ਸ਼ਾਹਤਲਾਈ, 18 ਜੁਲਾਈ (ਪੋਸਟ ਬਿਊਰੋ)- ਵਿਆਹੁਤਾ ਸੰਬੰਧਾਂ ਵਿੱਚ ਕੁੜੱਤਣ ਹਾਵੀ ਹੋ ਗਈ ਤਾਂ ਪਤਨੀ ਨੇ ਆਪਣੇ ਪਤੀ ਵੱਲੋਂ ਕਈ ਸਾਲ ਪਹਿਲਾਂ ਕੀਤੀ ਹੇਰਾਫੇਰੀ ਦਾ ਖੁਲਾਸਾ ਕਰ ਦਿੱਤਾ। ਦੋਵਾਂ ਦੀ ਕੌੜ ਦਾ ਅੰਦਾਜ਼ਾ ਇਸੇ ਗੱਲ ਤੋਂ ਲੱਗ ਜਾ ਸਕਦਾ ਹੈ ਕਿ ਪਤੀ ਦੀ ਸ਼ਿਕਾਇਤ ਕਰਨ ਲਈ ਪਤਨੀ ਨੇ ਪੁਲਸ ਦਾ ਦਰਵਾਜ਼ਾ ਖੜਕਾ ਦਿੱਤਾ ਹੈ। ਇਸ ਮਹਿਲਾ ਦੀ ਸ਼ਿਕਾਇਤ ਉਤੇ ਪੁਲਸ ਨੇ ਧੋਖਾਧੜੀ ਦਾ ਕੇਸ ਦਰਜ ਕਰ ਕੇ ਇਸ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਸ ਨਾਲ ਨਾ ਕੇਵਲ ਪਤੀ ਦੀ ਨੌਕਰੀ ਜਾ ਸਕਦੀ ਹੈ, ਉਸ ਨੂੰ ਕਾਨੂੰਨੀ ਕਾਰਵਾਈ ਦਾ ਸਾਹਮਣਾ ਵੀ ਕਰਨਾ ਪੈਣਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਝੰਡੂਤਾ ਖੇਤਰ ਦੇ ਇੱਕ ਵਿਅਕਤੀ ਦਾ ਵਿਆਹ ਮੰਡੀ ਦੇ ਨੇਰਚੌਕ ਦੀ ਲੜਕੀ ਨਾਲ ਹੋਇਆ ਸੀ। ਓਦੋਂ ਉਹ ਫੌਜ ਵਿੱਚ ਹੁੰਦਾ ਸੀ। ਵਿਆਹ ਦੇ ਬਾਅਦ ਉਸ ਨੇ ਆਪਣੀ ਪਤਨੀ ਨੂੰ ਦੱਸਿਆ ਕਿ 12ਵੀਂ ਦੀ ਪ੍ਰੀਖਿਆ ਵਿੱਚ ਉਸ ਦੀ ਕੰਪਾਰਟਮੈਂਟ ਆਈ ਸੀ। ਉਸੇ ਦੌਰਾਨ ਉਹ ਫੌਜ ਵਿੱਚ ਭਰਤੀ ਹੋਇਆ ਸੀ। ਟਰੇਨਿੰਗ ਪੀਰੀਅਡ ਹੋਣ ਕਾਰਨ ਉਹ ਕੰਪਾਰਟਮੈਂਟ ਦੀ ਪ੍ਰੀਖਿਆ ਦੇਣ ਨਹੀਂ ਆ ਸਕਿਆ ਸੀ। ਉਸ ਨੇ ਕਿਸੇ ਹੋਰ ਤੋਂ ਪੇਪਰ ਦਿਵਾਇਆ ਸੀ। ਫੌਜ ਤੋਂ ਰਿਟਾਇਰ ਹੋਣ ਪਿੱਛੋਂ ਉਸ ਨੇ ਉਸੇ ਸਰਟੀਫਿਕੇਟ ਦੇ ਆਧਾਰ 'ਤੇ ਪਟਵਾਰੀ ਦੀ ਨੌਕਰੀ ਵੀ ਲੈ ਲਈ ਸੀ।