ਹੁਸ਼ਿਆਰਪੁਰ, 23 ਅਗਸਤ (ਪੋਸਟ ਬਿਊਰੋ)- ਸਾਲ 2018 ਵਿੱਚ ਆਪਣੀ ਪਤਨੀ ਸਤਿੰਦਰ ਕੌਰ ਦੀ ਹੱਤਿਆ ਕਰਨ ਵਾਲੇ ਨਸ਼ੇੜੀ ਪਤੀ ਨੂੰ ਐਡੀਸ਼ਨਲ ਜ਼ਿਲ੍ਹਾ ਸੈਸ਼ਨ ਜੱਜ ਨੀਲਮ ਅਰੋੜਾ ਦੀ ਕੋਰਟ ਨੇ ਕੱਲ੍ਹ ਦੋਸ਼ੀ ਕਰਾਰ ਦਿੰਦੇ ਹੋਏ ਉਮਰ ਕੈਦ ਅਤੇ ਪੰਜਾਹ ਹਜ਼ਾਰ ਰੁਪਏ ਦਾ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ। ਜੁਰਮਾਨਾ ਨਾ ਦੇਣ ਦੀ ਸੂਰਤ ਵਿੱਚ ਦੋਸ਼ੀ ਲਖਵਿੰਦਰ ਸਿੰਘ (ਵਾਸੀ ਸਿੰਘਪੁਰ, ਚੱਬੇਵਾਲ) ਨੂੰ ਛੇ ਮਹੀਨੇ ਹੋਰ ਸਜ਼ਾ ਭੁਗਤਣੀ ਪਵੇਗੀ।
ਇਸ ਕੇਸ ਵਿਚ ਮੁੱਖ ਗਵਾਹ ਮ੍ਰਿਤਕ ਮਹਿਲਾ ਦਾ ਨੌਂ ਸਾਲਾ ਬੇਟਾ ਸੀ ਜਿਸ ਨੇ ਪੁਲਸ ਅਤੇ ਕੋਰਟ ਵਿੱਚ ਬਿਆਨ ਦਿੱਤਾ ਕਿ 16 ਮਾਰਚ 2018 ਨੂੰ ਨਸ਼ੇ ਦੀ ਹਾਲਤ ਵਿੱਚ ਮੰਮੀ ਨੂੰ ਕੁੱਟਦੇ ਹੋਏ ਪਾਪਾ ਬਰਾਂਡੇ ਵਿੱਚੋਂ ਕਮਰੇ ਵਿੱਚ ਲੈ ਗਏ ਅਤੇ ਬੈੱਡ ਦੇ ਸਿਰਹਾਣੇ ਨਾਲ ਸਿਰ ਟਕਰਾ ਦਿੱਤਾ, ਜਿਸ ਕਾਰਨ ਉਹ ਡਿੱਗ ਪਈ ਅਤੇ ਫਿਰ ਨਹੀਂ ਉਠੀ। ਇਸੇ ਬਿਆਨ ਦੇ ਆਧਾਰ ਉਤੇ ਪੁਲਸ ਨੇ ਕੇਸ ਦਰਜ ਕੀਤਾ ਸੀ ਅਤੇ ਇਸੇ ਕਾਰਨ ਦੋਸ਼ੀ ਨੂੰ ਸਜ਼ਾ ਮਿਲੀ। ਦੋਸ਼ੀ ਲਖਵਿੰਦਰ ਨਸ਼ੇ ਕਰਦਾ ਸੀ, ਜਿਸ ਕਾਰਨ ਉਸ ਦਾ ਪਹਿਲਾ ਵਿਆਹ ਟੁੱਟ ਗਿਆ ਸੀ। ਫਿਰ ਉਸ ਨੇ ਸਤਿੰਦਰ ਕੌਰ ਨਾਲ ਲਵ ਮੈਰਿਜ ਕੀਤੀ ਅਤੇ ਵਾਅਦਾ ਕੀਤਾ ਕਿ ਨਸ਼ਾ ਛੱਡ ਦੇਵੇਗਾ, ਪਰ ਅਜਿਹਾ ਨਾ ਹੋਇਆ। ਦੋ ਸਾਲ ਬਾਅਦ ਉਸ ਨੇ ਸਤਿੰਦਰ ਦੀ ਹੱਤਿਆ ਕਰ ਦਿੱਤੀ। ਮ੍ਰਿਤਕਾ ਦਾ ਵੀ ਇਹ ਦੂਸਰਾ ਵਿਆਹ ਤੋਂ ਉਸ ਦਾ ਨੌਂ ਸਾਲ ਦਾ ਬੇਟਾ ਸੀ, ਜੋ ਉਸ ਦੇ ਨਾਲ ਰਹਿੰਦਾ ਸੀ।