ਲੁਧਿਆਣਾ, 22 ਅਗਸਤ (ਪੋਸਟ ਬਿਊਰੋ)- ਫਿਲੌਰ ਦੇ ਪਿੰਡ ਰੁੜਕਾ ਖੁਰਦ ਵਿੱਚ ਇੱਕ 17 ਸਾਲ ਦੀ ਲੜਕੀ ਦੀ ਮਾਂ ਵੱਲੋਂ ਜਿਸਮ ਫਰੋਸ਼ੀ ਦਾ ਧੰਦਾ ਕਰਨ ਕਰ ਕੇ ਉਸ ਨੇ ਆਪਣੀ ਬੇਟੀ ਕਈ ਲੋਕਾਂ ਨਾਲ ਨਾਜਾਇਜ਼ ਸੰਬੰਧ ਬਣਵਾਏ। ਇਸ ਦੇ ਬਾਅਦ ਉਸ ਨੂੰ ਵਿਆਹ ਦਾ ਕਹਿ ਕੇ ਤਿੰਨ ਲੱਖ ਰੁਪਏ ਵਿੱਚ ਵੇਚ ਦਿੱਤਾ। ਪੀੜਤਾ ਨੂੰ ਖਰੀਦਣ ਵਾਲੇ ਉਸ ਦੇ ਪਤੀ ਨੇ ਵੀ ਉਸ ਦੇ ਲੋਕਾਂ ਨਾਲ ਨਾਜਾਇਜ਼ ਸੰਬੰਧ ਬਣਵਾਏ ਤਾਂ ਉਹ ਭੱਜ ਕੇ ਟਿੱਬਾ ਰੋਡ ਆਪਣੇ ਪਿਤਾ ਦੇ ਕੋਲ ਪਹੁੰਚੀ। ਉਸ ਨੇ ਪੁਲਸ ਕਮਿਸ਼ਨਰ ਨੂੰ ਸ਼ਿਕਾਇਤ ਦਿੱਤੀ ਤਾਂ ਥਾਣਾ ਟਿੱਬਾ ਪੁਲਸ ਨੇ ਪੀੜਤਾ ਦੀ ਸ਼ਿਕਾਇਤ ਉਤੇ ਫਿਲੌਰ ਦੀ ਆਸ਼ਾ ਰਾਣੀ ਅਤੇ ਨਵਾਂ ਸ਼ਹਿਰ ਦੇ ਰਾਮ ਲੁਭਾਇਆ ਉੱਤੇ ਕੇਸ ਦਰਜ ਕੀਤਾ ਹੈ।
ਏ ਐਸ ਆਈ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਪੀੜਤਾ ਦੇ ਦੱਸਣ ਅਨੁਸਾਰ ਆਸ਼ਾ ਰਾਣੀ ਦੇ ਬਾਹਰ ਕਈ ਲੋਕਾਂ ਨਾਲ ਨਾਜਾਇਜ਼ ਸੰਬੰਧ ਸਨ। ਇਸ ਦੇ ਬਾਰੇ ਕਰੀਬ ਦੋ-ਤਿੰਨ ਸਾਲ ਪਹਿਲਾਂ ਉਸ ਦੇ ਪਿਤਾ ਨੂੰ ਪਤਾ ਲੱਗਾ ਤਾਂ ਉਹ ਘਰ ਛੱਡ ਕੇ ਇਕੱਲਾ ਰਹਿਣ ਲੱਗ ਪਿਆ। ਫਿਰ ਗਲਤ ਲੋਕਾਂ ਦਾ ਘਰ ਆਉਣਾ ਜਾਣਾ ਸ਼ੁਰੂ ਹੋ ਗਿਆ। ਪੀੜਤਾ ਨੇ ਦੱਸਿਆ ਕਿ ਆਸ਼ਾ ਉਸ ਨੂੰ ਕੁੱਟ ਕੇ ਲੋਕਾਂ ਨਾਲ ਨਾਜਾਇਜ਼ ਸੰਬੰਧ ਬਣਵਾਉਂਦੀ ਸੀ। ਆਸ਼ਾ ਦੇ ਦੂਸਰੇ ਦੋਸ਼ੀ ਰਾਮ ਲੁਭਾਇਆ ਨਾਲ ਵੀ ਨਾਜਾਇਜ਼ ਸੰਬੰਧ ਸਨ, ਜਿਸ ਕਾਰਨ ਆਸ਼ਾ ਨੇ ਆਪਣੀ ਪ੍ਰੇਮ ਨੂੰ ਰਿਸ਼ਤੇਦਾਰੀ ਵਿੱਚ ਬਦਲਣ ਦੀ ਗੱਲ ਕਹਿ ਕੇ ਪੀੜਤਾ ਦਾ ਰਾਮ ਨਾਲ ਵਿਆਹ ਕਰ ਦਿੱਤਾ, ਪਰ ਬਾਅਦ ਵਿੱਚ ਪਤਾ ਲੱਗਾ ਕਿ ਉਸ ਨੇ ਤਿੰਨ ਲੱਖ ਰੁਪਏ ਵਿੱਚ ਵੇਚ ਦਿੱਤਾ ਹੈ। ਸਹੁਰੇ ਘਰ ਜਾ ਕੇ ਰਾਮ ਨੇ ਉਸ ਨੂੰ ਲੋਕਾਂ ਨਾਲ ਸੰਬੰਧ ਬਣਾਉਣ ਨੂੰ ਕਿਹਾ ਤਾਂ ਪੀੜਤਾ ਘਰ ਛੱਡ ਕੇ ਪੇਕੇ ਆ ਗਈ, ਪ੍ਰੰਤੂ ਉਥੇ ਆਸ਼ਾ ਨੇ ਉਸ ਨੂੰ ਕੁੱਟ ਕੇ ਵਾਪਸ ਭੇਜ ਦਿੱਤਾ। ਰਾਮ ਦੇ ਕਹਿਣ 'ਤੇ ਉਸ ਨੂੰ ਕਈ ਲੋਕਾਂ ਨਾਲ ਸੰਬੰਧ ਬਣਾਉਣੇ ਪਏ।