ਲੰਡਨ, 9 ਅਕਤੂਬਰ (ਪੋਸਟ ਬਿਊਰੋ)- ਇੰਗਲੈਂਡ 'ਚ ਬੀਤੇ ਦੋ ਦਹਾਕਿਆਂ 'ਚ ਘਰਾਂ ਦੀਆਂ ਕੀਮਤਾਂ 173 ਫੀਸਦੀ ਵਧੀਆਂ ਹਨ, ਜਦ ਕਿ ਇਸੇ ਸਮੇਂ 'ਚ 25 ਤੋਂ 35 ਸਾਲ ਦੀ ਉਮਰ ਦੇ ਲੋਕਾਂ ਦੀਆਂ ਤਨਖਾਹਾਂ 'ਚ ਸਿਰਫ 19 ਫੀਸਦੀ ਦਾ ਵਾਧਾ ਹੋਇਆ ਹੈ ਅਤੇ ਇਸ ਬਾਰੇ ਸਮਾਜ ਸੋਚ ਰਿਹਾ ਹੈ।
ਇਕ ਤਾਜ਼ਾ ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ 40 ਫੀਸਦੀ ਨੌਜਵਾਨ ਆਪਣੇ ਇਲਾਕੇ 'ਚ ਸਸਤੇ ਤੋਂ ਸਸਤਾ ਘਰ ਖਰੀਦਣ ਤੋਂ ਅਸਮਰੱਥ ਹਨ। 1996 'ਚ ਬਿਆਨਾ ਰੱਖ ਕੇ ਆਪਣੀ ਤਨਖਾਹ ਦੇ ਸਾਢੇ ਚਾਰ ਗੁਣਾ ਵੱਧ ਕਰਜ਼ਾ ਲੈ ਕੇ 93 ਫੀਸਦੀ ਲੋਕ ਆਪਣਾ ਘਰ ਖਰੀਦ ਸਕਦੇ ਸਨ, ਜਦ ਕਿ 2016 'ਚ ਸਿਰਫ 61 ਫੀਸਦੀ ਲੋਕ ਹੀ ਅਜਿਹਾ ਕਰ ਸਕਦੇ ਹਨ। ਆਈ ਐਫ ਐਸ ਨੇ ਕਿਹਾ ਹੈ ਕਿ ਘਰਾਂ ਦਾ ਕਿਰਾਇਆ ਬਹੁਤ ਵੱਧ ਹੈ, ਇੰਗਲੈਂਡ 'ਚ ਅੰਦਾਜ਼ਨ 140 ਤੋਂ 200 ਪੌਂਡ ਪ੍ਰਤੀ ਹਫਤਾ ਕਿਰਾਇਆ ਅਦਾ ਕੀਤਾ ਜਾਂਦਾ ਹੈ। ਨੌਜਵਾਨਾਂ ਨੂੰ ਬੱਚਤ ਕਰਨ ਲਈ ਮੁਸ਼ਕਿਲ ਹੋ ਰਹੀ ਹੈ। 1998 'ਚ 25 ਤੋਂ 34 ਸਾਲ ਦੀ ਉਮਰ ਦੇ 35 ਫੀਸਦੀ ਲੋਕਾਂ ਕੋਲ ਆਪਣੇ ਘਰ ਸਨ। ਸਰਕਾਰੀ ਨੀਤੀਆਂ ਅਨੁਸਾਰ ਹਰ ਸਾਲ 88000 ਪਰਵਾਰਾਂ ਨੂੰ ਘਰਾਂ ਦਾ ਭੱਤਾ ਦਿੱਤਾ ਜਾਂਦਾ ਹੈ, ਜਿਸ ਨਾਲ ਖਜ਼ਾਨੇ 'ਤੇ ਲਗਭਗ 1.32 ਬਿਲੀਅਨ ਪੌਂਡ ਦਾ ਬੋਝ ਪੈਂਦਾ ਹੈ। ਬ੍ਰਿਟੇਨ 'ਚ 65 ਤੋਂ 74 ਸਾਲ ਦੀ ਉਮਰ ਦੇ ਲੋਕਾਂ ਕੋਲ ਆਪਣੇ ਘਰਾਂ ਦੀ ਦਰ 'ਚ 80 ਫੀਸਦੀ ਵਧੀ ਹੈ।