ਅੰਮ੍ਰਿਤਸਰ, 22 ਅਗਸਤ (ਪੋਸਟ ਬਿਊਰੋ)- ਆਈ ਸੀ ਪੀ (ਇੰਟਰਨੈਸ਼ਨਲ ਚੈੱਕ ਪੋਸਟ) ਅਟਾਰੀ ਬਾਰਡਰ ਵਿਖੇ ਬੀਤੇ ਦਿਨੀਂ ਪਾਕਿਸਤਾਨ ਤੋਂ ਆਏ ਨਮਕ ਦੀ ਖੇਪ ਤੋਂ 532 ਕਿਲੋ ਹੈਰੋਇਨ ਤੇ 52 ਕਿਲੋ ਮਿਕਸਡ ਨਾਰਕੋਟਿਕਸ ਫੜੇ ਜਾਣ ਦੇ ਕੇਸ ਵਿੱਚ ਅਦਾਲਤ ਦਾ ਹੁਕਮ ਮਿਲਣ ਪਿੱਛੋਂ ਐਨ ਆਈ ਏ ਦੀ ਟੀਮ ਕੱਲ੍ਹ ਨੂੰ ਕਸਟਮ ਕਮਿਸ਼ਨਰੇਟ ਦਫਤਰ ਵਿੱਚ ਪਹੁੰਚ ਗਈ। ਆਈ ਸੀ ਪੀ ਅਟਾਰੀ ਬਾਰਡਰ ਨਾਲ ਜੁੜੇ ਹੈਰੋਇਨ ਤਸਕਰੀ ਦੇ ਇਸ ਸਭ ਤੋਂ ਵੱਡੇ ਹਾਈਪ੍ਰੋਫਾਈਲ ਕੇਸ ਨਾਲ ਸੰਬੰਧਤ ਦਸਤਾਵੇਜ਼ ਕਸਟਮ ਵਿਭਾਗ ਨੇ ਐਨ ਆਈ ਏ ਨੂੰ ਦੇ ਦਿੱਤੇ, ਪਰ ਹੈਰਾਨੀ ਦੀ ਗੱਲ ਹੈ ਕਿ ਐਨ ਆਈ ਏ ਦੀ ਟੀਮ ਨੇ ਦਸਤਾਵੇਜ਼ ਹੀ ਲਏ, ਪਰ ਕਸਟਮ ਵਿਭਾਗ ਵੱਲੋਂ ਜ਼ਬਤ ਕੀਤੇ ਪਦਾਰਥ, ਜਿਸ ਵਿੱਚ 532 ਕਿਲੋ ਹੈਰੋਇਨ ਅਤੇ 52 ਕਿਲੋ ਮਿਕਸਡ ਨਾਰਕੋਟਿਕਸ ਸ਼ਾਮਲ ਹਨ, ਲੈ ਕੇ ਜਾਣ ਤੋਂ ਇਨਕਾਰ ਕਰ ਦਿੱਤਾ।
ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਕਸਟਮ ਵਿਭਾਗ ਨੇ ਇਸ ਕੇਸ ਵਿੱਚ ਐਨ ਆਈ ਏ ਦੀ ਟੀਮ ਨੂੰ ਸਾਰੀ ਖੇਪ ਰਿਸੀਵ ਕਰਨ ਲਈ ਕਿਹਾ ਹੈ ਅਤੇ ਐਨ ਆਈ ਏ ਇਸ ਨੂੰ ਲੈਣ ਤੋਂ ਇਨਕਾਰ ਕੀਤਾ ਹੈ ਤਾਂ ਇਸ ਲਈ ਐਨ ਆਈ ਏ ਦੇ ਅਧਿਕਾਰੀਆਂ ਤੋਂ ਲਿਖਤੀ ਜਵਾਬ ਮੰਗਿਆ ਹੈ, ਕਿਉਂਕਿ ਅਦਾਲਤੀ ਹੁਕਮ ਅਨੁਸਾਰ ਕਸਟਮ ਨੇ ਨਾ ਸਿਰਫ ਇਸ ਕੇਸ ਦੇ ਸਾਰੇ ਦਸਤਾਵੇਜ਼ ਐਨ ਆਈ ਏ ਟੀਮ ਨੂੰ ਦੇਣੇ ਹਨ, ਬਲਕਿ ਜ਼ਬਤ ਕੀਤੀ ਹੈਰੋਇਨ ਦੀ ਖੇਪ ਨੂੰ ਵੀ ਇਸ ਕੌਮੀ ਜਾਂਚ ਏਜੰਸੀ ਨੂੰ ਦੇਣੀ ਹੈ। ਇਸ ਮਾਮਲੇ ਵਿੱਚ ਜਲਦੀ ਐਨ ਆਈ ਏ ਅਤੇ ਕਸਟਮ ਵਿਭਾਗ ਦੇ ਉਚ ਅਧਿਕਾਰੀਆਂ ਦੇ ਵਿਚਾਲੇ ਇਕ ਬੈਠਕ ਹੋਣ ਜਾ ਰਹੀ ਹੈ, ਜਿਸ ਵਿੱਚ ਇਸ ਕੇਸ ਦੇ ਕਈ ਪਹਿਲੂਆਂ 'ਤੇ ਚਰਚਾ ਕੀਤੀ ਜਾਵੇਗੀ।