ਓਟਵਾ, 20 ਅਗਸਤ (ਪੋਸਟ ਬਿਊਰੋ) : ਫੈਡਰਲ ਬੈਨੇਫਿਟਜ਼ ਹਾਸਲ ਕਰਨ ਵਾਲੇ ਨਵੇਂ ਮਾਪਿਆਂ ਨੂੰ ਟੈਕਸ ਕ੍ਰੈਡਿਟ ਦੇਣ ਦਾ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਵੱਲੋਂ ਵਾਅਦਾ ਕੀਤਾ ਜਾ ਰਿਹਾ ਹੈ।
ਸ਼ੀਅਰ ਇੱਕ ਵਾਰੀ ਮੁੜ ਉਸੇ ਆਈਡੀਆ ਨੂੰ ਦੁਹਰਾ ਰਹੇ ਹਨ ਜਿਹੜਾ ਉਨ੍ਹਾਂ 2018 ਵਿੱਚ ਦਿੱਤਾ ਸੀ। ਇਸ ਸਾਲ ਦੇ ਅੰਤ ਵਿੱਚ ਹੋਣ ਜਾ ਰਹੀਆਂ ਫੈਡਰਲ ਚੋਣਾਂ ਵਿੱਚ ਪਰਿਵਾਰ ਕੰਜ਼ਰਵੇਟਿਵਾਂ ਦਾ ਸਮਰਥਨ ਕਰਨ ਇਸ ਲਈ ਵੀ ਸ਼ੀਅਰ ਵੱਲੋਂ ਇਹ ਆਈਡੀਆ ਦੁਹਰਾਇਆ ਜਾ ਰਿਹਾ ਹੈ। ਸ਼ੀਅਰ ਦਾ ਕਹਿਣਾ ਹੈ ਕਿ ਜੇ ਉਨ੍ਹਾਂ ਦੀ ਸਰਕਾਰ ਸੱਤਾ ਵਿੱਚ ਆਉਂਦੀ ਹੈ ਤਾਂ ਉਹ ਨਵੇਂ ਬਣੇ ਮਾਪਿਆਂ, ਮੈਟਰਨਿਟੀ ਜਾਂ ਪੇਰੈਂਟਲ ਲੀਵ ਉੱਤੇ ਗਏ ਮਾਪਿਆਂ ਲਈ ਇੰਪਲਾਇਮੈਂਟ ਇੰਸ਼ੋਰੈਂਸ ਬੈਨੇਫਿਟਸ ਮੁਹੱਈਆ ਕਰਵਾਉਣਗੇ।
ਸ਼ੀਅਰ ਵੱਲੋਂ ਇਹ ਪ੍ਰਸਤਾਵ ਵੀ ਦਿੱਤਾ ਜਾ ਰਿਹਾ ਹੈ ਕਿ ਨਵੇਂ ਮਾਪੇ ਭਾਵੇਂ ਜਿੰਨਾਂ ਮਰਜ਼ੀ ਕਮਾਉਂਦੇ ਹੋਣ ਉਨ੍ਹਾਂ ਨੂੰ ਛੁੱਟੀ ਉੱਤੇ ਰਹਿੰਦਿਆਂ 15 ਫੀ ਸਦੀ ਨੌਨ ਰਿਫੰਡੇਬਲ ਟੈਕਸ ਕ੍ਰੈਡਿਟ ਮਿਲੇਗਾ। ਜਿ਼ਕਰਯੋਗ ਹੈ ਕਿ ਪਾਰਲੀਆਮੈਂਟਰੀ ਬਜਟ ਆਫੀਸਰ ਨੇ ਮਈ 2018 ਵਿੱਚ ਇਹ ਹਿਸਾਬ ਲਾਇਆ ਸੀ ਕਿ ਸ਼ੀਅਰ ਦੀ ਇਸ ਯੋਜਨਾ ਦੇ ਲਾਗੂ ਹੋਣ ਨਾਲ ਫੈਡਰਲ ਖਜ਼ਾਨੇ ਉੱਤੇ ਪਹਿਲੇ ਸਾਲ ਹੀ 600 ਮਿਲੀਅਨ ਡਾਲਰ ਦਾ ਬੋਝ ਪਵੇਗਾ।
ਇਸ ਤੋਂ ਇਲਾਵਾ ਪਰਿਵਾਰਾਂ ਵੱਲੋਂ ਅਣਵਰਤੇ ਕ੍ਰੈਡਿਟਸ ਨੂੰ ਅਗਾਂਹ ਜਾਰੀ ਰੱਖਣ ਦੇਣ ਨਾਲ ਆਉਣ ਵਾਲੇ ਸਾਲਾਂ ਵਿੱਚ ਸਰਕਾਰੀ ਖਜ਼ਾਨੇ ਉੱਤੇ 261 ਮਿਲੀਅਨ ਡਾਲਰ ਦਾ ਹੋਰ ਬੋਝ ਪਵੇਗਾ।