ਤਹਿਰਾਨ, 11 ਅਗਸਤ (ਪੋਸਟ ਬਿਊਰੋ)- ਈਰਾਨ ਨੇ ਕੱਲ੍ਹ ਆਪਣਾ ਨਵਾਂ ਏਅਰ ਡਿਫੈਂਸ ਸਿਸਟਮ ਰਿਲੀਜ਼ ਕੀਤਾ ਹੈ। ਆਪਣੇ ਦੇਸ਼ ਵਿੱਚ ਹੀ ਤਿਆਰ ਹੋਇਆ ਇਹ ਏਅਰ ਡਿਫੈਂਸ ਸਿਸਟਮ 400 ਕਿਲੋਮੀਟਰ (250 ਮੀਲ) ਦੀ ਦੂਰੀ ਤੱਕ ਮਿਜ਼ਾਈਲਾਂ ਅਤੇ ਡਰੋਨ ਦਾ ਪਤਾ ਲਾਉਣ ਦੇ ਸਮਰੱਥ ਹੈ।
ਨਿਊਜ਼ ਏਜੰਸੀ ਆਈ ਐੱਸ ਐੱਨ ਏ ਅਨੁਸਾਰ ਫਲਕ ਨਾਂਅ ਦਾ ਇਹ ਏਅਰ ਡਿਫੈਂਸ ਸਿਸਟਮ ਰੂਸ ਤੋਂ ਇੰਪੋਰਟ ਕੀਤੇ ਗਏ ਗਾਮਾ ਸਰਵਿਲਾਂਸ ਰਡਾਰ ਦਾ ਅਗਲਾ ਐਡੀਸ਼ਨ ਹੈ, ਜਿਸ ਨੂੰ ਈਰਾਨ ਵਿੱਚ ਬਣਾਇਆ ਗਿਆ ਹੈ। ਦੱਸਿਆ ਗਿਆ ਹੈ ਕਿ ਗਾਮਾ ਸਿਸਟਮ ਪੁਰਜਿਆਂ ਦੀ ਕਮੀ, ਵਿਦੇਸ਼ੀ ਇੰਜੀਨੀਅਰਾਂੇ ਦੇ ਨਾ ਮਿਲਣ ਅਤੇ ਪਾਬੰਦੀਆਂ ਲੱਗਣ ਕਾਰਨ ਅਸਮਰਥ ਹੋ ਗਿਆ ਸੀ। ਇਸ ਲਈ ਇਸ ਦਾ ਵਿਕਸਿਤ ਐਡੀਸ਼ਨ ਤਿਆਰ ਕੀਤਾ ਗਿਆ ਹੈ। ਈਰਾਨ ਦੀ ਹਵਾਈ ਫੌਜ ਦੇ ਮੁਖੀ ਬ੍ਰਿਗੇਡੀਅਰ ਜਨਰਲ ਅਲੀਰਜਾ ਸਬਾਹੀ ਫਰਡ ਨੇ ਰਿਲੀਜ ਸਮਾਗਮ ਦੌਰਾਨ ਕਿਹਾ ਕਿ ਇਹ ਡਿਫੈਂਸ ਸਿਸਟਮ 400 ਕਿਲੋਮੀਟਰ ਦੀ ਸੀਮਾ ਦੇ ਅੰਦਰ ਹਰ ਤਰ੍ਹਾਂ ਦੇ ਕਰੂਜ਼ ਮਿਜ਼ਾਈਲਾਂ, ਸਟੀਲਥ ਏਅਰਕਰਾਫਟ, ਡਰੋਨ ਸਿਸਟਮ ਤੇ ਬੈਲਿਸਟਿਕ ਮਿਜ਼ਾਈਲਾਂ ਨੂੰ ਲੱਭਣ ਦੇ ਸਮਰਥ ਹੈ। ਇਹ ਏਅਰ ਡਿਫੈਂਸ ਸਿਸਟਮ ਓਦੋਂ ਆਇਆ ਹੈ, ਜਦੋਂ ਅਮਰੀਕਾ ਅਤੇ ਈਰਾਨ ਵਿਚਾਲੇ ਤਣਾਅ ਸਿਖਰ 'ਤੇ ਹੈ। ਇਹ ਤਣਾਅ ਈਰਾਨ ਦੇ ਨਾਲ ਨਿਊਕਲੀਅਰ ਡੀਲ ਤੋਂ ਅਮਰੀਕਾ ਦੇ ਹਟਣ ਅਤੇ ਉਸ 'ਤੇ ਕਈ ਤਰ੍ਹਾਂ ਦੀਆਂ ਪਾਬੰਦੀਆਂ ਲਾਉਣ ਨਾਲ ਸ਼ੁਰੂ ਹੋਇਆ ਹੈ। ਵਿਵਾਦ ਓਦੋਂ ਹੋਰ ਵਧ ਗਿਆ, ਜਦ ਈਰਾਨ ਨੇ ਜੂਨ ਵਿੱਚ ਅਮਰੀਕੀ ਗਲੋਬਲ ਹਾਕ ਡਰੋਨ ਨੂੰ ਆਪਣੇ ਹਵਾਈ ਖੇਤਰ ਵਿੱਚ ਵੜਨ ਦੇ ਦੋਸ਼ ਵਿੱਚ ਸਤ੍ਹਾ ਤੋਂ ਮਾਰ ਕਰਨ ਵਾਲੀ ਮਿਜ਼ਾਈਲ ਨੂੰ ਮਾਰ ਦਿੱਤਾ ਸੀ ਅਤੇ ਫਿਰ ਟਕਰਾਅ ਦੇ ਕਈ ਮੌਕੇ ਆਏ ਸਨ।