ਨਿਊਯਾਰਕ, 21 ਅਗਸਤ (ਪੋਸਟ ਬਿਊਰੋ)- ਅਮਰੀਕਾ ਦੇ ਅਰਬਪਤੀ ਫਾਈਨਾਂਸਰ ਜੈਫਰੀ ਐਪਸਟੀਨ ਨੇ ਨਿਊਯਾਰਕ ਦੀ ਜੇਲ੍ਹ ਵਿੱਚ ਖੁਦਕੁਸ਼ੀ ਕਰਨ ਤੋਂ ਦੋ ਦਿਨ ਪਹਿਲਾਂ ਆਪਣੀ ਵਸੀਅਤ 'ਤੇ ਹਸਤਾਖਰ ਕੀਤੇ ਸਨ। ਅਦਾਲਤ 'ਚ ਜਮ੍ਹਾਂ ਕਰਵਾਏ ਗਏ ਨਵੇਂ ਦਸਤਾਵੇਜ਼ਾਂ 'ਚ ਇਹ ਜਾਣਕਾਰੀ ਸਾਹਮਣੇ ਆਈ ਹੈ।
ਇਨ੍ਹਾਂ ਦਸਤਾਵੇਜ਼ਾਂ ਮੁਤਾਬਕ ਐਪਸਟੀਨ ਦੇ ਕੋਲ 5.6 ਕਰੋੜ ਡਾਲਰ ਦੀ ਨਕਦੀ ਸਮੇਤ 57.7 ਕਰੋੜ ਡਾਲਰ ਦੀ ਜਾਇਦਾਦ ਸੀ। ਵਸੀਅਤ ਸਾਹਮਣੇ ਆਉਣ ਨਾਲ ਐਪਸਟੀਨ ਖਿਲਾਫ ਚੱਲਦੇ ਮੁਕੱਦਮਿਆਂ 'ਚ ਨਵਾਂ ਮੋੜ ਆ ਸਕਦਾ ਹੈ। ਨਾਬਾਲਿਗ ਕੁੜੀਆਂ ਦੇ ਜਿਨਸ਼ੀ ਸ਼ੋਸ਼ਣ ਲਈ ਐਪਸਟੀਨ ਖਿਲਾਫ ਕਈ ਮੁਕੱਦਮੇ ਚੱਲ ਰਹੇ ਸਨ। ਕਈ ਸੈਕਸ ਅਪਰਾਧਾਂ ਲਈ ਉਸ ਨੂੰ ਦੋਸ਼ੀ ਵੀ ਠਹਿਰਾਇਆ ਜਾ ਚੁੱਕਾ ਸੀ। ਮੌਤ ਤੋਂ ਬਾਅਦ ਉਸ 'ਤੇ ਚੱਲ ਰਹੇ ਅਪਰਾਧਿਕ ਮਾਮਲੇ ਜਾਰੀ ਨਹੀਂ ਰੱਖੇ ਜਾ ਸਕਦੇ। ਇਸੇ ਕਾਰਨ ਇਸਤਗਾਸਾ ਪੱਖ ਨੇ ਬੀਤੇ ਦਿਨੀਂ ਉਸ 'ਤੇ ਚੱਲ ਰਹੇ ਕੇਸ ਰੱਦ ਕਰਨ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ। ਦੂਜੇ ਪਾਸੇ ਪੀੜਤਾਵਾਂ ਦੇ ਵਕੀਲ ਐਪਸਟੀਨ ਦੀ ਵਸੀਅਤ ਦਾ ਵਿਸ਼ਲੇਸ਼ਣ ਕਰ ਰਹੇ ਹਨ। ਉਹ ਉਸ ਦਾ ਜਾਇਦਾਦ 'ਚੋਂ ਪੀੜਤਾਂ ਨੂੰ ਮੁਆਵਜ਼ਾ ਦੇਣ ਦੀ ਗੱਲ ਕਰ ਰਹੇ ਹਨ। ਇਕ ਵਕੀਲ ਨੇ ਕਿਹਾ ਕਿ ਐਪਸਟੀਨ ਦੀ ਸਾਰੀ ਜਾਇਦਾਦ ਪੀੜਤਾਂ ਨੂੰ ਦਿੱਤੀ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਇਹੀ ਨਿਆਂ ਮਿਲ ਸਕਦਾ ਹੈ।