ਹਰਿਦੁਆਰ, 11 ਅਕਤੂਬਰ, (ਪੋਸਟ ਬਿਊਰੋ)- ਹਰਿਦੁਆਰ `ਚ ਗੰਗਾ ਨਦੀ ਦੀ ਰੱਖਿਆ ਲਈ ਭੁੱਖ ਹੜਤਾਲ `ਤੇ ਬੈਠੇ ਸੁਆਮੀ ਗਿਆਨ ਸਵਰੂਪ ਸਾਨੰਦ ਦੀ ਅੱਜ ਰਿਸ਼ੀਕੇਸ਼ ਦੇ ਏਮਸ ਹਸਪਤਾਲ `ਚ ਮੌਤ ਹੋ ਗਈ ਹੈ। ਭੁੱਖ ਹੜਤਾਲ ਦੇ 111ਵੇਂ ਦਿਨ ਪ੍ਰਸ਼ਾਸਨ ਨੇ ਉਸ ਨੂੰ ਜਬਰੀ ਚੁੱਕ ਕੇ ਹਸਪਤਾਲ `ਚ ਭਰਤੀ ਕਰਵਾ ਦਿੱਤਾ ਸੀ।
ਮਿਲੀ ਜਾਣਕਾਰੀ ਮੁਤਾਬਕ ਹਰਿਦੁਆਰ ਦੇ ਮਾਤਰ ਸਦਨ ਵਿੱਚ ਪਿਛਲੇ 110 ਦਿਨਾਂ ਤੋਂ ਸੁਆਮੀ ਸਾਨੰਦ ਗੰਗਾ ਨਦੀ ਦੀ ਰੱਖਿਆ ਲਈ ਭੁੱਖ ਹੜਤਾਲ `ਤੇ ਬੈਠੇ ਹੋਏ ਸਨ। ਸੁਆਮੀ ਨੇ ਬੁੱਧਵਾਰ ਸਵੇਰੇ ਪਾਣੀ ਵੀ ਪੀਣਾ ਛੱਡ ਦਿੱਤਾ ਸੀ। ਇਸ ਤੋਂ ਬਾਅਦ ਐੱਸ ਡੀ ਐੱਮ ਦੀ ਅਗਵਾਈ ਵਿੱਚ ਪ੍ਰਸ਼ਾਸਨ ਨੇ ਭੁੱਖ ਹੜਤਾਲ ਦੇ 111ਵੇਂ ਦਿਨ ਬੁੱਧਵਾਰ ਨੂੰ ਸੁਆਮੀ ਸਾਨੰਦ ਨੂੰ ਚੁੱਕ ਕੇ ਰਿਸ਼ੀਕੇਸ਼ ਦੇ ਏਮਸ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਸੀ, ਜਿੱਥੇ ਵੀਰਵਾਰ ਨੂੰ ਦਿਲ ਦੀ ਧੜਕਣ ਰੁਕਣ ਨਾਲ ਉਨ੍ਹਾਂ ਦੀ ਮੌਤ ਹੋ ਗਈ। ਸੁਆਮੀ ਸਾਨੰਦ ਨੇ ਗੰਗਾ ਦੀ ਰੱਖਿਆ ਲਈ ਕਾਨੂੰਨ ਬਣਾਉਣ ਦੀ ਮੰਗ ਕੀਤੀ ਸੀ। ਉਸ ਦਾ ਕਹਿਣਾ ਸੀ ਕਿ ਉਹ ਗੰਗਾ ਦੀ ਰੱਖਿਆ ਲਈ ਕੇਂਦਰ ਵਲੋਂ ਸਖਤ ਕਾਨੂੰਨ ਬਣਾਉਣ ਬਾਰੇ ਪ੍ਰਧਾਨ ਮੰਤਰੀ ਸਮੇਤ ਮੰਤਰੀਆਂ ਅਤੇ ਮੁੱਖ ਮੰਤਰੀਆਂ ਨੂੰ ਕਈ ਵਾਰ ਪੱਤਰ ਲਿਖ ਚੁੱਕੇ ਹਨ। ਕੋਈ ਪ੍ਰਤੀਕਿਰਿਆ ਨਾ ਮਿਲਣ ਤੋਂ ਨਿਰਾਸ਼ ਹੋ ਕੇ ਉਨ੍ਹਾਂ ਨੇ ਆਪਣੀ ਭੁੱਖ ਹੜਤਾਲ ਦਾ ਫੈਸਲਾ ਕੀਤਾ। ਸੁਆਮੀ ਨੇ ਕਿਹਾ ਸੀ ਕਿ ਉਹ ਗੰਗਾ `ਚ ਵੱਡੇ ਬੰਨ੍ਹਾਂ ਦੇ ਨਿਰਮਾਣ ਦਾ ਵਿਰੋਧ ਕਰ ਰਹੇ ਹੈ। ਗੰਗਾ ਵਿੱਚ ਬਣਨ ਵਾਲੇ ਡੈਮ ਪ੍ਰਾਜੈਕਟਾਂ ਨੂੰ ਰੱਦ ਕੀਤਾ ਜਾਣਾ ਚਾਹੀਦਾ ਹੈ। ਕੇਂਦਰ ਸਰਕਾਰ ਨੂੰ ਗੰਗਾ `ਚ ਫੈਲ ਰਹੇ ਪ੍ਰਦੂਸ਼ਣ ਅਤੇ ਗੈਰ-ਕਾਨੂੰਨੀ ਖੁਦਾਈ ਨੂੰ ਰੋਕਣ ਲਈ ਸਖਤ ਕਾਨੂੰਨ ਬਣਾਉਣਾ ਚਾਹੀਦਾ ਹੈ।