ਹਾਂਗ ਕਾਂਗ, 23 ਅਗਸਤ (ਪੋਸਟ ਬਿਊਰੋ) : ਹਾਂਗ ਕਾਂਗ ਦੇ ਐਕਾਊਂਟੈਂਟਸ ਨੇ ਸ਼ੁੱਕਰਵਾਰ ਨੂੰ ਜਮਹੂਰੀਅਤ ਪੱਖੀ ਲਹਿਰ ਦੇ ਸਮਰਥਨ ਵਿੱਚ ਮਾਰਚ ਕੀਤਾ। ਇਸ ਦੌਰਾਨ ਬ੍ਰਿਟਿਸ਼ ਕਾਉਂਸਲੇਟ ਦੇ ਕਰਮਚਾਰੀ ਨੂੰ ਮੇਨਲੈਂਡ ਚੀਨ ਵਿੱਚ ਨਜ਼ਰਬੰਦ ਕਰ ਲਏ ਜਾਣ ਤੋਂ ਬਾਅਦ ਕੈਨੇਡੀਅਨ ਸਫਾਰਤਖਾਨੇ ਨੇ ਸਰਕਾਰੀ ਕੰਮਕਾਜ ਲਈ ਆਪਣੇ ਸਟਾਫ ਨੂੰ ਸਿਟੀ ਛੱਡਣ ਤੋਂ ਮਨ੍ਹਾਂ ਕਰ ਦਿੱਤਾ ਹੈ।
ਹਾਂਗ ਕਾਂਗ ਏਅਰਲਾਈਨ ਦੀ ਕੈਬਿਨ ਕ੍ਰਿਊ ਯੂਨੀਅਨ ਦੀ ਮੁਖੀ ਕੈਥੇ ਡਰੈਗਨ ਨੇ ਦੱਸਿਆ ਕਿ ਇਸ ਲਹਿਰ ਦਾ ਸਮਰਥਨ ਕਰਨ ਕਾਰਨ ਉਸ ਨੂੰ ਨੌਕਰੀ ਵਿੱਚੋਂ ਕੱਢ ਦਿੱਤਾ ਗਿਆ। ਇੱਥੇ ਦੱਸਣਾ ਬਣਦਾ ਹੈ ਕਿ ਪਿਛਲੇ ਦੋ ਮਹੀਨੇ ਤੋਂ ਮੁਜ਼ਾਹਰਾਕਾਰੀ ਇਸ ਅਰਧ ਖੁਦਮੁਖ਼ਤਿਆਰ ਚੀਨੀ ਟੈਰੇਟਰੀ ਵਿੱਚ ਰੈਲੀ ਕਰ ਰਹੇ ਹਨ। ਸੁ਼ੱਕਰਵਾਰ ਰਾਤ ਨੂੰ ਮੁਜ਼ਾਹਰਾਕਾਰੀਆਂ ਨੇ ਮੁਕੰਮਲ ਖੁਦਮੁਖ਼ਤਿਆਰੀ ਦੇ ਹੱਕ ਵਿੱਚ 40 ਕਿਲੋਮੀਟਰ ਲੰਮੀਂ ਮਨੁੱਖੀ ਚੇਨ ਬਣਾਈ। ਇਨ੍ਹਾਂ ਮੁਜ਼ਾਹਰਾਕਾਰੀਆਂ ਦਾ ਕਹਿਣਾ ਹੈ ਕਿ “ਹਾਂਗ ਕਾਂਗ ਵੇਅ” “ਬਾਲਟਿਕ ਵੇਅ” ਤੋਂ ਕਾਫੀ ਪ੍ਰਭਾਵਿਤ ਹੈ। ਜਿ਼ਕਰਯੋਗ ਹੈ ਕਿ ਸੋਵੀਅਤ ਨਿਯੰਤਰਣ ਖਿਲਾਫ ਮੁਜ਼ਾਹਰਾ ਕਰਨ ਲਈ 30 ਸਾਲ ਪਹਿਲਾਂ ਬਾਲਟਿਕ ਸਟੇਟਸ ਨੇ ਹੱਥ ਮਿਲਾਏ ਸਨ।
ਕੈਨੇਡੀਅਨ ਸਫਾਰਤਖਾਨੇ ਨੇ ਇਹ ਨਹੀਂ ਦੱਸਿਆ ਕਿ ਟਰੈਵਲ ਸਬੰਧੀ ਇਹ ਪਾਬੰਦੀ ਬ੍ਰਿਟਿਸ਼ ਸਫਾਰਤਖਾਨੇ ਦੇ ਕਰਮਚਾਰੀ ਸਾਈਮਨ ਚੈਂਗ ਮੈਨ-ਕਿੱਟ ਨੂੰ ਨਜ਼ਰਬੰਦ ਕੀਤੇ ਜਾਣ ਨਾਲ ਸਬੰਧਤ ਸੀ। ਦੋ ਹਫਤੇ ਪਹਿਲਾਂ ਉਹ ਹਾਂਗ ਕਾਂਗ ਦੇ ਹਾਈ ਸਪੀਡ ਰੇਲਵੇ ਸਟੇਸ਼ਨ ਤੋਂ ਸ਼ੈਨਜ਼ੈਨ, ਜੋ ਕਿ ਸਰਹੱਦ ਪਾਰ ਦੀ ਮੇਨਲੈਂਡ ਸਿਟੀ ਹੈ, ਦੇ ਬਿਜ਼ਨਸ ਟਰਿੱਪ ਉੱਤੇ ਗਿਆ ਸੀ ਤੇ ਉਦੋਂ ਤੋਂ ਹੀ ਲਾਪਤਾ ਹੈ। ਕੈਨੇਡੀਅਨ ਸਫਾਰਤਖਾਨੇ ਨੇ ਬਿਆਨ ਵਿੱਚ ਆਖਿਆ ਕਿ ਇਸ ਸਮੇਂ ਲੋਕਲ ਸਟਾਫ ਹਾਂਗ ਕਾਂਗ ਤੋਂ ਬਾਹਰ ਬਿਜ਼ਨਸ ਟਰੈਵਲ ਨਹੀਂ ਕਰ ਪਾਵੇਗਾ।
ਡੇਲੀ ਬ੍ਰੀਫਿੰਗ ਦੌਰਾਨ ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਗੈਂਗ ਸ਼ੁਆਂਗ ਨੇ ਆਖਿਆ ਕਿ ਕੈਨੇਡਾ ਦੇ ਇਸ ਫੈਸਲੇ ਦਾ ਚੀਨ ਸਵਾਗਤ ਕਰਦਾ ਹੈ। ਪਰ ਉਨ੍ਹਾਂ ਅੱਗੇ ਆਖਿਆ ਕਿ ਜਿਹੜੇ ਲੋਕ ਸਹੀ ਹਨ ਉਨ੍ਹਾਂ ਦੇ ਅਧਿਕਾਰ ਚੀਨ ਵਿੱਚ ਪੂਰੀ ਤਰ੍ਹਾਂ ਮਹਿਫੂਜ਼ ਹਨ ਜਦਕਿ ਜਿਨ੍ਹਾਂ ਦੇ ਗੁਪਤ ਮੰਤਵ ਹਨ ਤੇ ਜਿਹੜੇ ਗੈਰਕਾਨੂੰਨੀ ਗਤੀਵਿਧੀਆਂ ਵਿੱਚ ਰੁੱਝੇ ਹੋਏ ਹਨ ਉਨ੍ਹਾਂ ਨੂੰ ਜ਼ਰੂਰ ਸਾਵਧਾਨ ਰਹਿਣ ਦੀ ਲੋੜ ਹੈ। ਜਿ਼ਕਰਯੋਗ ਹੈ ਕਿ ਚੈਂਗ ਨੇ ਦਸੰਬਰ 2017 ਤੋਂ ਬ੍ਰਿਟਿਸ਼ ਕਾਉਂਸਲੇਟ ਲਈ ਸਕੌਟਿਸ਼ ਸਰਕਾਰ ਦੇ ਇੰਟਰਨੈਸ਼ਨਲ ਟਰੇਡ ਤੇ ਇਨਵੈਸਟਮੈਂਟ ਆਫੀਸਰ ਵਜੋਂ ਕੰਮ ਕੀਤਾ। ਚੈਂਗ ਤੇ ਕਾਉਂਸਲੇਟ ਅਤੇ ਸਫਾਰਤਖਾਨਿਆਂ ਦਾ ਹੋਰ ਲੋਕਲ ਸਟਾਫ ਡਿਪਲੋਮੈਟਸ ਦਾ ਸਮਰਥਨ ਕਰਦਾ ਹੈ ਪਰ ਉਨ੍ਹਾਂ ਕੋਲ ਆਪਣੇ ਡਿਪਲੋਮੈਟਿਕ ਪਾਸਪੋਰਟ ਨਹੀਂ ਹੁੰਦੇ।
ਇਸ ਹਫਤੇ ਚੀਨ ਨੇ ਇਹ ਵੀ ਆਖਿਆ ਸੀ ਕਿ ਚੈਂਗ ਹਾਂਗ ਕਾਂਗ ਦਾ ਰਹਿਣ ਵਾਲਾ ਹੈ ਤੇ ਉਸ ਨੂੰ ਜਨਤਕ ਹੁਕਮਾਂ ਦੀ ਉਲੰਘਣਾਂ ਕਰਨ ਲਈ 15 ਦਿਨ ਲਈ ਪ੍ਰਸ਼ਾਸਕੀ ਤੌਰ ਉੱਤੇ ਨਜ਼ਰਬੰਦ ਕੀਤਾ ਗਿਆ ਹੈ। ਇਸ ਤੋਂ ਜਿ਼ਆਦਾ ਹੋਰ ਜਾਣਕਾਰੀ ਇਸ ਮਾਮਲੇ ਵਿੱਚ ਨਹੀਂ ਦਿੱਤੀ ਗਈ।