ਭਿਲਾਈ, 9 ਅਕਤੂਬਰ, (ਪੋਸਟ ਬਿਊਰੋ)- ਛੱਤੀਸਗੜ੍ਹ ਦੇ ਭਿਲਾਈ ਸਟੀਲ ਪਲਾਂਟ ਵਿਚ ਅੱਜ ਮੰਗਲਵਾਰ ਸਵੇਰੇ ਗੈਸ ਪਾਈਪ ਲਾਈਨ ਫਟਣ ਨਾਲ ਹੋਏ ਧਮਾਕੇ ਵਿਚ 13 ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਵਕਤ ਉਥੇ ਲਗਪਗ 30 ਮੁਲਾਜ਼ਮ ਕੰਮ ਕਰ ਰਹੇ ਸਨ। ਗੰਭੀਰ ਜ਼ਖ਼ਮੀ 15 ਲੋਕਾਂ ਨੂੰ ਭਿਲਾਈ ਦੇ ਹਸਪਤਾਲ ਵਿਚ ਦਾਖ਼ਲ ਕਰਾਇਆ ਗਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸਵੇਰੇ ਪਲਾਂਟ ਦੇ ਕੋਕ ਓਵਨ ਦੇ ਬੈਟਰੀ ਨੰਬਰ 11 ਵਿਚ ਕੰਮ ਚੱਲ ਰਿਹਾ ਸੀ। ਇਸ ਦੌਰਾਨ ਪਾਈਪ ਲਾਈਨ ਵਿਚ ਅਚਾਨਕ ਧਮਾਕਾ ਹੋਇਆ ਤੇ ਫਿਰ ਅੱਗ ਲੱਗ ਗਈ। ਇਸ ਨਾਲ ਉਥੇ ਹਫੜਾ-ਤਫੜੀ ਮੱਚ ਗਈ। ਫਾਇਰ ਬ੍ਰਿਗੇਡ ਮੌਕੇ `ਤੇ ਆਈ, ਪਰ ਅੱਗ ਦੀਆਂ ਲਪਟਾਂ ਇੰਨੀਆਂ ਤੇਜ਼ ਸਨ ਕਿ ਇਸ ਉੱਤੇ ਕਾਬੂ ਪਾਉਣ ਲਈ ਫਾਇਰ ਬ੍ਰਿਗੇਡ ਮੁਲਾਜ਼ਮਾਂ ਨੂੰ ਕਾਫ਼ੀ ਮੁਸ਼ੱਕਤ ਕਰਨੀ ਪਈ। ਘਟਨਾ ਦੀ ਸੂਚਨਾ ਮਿਲਦੇ ਸਾਰ ਆਈ ਜੀ, ਜੀ ਪੀ ਸਿੰਘ ਅਤੇ ਐੱਸ ਪੀ ਡਾ. ਸੰਜੀਵ ਸ਼ੁਕਲਾ ਮੌਕੇ `ਤੇ ਪੁੱਜੇ। ਸੀ ਆਈ ਐੱਸ ਐੱਫ ਅਤੇ ਪੁਲਿਸ ਨੇ ਘਟਨਾ ਪਿੱਛੋਂ ਪੂਰਾ ਇਲਾਕਾ ਸੀਲ ਕਰ ਦਿੱਤਾ ਹੈ। ਇਸ ਹਾਦਸੇ ਦਾ ਕਾਰਨ ਪਲਾਂਟ ਦਾ ਪੁਰਾਣਾ ਢਾਂਚਾ ਦੱਸਿਆ ਗਿਆ ਹੈ। ਪਲਾਂਟ ਵਿਚ ਲੰਬੇ ਸਮੇਂ ਤੋਂ ਛੋਟੀਆਂ-ਮੋਟੀਆਂ ਘਟਨਾਵਾਂ ਵਾਪਰ ਰਹੀਆਂ ਸਨ, ਪ੍ਰੰਤੂ ਪ੍ਰਬੰਧਕ ਇਸ ਨੂੰ ਨਜ਼ਰ ਅੰਦਾਜ਼ ਕਰ ਰਹੇ ਸਨ।
ਵਰਨਣ ਯੋਗ ਹੈ ਕਿ ਸਾਲ 2007 ਵਿੱਚ ਪਲਾਂਟ ਦੇ ਆਧੁਨਿਕੀਕਰਨ ਲਈ 18 ਹਜ਼ਾਰ ਕਰੋੜ ਰੁਪਏ ਦੀ ਯੋਜਨਾ ਮਨਜ਼ੂਰ ਕੀਤੀ ਗਈ ਸੀ, ਜਿਸ ਨੂੰ ਅੱਜ ਤਕ ਵੀ ਪੂਰਾ ਨਹੀਂ ਕੀਤਾ ਗਿਆ। ਇਸ ਵਿੱਚ ਧੋਖਾਦੇਹੀ ਦੇ ਵੀ ਦੋਸ਼ ਲੱਗੇ ਸਨ, ਪਰ ਮਾਮਲਾ ਦੱਬ ਗਿਆ ਸੀ। ਸਾਲ 2015 ਤੋਂ 2018 ਤਕ 25 ਮਜ਼ਦੂਰ ਇਥੇ ਕੰਮ ਦੌਰਾਨ ਮਾਰੇ ਜਾ ਚੁੱਕੇ ਹਨ।