੈਫਈ ਮੈਡੀਕਲ ਯੂਨੀਵਰਸਿਟੀ ਦੇ ਪਹਿਲੇ ਸਾਲ ਦੇ ਕਈ ਵਿਦਿਆਰਥੀਆਂ ਦੇ ਸਿਰ ਮੁੰਨਵਾ ਕੇ ਕੈਂਪਸ ਵਿੱਚ ਉਨ੍ਹਾਂ ਦੀ ਪਰੇਡ ਕਰਵਾਈ ਗਈ ਸੀ। ਇਸ ਨੋਟਿਸ ਵਿੱਚ ਕਿਹਾ ਗਿਆ ਹੈ ਕਿ ਕਿਉਂ ਨਾ ਸੰਸਥਾ 'ਤੇ ਰੈਗਿੰਗ ਦੀ ਹਰ ਘਟਨਾ ਲਈ ਇੱਕ ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਜਾਏ, ਜੋ 150 ਵਿਦਿਆਰਥੀਆਂ ਲਈ ਕੁੱਲ 1.5 ਕਰੋੜ ਦੇ ਬਰਾਬਰ ਹੈ।
ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਕਲਿੱਪ ਵਿੱਚ ਵਿਦਿਆਰਥੀ ਇੱਕ ਲਾਈਨ ਵਿੱਚ ਤੁਰਦੇ ਦਿਖਾਈ ਦੇਂਦੇ ਹਨ। ਉਨ੍ਹਾਂ ਦਾ ਮੁੰਨਿਆ ਗਿਆ ਸਿਰ ਝੁਕਿਆ ਹੈ ਤੇ ਉਹ ਸਲਾਮ ਦੀ ਸ਼ਕਲ ਵਿਚ ਹਨ। ਇੱਕ ਹੋਰ ਕਲਿੱਪ ਉਹ ਲਾਈਨ ਵਿੱਚ ਖੜ੍ਹੇ ਦਿੱਸਦੇ ਹਨ। ਯੂਨੀਵਰਸਿਟੀ ਦੇ ਚਾਂਸਲਰ ਰਾਜ ਕੁਮਾਰ ਇਸ ਤਰ੍ਹਾਂ ਦੇ ਹਲਕੇ ਮਾਮਲਿਆਂ ਵਿੱਚ ਕਾਰਵਾਈ ਕਰਨ ਤੋਂ ਬਚਦੇ ਹੋਏ ਦਿਖਾਈ ਦਿੱਤੇ ਸਨ। ਉਨ੍ਹਾਂ ਨੇ ਕਿਹਾ ਸੀ ਕਿ ਇੱਕ ਸਮੇਂ ਵਿੱਚ ਰੈਗਿੰਗ ਵਿਦਿਆਰਥੀਆਂ ਵਿੱਚ ਮੈਡੀਕਲ ਦੀ ਦੁਨੀਆ ਦੇ ਸੰਸਕਾਰ ਨੂੰ ਵਧਾਉਣ ਦਾ ਇੱਕ ਤਰੀਕਾ ਹੋਇਆ ਕਰਦਾ ਸੀ।
ਇਸ ਦੌਰਾਨ ਪਤਾ ਲੱਗਾ ਹੈ ਕਿ ਸ਼ੇਖੁਲ ਹਿੰਦ ਮੌਲਾਨਾ ਮਹਿਮੂਦ ਹਸਨ ਸਰਕਾਰੀ ਮੈਡੀਕਲ ਕਾਲਜ ਦੇ ਸੀਨੀਅਰ ਵਿਦਿਆਰਥੀਆਂ ਨੇ ਜੂਨੀਅਰ ਦੇ ਹੋਸਟਲ ਵਿੱਚ ਜਾ ਕੇ ਰੈਗਿੰਗ ਕੀਤੀ। ਕੁਝ ਨੂੰ ਗਾਣਾ ਗਾਉਣ ਲਈ ਕਿਹਾ ਤਾਂ ਕੁਝ ਨੂੰ ਨੱਚਣ ਲਈ ਕਿਹਾ ਗਿਆ। ਇਸੇ ਦੌਰਾਨ ਐਂਟੀ ਰੈਗਿੰਗ ਕਮੇਟੀ ਦੇ ਮੈਂਬਰ ਪਹੁੰਚ ਗਏ। ਕਮੇਟੀ ਨੇ ਛੇ ਵਿਦਿਆਰਥੀਆਂ ਨੂੰ ਪੰਜ-ਪੰਜ ਮਹੀਨੇ ਦੇ ਲਈ ਕੱਢ ਦਿੱਤਾ ਹੈ। ਪੰਜ-ਪੰਜ ਹਜ਼ਾਰ ਰੁਪਏ ਜੁਰਮਾਨਾ ਵੀ ਲਗਾਇਆ ਹੈ।