ਵਾਸ਼ਿੰਗਟਨ, 18 ਅਗਸਤ, (ਪੋਸਟ ਬਿਊਰੋ)- ਈਰਾਨ ਦੇ ਤੇਲ ਟੈਂਕਰ ਗ੍ਰੇਸ ਵੰਨ ਨੂੰ ਜਿਬ੍ਰਾਲਟਰ ਵਿੱਚ ਰੁਕਵਾ ਸਕਣ ਤੋਂ ਅਸਫਲ ਰਹੇ ਅਮਰੀਕਾ ਨੇ ਉਸ ਨੂੰ ਫੜਨ ਦਾ ਨਵਾਂ ਰਾਹ ਲੱਭਿਆ ਹੈ। ਉਸ ਦੇ ਨਿਆਂ ਵਿਭਾਗ ਨੇ ਵਾਰੰਟ ਜਾਰੀ ਕਰ ਕੇ ਅਮਰੀਕੀ ਨੇਵੀ ਅਤੇ ਹੋਰਨਾਂ ਏਜੰਸੀਆਂ ਨੂੰ ਟੈਂਕਰ ਉੱਤੇ ਕਬਜ਼ਾ ਕਰਨ ਦਾ ਆਦੇਸ਼ ਦੇ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ 21 ਲੱਖ ਬੈਰਲ ਤੇਲ ਨਾਲ ਭਰਿਆ ਇਹ ਟੈਂਕਰ ਇਸ ਵਕਤ ਭੂਮੱਧ ਸਾਗਰ ਵਿੱਚ ਬ੍ਰਿਟੇਨ ਦੀ ਜਲ ਸੀਮਾ ਦੇ ਅੰਦਰ ਟਿਕਿਆ ਹੈ। ਇਸ ਨੂੰ ਪਿਛਲੇ ਵੀਰਵਾਰ ਜਿਬ੍ਰਾਲਟਰ ਨੇ ਛੱਡ ਦਿੱਤਾ ਸੀ। ਟੈਂਕਰ ਦੇ 28 ਮੈਂਬਰੀ ਚਾਲਕ ਦਲ ਵਿੱਚ ਕੈਪਟਨ ਸਮੇਤ 24 ਜਣੇ ਭਾਰਤੀ ਹਨ। ਅਮਰੀਕਾ ਵਿੱਚ ਇਸ ਬਾਰੇ ਹੋਈ ਸੁਣਵਾਈ ਦੌਰਾਨ ਗ੍ਰੇਸ ਵੰਨ ਨੂੰ ਈਰਾਨ ਦੇ ਰੈਵੋਲੂਸ਼ਨਰੀ ਗਾਰਡਸ ਕੋਰ ਨਾਲ ਸਬੰਧਤ ਦੱਸਿਆ ਗਿਆ ਹੈ। ਈਰਾਨ ਦੇ ਰੈਵੋਲੂਸ਼ਨਰੀ ਗਾਰਡਸ ਕੋਰ ਨੂੰ ਅਮਰੀਕਾ ਨੇ ਅੱਤਵਾਦੀ ਜਥੇਬੰਦੀ ਐਲਾਨ ਕੀਤਾ ਹੋਇਆ ਹੈ। ਦੋਸ਼ ਇਹ ਲਾਇਆ ਗਿਆ ਹੈ ਕਿ ਇਹ ਟੈਂਕਰ ਅਮਰੀਕਾ ਦੇ ਆਰਥਿਕ ਪ੍ਰਬੰਧ ਵਿੱਚ ਨਾਜਾਇਜ਼ ਘੁਸਪੈਠ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਪਾਬੰਦੀ ਲੱਗਣ ਪਿੱਛੋਂ ਇਹ ਟੈਂਕਰ ਸੀਰੀਆ ਨੂੰ ਤੇਲ ਦੀ ਸਪਲਾਈ ਕਰਨ ਚੱਲਿਆ ਸੀ। ਅਮਰੀਕਾ ਵੱਲੋਂ ਜਾਰੀ ਕੀਤੇ ਵਾਰੰਟ ਵਿੱਚ ਤੇਲ ਭਰਿਆ ਟੈਂਕਰ ਤੇ ਬੈਂਕ ਵਿੱਚ ਉਸ ਦੀ ਕੰਪਨੀ ਦੇ ਜਮ੍ਹਾਂ 9,95,000 ਡਾਲਰ ਜ਼ਬਤ ਕਰਨ ਦਾ ਆਦੇਸ਼ ਵੀ ਦਿੱਤਾ ਗਿਆ ਹੈ। ਟੈਂਕਰ ਚਲਾ ਰਹੀ ਕੰਪਨੀ ਉਤੇ ਇੰਟਰਨੈਸ਼ਨਲ ਐਮਰਜੈਂਸੀ ਇਕੋਨਾਮਿਕ ਪਾਵਰ ਐਕਟ, ਬੈਂਕ ਨਾਲ ਫਰਾਡ, ਮਨੀ ਲਾਂਡਰਿੰਗ ਤੇ ਅੱਤਵਾਦ ਫੈਲਾਉਣ ਦੇ ਗੰਭੀਰ ਦੋਸ਼ ਲਾਏ ਗਏ ਹਨ। ਜਾਣਕਾਰ ਸੂਤਰਾਂ ਮੁਤਾਬਕ ਟੈਂਕਰ ਦੇ ਚਾਲਕ ਦਲ ਦੇ ਕੁਝ ਮੈਂਬਰ ਛੁੱਟੀ ਚਲੇ ਗਏ ਹਨ। ਇਸ ਕਾਰਨ ਉਸ ਦੇ ਨਵੇਂ ਚਾਲਕਾਂ ਦੀ ਉਡੀਕ ਵਿੱਚ ਟੈਂਕਰ ਭੂਮੱਧ ਸਾਗਰ ਵਿੱਚ ਖੜ੍ਹਾ ਹੈ। ਇਸ ਮੌਕੇ ਟੈਂਕਰ ਦੇ ਭਾਰਤੀ ਕੈਪਟਨ ਨੇ ਸੇਵਾ ਮੁਕਤੀ ਦੀ ਅਰਜ਼ੀ ਦੇ ਦਿੱਤੀ ਹੈ। ਉਸ ਦੇ ਵਕੀਲ ਮੁਤਾਬਕ ਟੈਂਕਰ ਵਿੱਚ ਕੁਝ ਮੁਰੰਮਤ ਦੀ ਲੋੜ ਵੀ ਹੈ। ਇਸ ਸਮੇਂ ਦੌਰਾਨ ਕੈਪਟਨ ਨੇ ਉਸ ਜਹਾਜ਼ ਨੂੰ ਛੱਡਣ ਦੀ ਇੱਛਾ ਪ੍ਰਗਟ ਕਰ ਦਿੱਤੀ ਹੈ।