ਨਵੀਂ ਦਿੱਲੀ, 18 ਅਗਸਤ (ਪੋਸਟ ਬਿਊਰੋ)- ਬੀਤੀ 15 ਅਗਸਤ ਦੇ ਦਿਨ ਤੋਂ ਟਵਿੱਟਰ ਉਤੇ ਪਾਕਿਸਤਾਨ ਦੇ ਕੁਝ ਲੋਕ ਲਗਾਤਾਰ ਬਾਲੀਵੁੱਡ ਦੇ ਪ੍ਰਸਿੱਧ ਗਾਇਕ ਅਦਨਾਨ ਸਾਮੀ ਨੂੰ ਨਿਸ਼ਾਨਾ ਬਣਾਉਂਦੇ ਨਜ਼ਰ ਆ ਰਹੇ ਹਨ। ਜਦ ਤੋਂ ਅਦਨਾਨ ਸਾਮੀ ਨੇ ਭਾਰਤ ਦੇ ਸੁਤੰਤਰਤਾ ਦਿਵਸ ਦੀਆਂ ਸ਼ੁਭ ਕਾਮਨਾਵਾਂ ਟਵਿੱਟਰ 'ਤੇ ਦਿੱਤੀਆਂ ਹਨ, ਉਸ ਸਮੇਂ ਤੋਂ ਪਾਕਿਸਤਾਨੀ ਯੂਜ਼ਰਜ ਉਸ ਨੂੰ ਨਿਸ਼ਾਨਾ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਅਤੇ ਕਈ ਤਰ੍ਹਾਂ ਦੇ ਸੁਆਲ ਪੁੱਛ ਰਹੇ ਹਨ, ਪਰ ਅਦਨਾਨ ਵੀ ਪਾਕਿਸਤਾਨੀਆਂ ਨੂੰ ਕਰਾਰਾ ਜਵਾਬ ਦੇਣ ਤੋਂ ਪਿੱਛੇ ਨਹੀਂ ਹਟ ਰਹੇ।
ਕੱਲ੍ਹ ਇੱਕ ਪਾਕਿਸਤਾਨੀ ਪ੍ਰਸ਼ੰਸਕ ਨੇ ਅਦਨਾਨ ਨੂੰ ਟਵੀਟ ਕਰਦੇ ਹੋਏ ਲਿਖਿਆ ਕਿ ਤੁਸੀਂ ਇੱਕ ਫਰਜ਼ੀ ਅਕਾਊਂਟ ਬਣਾਇਆ ਅਤੇ ਫਿਰ ਦਿਖਾਇਆ ਕਿ ਇਹ ਅਸਲੀ ਹੈ। ਵਾਹ ਅਦਨਾਨ ਸਾਮੀ ਜੀ, ਕੀ ਤੁਸੀਂ ਅਸਲੀਅਤ 'ਚ ਪਾਕਿ ਨਾਲ ਨਫਰਤ ਕਰਦੇ ਹੋ? ਇਸ ਟਵੀਟ ਦਾ ਜਵਾਬ ਦਿੰਦੇ ਹੋਏ ਅਦਨਾਨ ਨੇ ਕਿਹਾ ਕਿ ਨਹੀਂ ਮੇਰੇ ਦੋਸਤ, ਮੈਂ ਫਰਜ਼ੀ ਅਕਾਊਂਟ ਨਹੀਂ ਬਣਾਇਆ, ਨਾ ਇਸ ਨਾਲ ਨਫਰਤ ਫੈਲਾਅ ਰਿਹਾ ਹਾਂ। ਅਜਿਹਾ ਤੁਹਾਡੀ ਫੌਜ ਕਰਦੀ ਹੈ।
ਇਸ ਤੋਂ ਪਹਿਲਾਂ ਪਾਕਿ ਯੂਜ਼ਰਜ ਨੇ ਅਦਨਾਨ ਤੋਂ ਉਨ੍ਹਾਂ ਦੇ ਪਿਤਾ ਬਾਰੇ ਵੀ ਸੁਆਲ ਕੀਤਾ ਸੀ। ਵਰਨਣ ਯੋਗ ਹੈ ਕਿ ਸਾਮੀ ਬ੍ਰਿਟੇਨ ਵਿੱਚ ਪੈਦਾ ਹੋਏ ਤੇ ਪਹਿਲਾਂ ਕੈਨੇਡਾ ਦੀ ਨਾਗਰਿਕਤਾ ਰੱਖਦੇ ਸਨ। ਉਹ ਪਾਕਿ ਮੂਲ ਦੇ ਹਨ, ਪਰ ਉਨ੍ਹਾਂ 2016 'ਚ ਭਾਰਤ ਦੀ ਨਾਗਰਿਕਤਾ ਲੈ ਲਈ ਸੀ।