ਯੂ ਐੱਨ ਓ, 22 ਅਗਸਤ (ਪੋਸਟ ਬਿਊਰੋ)- ਰੂਸ ਤੇ ਚੀਨ ਨੇ ਮੱਧਮ ਦੂਰੀ ਤਕ ਮਾਰ ਕਰਨ ਵਾਲੀਆਂ ਮਿਜ਼ਾਈਲਾਂ ਦੇ ਵਿਕਾਸ ਤੇ ਏਸ਼ੀਆ ਵਿੱਚ ਇਨ੍ਹਾਂ ਦੀ ਤਾਇਨਾਤੀ ਦੀ ਅਮਰੀਕਾ ਦੀ ਯੋਜਨਾ ਉੱਤੇ ਯੂ ਐੱਨ ਓ ਸੁਰੱਖਿਆ ਕੌਂਸਲ (ਯੂ ਐੱਨ ਐੱਸ ਸੀ) ਦੀ ਬੈਠਕ ਬੁਲਾਉਣ ਦੀ ਮੰਗ ਕੀਤੀ ਹੈ।
ਵਰਨਣ ਯੋਗ ਹੈ ਕਿ ਅਮਰੀਕਾ ਨੇ ਬੀਤੇ ਦਿਨੀਂ ਨਵੀਂ ਕਰੂਜ਼ ਮਿਜ਼ਾਈਲ ਦੀ ਪਰਖ ਕੀਤੀ ਤੇ ਨਾਲ ਏਸ਼ੀਆ ਵਿੱਚ ਆਪਣੀਆਂ ਮਿਜ਼ਾਈਲਾਂ ਤਾਇਨਾਤ ਕਰਨ ਦੀ ਮੰਸ਼ਾ ਪ੍ਰਗਟਾਈ ਸੀ। ਰੂਸ ਤੇ ਚੀਨ ਕੌਮਾਂਤਰੀ ਸ਼ਾਂਤੀ ਅਤੇ ਸੁਰੱਖਿਆ ਲਈ ਪੈਦਾ ਹੋਏ ਖ਼ਤਰੇ ਦੇ ਏਜੰਡੇ ਹੇਠ 15 ਮੈਂਬਰੀ ਸੁਰੱਖਿਆ ਕੌਂਸਲ ਦੀ ਬੈਠਕ ਸੱਦਣਾ ਚਾਹੁੰਦੇ ਹਨ। ਰੂਸ ਤੇ ਚੀਨ ਯੂ ਐੱਨ ਐੱਸ ਸੀ ਦੇ ਪੱਕੇ ਮੈਂਬਰ ਹਨ। ਉਨ੍ਹਾਂ ਨੇ ਯੂ ਐੱਨ ਹਥਿਆਰਬੰਦੀ ਕੇਸ ਦੇ ਮੁਖੀ ਇਜੁਮੀ ਨਾਕਾਮਿਤਸੂ ਨੂੰ ਇਹ ਬੇਨਤੀ ਵੀ ਕੀਤੀ ਹੈ ਕਿ ਉਹ ਇਸ ਬਾਰੇ ਕੌਂਸਲ ਨੂੰ ਜਾਣੂ ਕਰਵਾਉਣ। ਅਮਰੀਕੀ ਰੱਖਿਆ ਵਿਭਾਗ ਪੈਂਟਾਗਨ ਨੇ ਸੋਮਵਾਰ ਨੂੰ ਦੱਸਿਆ ਸੀ ਕਿ ਉਸ ਨੇ ਇਕ ਰਵਾਇਤੀ ਕਰੂਜ਼ ਮਿਜ਼ਾਈਲ ਦੀ ਪਰਖ ਕੀਤੀ ਹੈ। ਇਹ ਮਿਜ਼ਾਈਲ ਕਰੀਬ 500 ਕਿਲੋਮੀਟਰ ਦੂਰ ਨਿਸ਼ਾਨਾ ਲਾਉਣ ਵਿੱਚ ਸਫਲ ਰਹੀ। ਰੂਸ ਨਾਲ ਐਟਮੀ ਹਥਿਆਰ ਸੰਧੀ ਖ਼ਤਮ ਹੋਣ ਪਿੱਛੋਂ ਅਮਰੀਕਾ ਦੀ ਇਹ ਪਹਿਲੀ ਮਿਜ਼ਾਈਲ ਪਰਖ ਸੀ। ਇਸ ਉੱਤੇ ਰੂਸ ਤੇ ਚੀਨ ਨੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਸੀ। ਇਸ ਤੋਂ ਬਾਅਦ ਅਮਰੀਕੀ ਰੱਖਿਆ ਮੰਤਰੀ ਮਾਰਕ ਐਸਪਰ ਨੇ ਇਕ ਇੰਟਰਵਿਊ ਵਿੱਚ ਕਿਹਾ ਸੀ, ‘ਅਸੀਂ ਯਕੀਨੀ ਕਰਨਾ ਚਾਹੁੰਦੇ ਹਾਂ ਕਿ ਅਸੀਂ ਆਪਣੀ ਸਮਰੱਥਾ ਦੇ ਜ਼ੋਰ ਉੱਤੇ ਚੀਨ ਦੇ ਬੁਰੇ ਵਰਤਾਅ ਨੂੰ ਰੋਕ ਸਕੀਏ।` ਅਮਰੀਕਾ ਦੀ ਪਿਛਲੀ ਮਿਜ਼ਾਈਲ ਪਰਖ ਉੱਤੇ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਬੁੱਧਵਾਰ ਨੂੰ ਫਿਨਲੈਂਡ ਦੀ ਰਾਜਧਾਨੀ ਹੇਲਸਿੰਕੀ ਵਿੱਚ ਕਿਹਾ, ਅਮਰੀਕਾ ਦੇ ਇਸ ਕਦਮ ਨਾਲ ਸਾਡੇ ਦੇਸ਼ ਨੂੰ ਨਵਾਂ ਖ਼ਤਰਾ ਪੈਦਾ ਹੋ ਗਿਆ ਹੈ। ਇਸ ਦਾ ਜਵਾਬ ਦਿੱਤਾ ਜਾਵੇਗਾ।