ਰਾਂਚੀ, 18 ਜੁਲਾਈ (ਪੋਸਟ ਬਿਊਰੋ)- ਰਾਂਚੀ ਦੀ ਰਿਚਾ ਭਾਰਤੀ ਨੂੰ ਕੁਰਾਨ ਦੀਆਂ ਕਾਪੀਆਂ ਨਹੀਂ ਵੰਡਣੀਆਂ ਪੈਣਗੀਆਂ। ਅਦਾਲਤ ਨੇ ਉਸ ਦੀ ਜ਼ਮਾਨਤ ਵਾਸਤੇ ਲਈ ਇਹ ਸ਼ਰਤ ਵਾਪਸ ਲੈ ਲਈ ਹੈ।
ਕੱਲ੍ਹ ਇਸ ਕੇਸ ਦੇ ਜਾਂਚ ਅਫਸਰ (ਆਈ ਓ) ਵਿਨੋਦ ਰਾਮ ਨੇ ਸਹਾਇਕ ਸਰਕਾਰੀ ਵਕੀਲ ਮੀਨਾਕਸ਼ੀ ਕੁੰਡੂਲਨਾ ਦੇ ਰਾਹੀਂ ਜੁਡੀਸ਼ਲ ਮੈਜਿਸਟਰੇਟ ਮਨੀਸ਼ ਕੁਮਾਰ ਸਿੰਘ ਦੀ ਅਦਾਲਤ 'ਚ ਇਸ ਬਾਰੇ ਅਰਜ਼ੀ ਦੇ ਕੇ ਅਪੀਲ ਕੀਤੀ ਸੀ ਕਿ ਕੁਰਾਨ ਵੰਡਣ ਦਾ ਆਦੇਸ਼ ਵਾਪਸ ਲੈ ਲਿਆ ਜਾਵੇ। ਇਸ ਸ਼ਰਤ ਨੂੰ ਪੂਰਾ ਕਰਨ ਵਿੱਚ ਮੁਸ਼ਕਲ ਆ ਰਹੀ ਹੈ। ਸਹਾਇਕ ਸਰਕਾਰੀ ਵਕੀਲ ਨੇ ਵੀ ਇਸ ਦੀ ਹਮਾਇਤ ਕੀਤੀ। ਇਸ ਅਪੀਲ ਨੂੰ ਸਵੀਕਾਰ ਕਰਦੇ ਹੋਏ ਅਦਾਲਤ ਨੇ ਕੁਰਾਨ ਵੰਡਣ ਦੀ ਸ਼ਰਤ ਆਪਣੇ ਆਦੇਸ਼ ਤੋਂ ਹਟਾ ਲਈ ਹੈ। ਇਸ ਤੋਂ ਪਹਿਲਾਂ ਜ਼ਿਲਾ ਬਾਰ ਐਸੋਸੀਏਸ਼ਨ ਦੇ ਸਕੱਤਰ ਕੁੰਦਨ ਪ੍ਰਕਾਸ਼ਨ ਦੀ ਅਗਵਾਈ ਵਿੱਚ ਵੱਡੀ ਗਿਣਤੀ 'ਚ ਵਕੀਲਾਂ ਨੇ ਜੁਡੀਸ਼ਲ ਕਮਿਸ਼ਨਰ ਨਵਨੀਤ ਕੁਮਾਰ ਨੂੰ ਮਿਲ ਕੇ ਏਥੇ ਦੇ ਜੁਡੀਸ਼ਲ ਮੈਜਿਸਟਰੇਟ ਮਨੀਸ਼ ਕੁਮਾਰ ਸਿੰਘ ਦੇ ਤਬਾਦਲੇ ਦੀ ਮੰਗ ਕੀਤੀ ਸੀ।
ਵਰਨਣ ਯੋਗ ਹੈ ਕਿ ਬੀਤੇ ਦਿਨੀਂ ਰਾਂਚੀ ਵੂਮੈਨਸ ਕਾਲਜ ਦੀ ਵਿਦਿਆਰਥਣ ਰਿਚਾ ਨੇ ਕਿਹਾ ਸੀ, ਪ੍ਰਸਾਸਨ ਦੀ ਕਾਰਵਾਈ ਇਕ ਪਾਸੜ ਹੈ। ਅਸੀਂ ਪੋਸਟ ਨੂੰ ਸ਼ੇਅਰ ਕੀਤਾ ਸੀ। ਉਸ ਨੇ ਕਿਹਾ ਕਿ ਉਹ ਅਦਾਲਤ ਦੇ ਫੈਸਲੇ ਦੇ ਖਿਲਾਫ ਉਪਰਲੀ ਅਦਾਲਤ ਵਿੱਚ ਅਪੀਲ ਕਰਨਗੇ। ਰਿਚਾ ਨੇ ਕਿਹਾ- ਮੈਂ ਕਿਸੇ ਧਰਮ ਦਾ ਅਪਮਾਨ ਨਹੀਂ ਕੀਤਾ। ਮੈਨੂੰ ਕੁਰਾਨ ਦੀਆਂ ਕਾਪੀਆਂ ਵੰਡਣ ਲਈ ਕਿਹਾ ਗਿਆ ਹੈ, ਪਰ ਇਹ ਮੇਰੇ ਮੌਲਿਕ ਅਧਿਕਾਰ ਦੀ ਉਲੰਘਣਾ ਹੈ।