ਬੈਂਕਾਕ, 9 ਅਕਤੂਬਰ (ਪੋਸਟ ਬਿਊਰੋ)- ਥਾਈਲੈਂਡ ਵਿੱਚ ਦੋ ਵਿਰੋਧੀ ਗਿਰੋਹਾਂ ਦੀ ਗੋਲੀਬਾਰੀ ਵਿੱਚ 42 ਸਾਲਾ ਇੱਕ ਭਾਰਤੀ ਸਮੇਤ ਦੋ ਸੈਲਾਨੀਆਂ ਦੀ ਮੌਤ ਹੋ ਗਈ, ਜਦ ਕਿ ਪੰਜ ਹੋਰ ਲੋਕਾਂ ਗੰਭੀਰ ਜ਼ਖਮੀ ਹੋ ਗਏ।
ਗੋਲੀਬਾਰੀ ਦੀ ਇਹ ਘਟਨਾ ਐਤਵਾਰ ਰਾਤ ਨੂੰ ਸੇਂਟਾਰਾ ਵਾਟਰਗੇਟ ਪੈਵੇਲੀਅਨ ਹੋਟਲ ਦੇ ਪਿੱਛੇ ਇੱਕ ਗਲੀ ਵਿੱਚ ਹੋਈ। ਉਥੇ ਸੈਲਾਨੀਆਂ ਦੀ ਬਸ ਪਾਰਕ ਸੀ। ਘਟਨਾ ਵਿੱਚ ਜੀ. ਧੀਰਜ ਨਾਂਅ ਦੇ ਭਾਰਤੀ ਤੇ ਲਾਓਸ ਦੇ ਇੱਕ ਸੈਲਾਨੀ ਦੀ ਮੌਤ ਹੋ ਗਈ ਅਤੇ ਪੰਜ ਵਿਅਕਤੀ ਜ਼ਖਮੀ ਹੋਏ ਸਨ ਜਿਨ੍ਹਾਂ ਵਿੱਚ ਦੋ ਥਾਈਲੈਂਡ ਦੇ ਰਹਿਣ ਵਾਲੇ, ਦੋ ਭਾਰਤੀ ਅਤੇ ਇੱਕ ਲਾਓਸ ਦਾ ਸੈਲਾਨੀ ਸੀ। ਭਾਰਤੀ ਉਨ੍ਹਾਂ ਸੈਲਾਨੀਆਂ ਦੇ ਇੱਕ ਗਰੁੱਪ ਦਾ ਹਿੱਸਾ ਸੀ, ਜਿਨ੍ਹਾਂ ਨੇ ਮਾਲ ਵਿੱਚ ਇੱਕ ਭਾਰਤੀ ਰੈਸਟੋਰੈਂਟ ਵਿੱਚ ਭੋਜਨ ਕੀਤਾ ਸੀ ਅਤੇ ਉਸ ਦੇ ਬਾਅਦ ਪਾਰਕਿੰਗ ਵਿੱਚ ਆਪਣੀ ਬਸ ਦੀ ਉਡੀਕ ਕਰ ਰਹੇ ਸਨ।
ਮੇਜਰ ਜਨਰਲ ਸੈਨਿਟ ਸਮਾਰਾਰਨ ਨੇ ਦੱਸਿਆ ਕਿ ਜਦ ਉਹ ਲੋਕ ਬਸ ਦੀ ਉਡੀਕ ਕਰ ਰਹੇ ਸਨ ਤਾਂ ਦੋ ਗਰੁੱਪ ਨੇੜੇ ਦੇ ਸਨੂਕਰ ਕਲੱਬ ਤੋਂ ਬਾਹਰ ਆਏ ਤੇ ਉਨ੍ਹਾਂ ਦੀ ਲੜਾਈ ਸ਼ੁਰੂ ਹੋ ਗਈ। ਉਨ੍ਹਾਂ ਲੋਕਾਂ ਨੇ ਹਥਿਆਰ ਕੱਢ ਲਏ। ਇੱਕ ਰਾਹਗੀਰ ਨੇ ਦੱਸਿਆ ਕਿ ਕਰੀਬ 20 ਲੋਕ ਹੱਥਾਂ ਵਿੱਚ ਪਿਸਤੌਲਾਂ, ਚਾਕੂ ਅਤੇ ਡੰਡੇ ਫੜੀ ਕਲੱਬ 'ਚੋਂ ਗਲੀ ਵੱਲ ਭੱਜੇ। ਤਿੰਨ ਜਣਿਆਂ ਨੇ ਗੋਲੀਬਾਰੀ ਵੀ ਕੀਤੀ, ਪਰ ਪੁਲਸ ਦੇ ਆਉਂਦੇ ਹੀ ਉਹ ਲੋਕ ਉਥੋਂ ਭੱਜ ਨਿਕਲੇ।