ਜਲੰਧਰ, 23 ਅਗਸਤ (ਪੋਸਟ ਬਿਊਰੋ)- ਫਿਲੀਪੀਨਸ ਵਿੱਚ ਵੱਸਦੇ ਐਨ ਆਰ ਆਈ ਜਸਵੰਤ ਸਿੰਘ ਵੱਲੋਂ ਪ੍ਰਾਪਰਟੀ ਖਰੀਦਣ ਲਈ ਭੇਜੇ 48 ਲੱਖ ਰੁਪਏ ਲੁੱਟਣ ਦੇ ਕੇਸ ਵਿੱਚ ਲੋੜੀਂਦੇ ਮੁੱਖ ਦੋਸ਼ੀ ‘ਤੀਜੇ' ਨੂੰ ਪੁਲਸ ਨੇ ਫੜ ਲਿਆ ਹੈ ਅਤੇ ਦੱਸਿਆ ਜਾ ਰਿਹਾ ਹੈ ਕਿ ਲੁੱਟੀ ਗਈ ਰਕਮ ਦਾ ਬਾਕੀ ਹਿੱਸਾ ਵੀ ਪੁਲਸ ਨੂੰ ਮਿਲ ਗਿਆ ਹੈ। ਪੁਲਸ ਨੇ ਉਸ ਨੂੰ ਕਿਸੇ ਲੁਕਵੀਂ ਥਾਂ ਤੋਂ ਗ੍ਰਿਫਤਾਰ ਕੀਤਾ ਹੈ। ਉਸ ਵੱਲੋਂ ਦੱਸੀ ਜਗ੍ਹਾ ਤੋਂ ਪੁਲਸ ਨੇ ਰੁਪਏ ਵੀ ਬਰਾਮਦ ਕਰ ਲਏ ਹਨ, ਜਿਸ 'ਚੋਂ ਕੁਝ ਰੁਪਏ ਉਹ ਖਰਚ ਕਰ ਚੁੱਕਾ ਸੀ।
ਵਰਨਣ ਯੋਗ ਹੈ ਕਿ ਰੋਜ਼ ਪਾਰਕ, ਗੁਲਾਬ ਦੇਵੀ ਰੋਡ ਦੇ ਜਸਵੰਤ ਸਿੰਘ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਹ ਫਿਲੀਪੀਨਸ ਵਿੱਚ ਰਹਿੰਦੇ ਹਨ ਤੇ ਅੱਜ ਕੱਲ੍ਹ ਜਲੰਧਰ ਵਿੱਚ ਆਏ ਹੋਏ ਸਨ। ਉਨ੍ਹਾਂ ਦਾ ਪੁੱਤਰ ਗੁਰਦੀਪ ਸਿੰਘ ਵੀ ਫਿਲੀਪੀਨਸ ਰਹਿੰਦਾ ਹੈ ਤੇ ਉਸ ਨੇ ਉਥੋਂ ਫੋਨ ਕਰਕੇ ਜਲੰਧਰ 'ਚ ਪ੍ਰਾਪਰਟੀ ਖਰੀਦਣ ਲਈ ਕਿਹਾ ਸੀ। ਗੁਰਦੀਪ ਸਿੰਘ ਨੇ 11 ਅਗਸਤ ਨੂੰ ਜਲੰਧਰ ਆਉਣਾ ਸੀ ਤੇ ਉਸ ਦੇ ਕਹਿਣ 'ਤੇ ਉਨ੍ਹਾਂ ਰਾਜੇਸ਼ ਦੱਤਾ ਨਾਂ ਦੇ ਪ੍ਰਾਪਰਟੀ ਡੀਲਰ ਕੋਲ ਆਪਣੇ ਰਿਸ਼ਤੇਦਾਰ ਸੋਨੂੰ ਹੱਥ 48 ਲੱਖ ਰੁਪਏ ਭੇਜ ਦਿੱਤੇ ਸੀ। ਛੇ ਅਗਸਤ ਨੂੰ ਪਤਾ ਲੱਗਾ ਕਿ ਸੌਦਾ ਨਹੀਂ ਹੋ ਰਿਹਾ ਤਾਂ ਉਨ੍ਹਾਂ ਨੇ ਸੋਨੂੰ ਨੂੰ ਰੁਪਏ ਵਾਪਸ ਲੇਣ ਲਈ ਭੇਜਿਆ। ਉਹ ਰੁਪਏ ਲੈ ਕੇ ਮੋਟਰ ਸਾਈਕਲ ਉੱਤੇ ਵਾਪਸ ਆ ਰਿਹਾ ਸੀ ਤਾਂ ਗੁਲਾਬ ਦੇਵੀ ਰੋਡ 'ਤੇ ਐਕਟਿਵਾ ਉੱਤੇ ਆਏ ਤਿੰਨ ਨੌਜਵਾਨਾਂ ਨੇ ਉਸ ਦੇ ਮੋਟਰ ਸਾਈਕਲ ਨੂੰ ਟੱਕਰ ਮਾਰ ਦਿੱਤੀ ਤੇ ਸੋਨੂੰ ਉਤੇ ਦਾਤਰ ਨਾਲ ਹਮਲਾ ਕਰਕੇ ਪੈਸਿਆਂ ਦਾ ਬੈਗ ਖੋਹ ਕੇ ਲੈ ਗਏ। ਜਸਵੰਤ ਸਿੰਘ ਨੇ ਦੱਸਿਆ ਕਿ ਸੋਨੂੰ ਨੇ ਮੋਬਾਈਲ ਰਾਹੀਂ ਇਸ ਦੀ ਜਾਣਕਾਰੀ ਦਿੱਤੀ ਤਾਂ ਪੁਲਸ ਨੂੰ 17 ਅਗਸਤ ਨੂੰ ਸ਼ਿਕਾਇਤ ਦਰਜ ਕਰਵਾਈ ਗਈ ਸੀ।