ਜਲੰਧਰ, 21 ਜੂਨ (ਪੋਸਟ ਬਿਊਰੋ)- ਰਸਤਾ ਮੁਹੱਲਾ ਵਿੱਚ ਰਹਿੰਦੀ ਔਰਤ ਚਾਂਦੀ ਆਪਣੇ ਘਰ ਵਿੱਚ ਬਣੇ ਹੋਏ ਮੰਦਰ ਵਿੱਚ ਭਗਵਾਨ ਦੇ ਪੈਰਾਂ ਦੇ ਹੇਠਾਂ ਸ਼ਰਾਬ ਲੁਕਾ ਕੇ ਰੱਖਦੀ ਤੇ ਇਸ ਦੀ ਤਸਕਰੀ ਕਰਦੀ ਸੀ। ਪੁਲਸ ਨੂੰ ਇਸ ਦੀ ਭਣਕ ਲੱਗੀ ਤਾਂ ਉਨ੍ਹਾਂ ਨੇ ਰੇਡ ਕਰ ਕੇ ਮੂਰਤੀਆਂ ਥੱਲੇ ਜ਼ਮੀਨ ਵਿੱਚ ਦਬਾ ਕੇ ਰੱਖੀਆਂ 28 ਬੋਤਲਾਂ ਸ਼ਰਾਬ ਬਰਾਮਦ ਕੀਤੀਆਂ ਹਨ, ਪਰ ਚਾਂਦੀ ਆਪਣੇ ਪਰਵਾਰ ਸਮੇਤ ਗਾਇਬ ਹੋ ਗਈ ਹੈ। ਪੁਲਸ ਨੇ ਚਾਂਦੀ, ਉਸ ਦੇ ਪਤੀ ਸ਼ਾਮ ਲਾਲ ਅਤੇ ਬੇਟੇ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ।
ਥਾਣਾ ਤਿੰਨ ਦੇ ਮੁਖੀ ਭਾਰਤ ਭੂਸ਼ਣ ਨੇ ਦੱਸਿਆ ਕਿ ਸ਼ਰਾਬ ਤਸਕਰੀ ਦੀ ਗੁਪਤ ਸੂਚਨਾ ਉੱਤੇ ਉਨ੍ਹਾਂ ਨੇ ਚਾਂਦੀ ਦੇ ਘਰ ਰੇਡ ਕੀਤੀ, ਪ੍ਰੰਤੂ ਉਸ ਨੂੰ ਛਾਪੇ ਦੀ ਭਣਕ ਪਹਿਲਾਂ ਹੀ ਲੱਗ ਜਾਣ ਕਾਰਨ ਉਹ ਪਰਵਾਰ ਸਣੇ ਫਰਾਰ ਹੋ ਗਈ। ਪੁਲਸ ਨੂੰ ਉਸ ਦੇ ਘਰ 'ਤੇ ਤਲਾਸ਼ੀ ਵਿੱਚ ਕੁਝ ਨਹੀਂ ਮਿਲਿਆ। ਇਸੇ ਦੌਰਾਨ ਘਰ ਵਿੱਚ ਬਣੇ ਮੰਦਰ ਦੀਆਂ ਮੂਰਤੀਆਂ ਥੱਲੇ ਫਰਸ਼ ਦੀ ਬਨਾਵਟ ਵਿੱਚ ਕੁਝ ਫਰਕ ਨਜ਼ਰ ਆਇਆ ਤਾਂ ਪੁਲਸ ਨੇ ਉਥੋਂ ਟਾਈਲਾਂ ਨੂੰ ਥੋੜ੍ਹਾ ਹਿਲਾਇਆ ਤਾਂ ਉਹ ਵੱਖ ਹੋ ਗਈਆਂ। ਮੰਦਰ ਥੱਲੇ ਪੁਲਸ ਨੂੰ 28 ਬੋਤਲਾਂ ਨਾਜਾਇਜ਼ ਸ਼ਰਾਬ ਦੀਆਂ ਮਿਲੀਆਂ। ਇੰਸਪੈਕਟਰ ਭਾਰਤ ਭੂਸ਼ਣ ਨੇ ਦੱਸਿਆ ਕਿ ਚਾਂਦੀ ਤੇ ਉਸ ਦੇ ਪਰਵਾਰ ਉੱਤੇ ਕੇਸ ਦਰਜ ਕਰ ਕੇ ਉਨ੍ਹਾਂ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਗਈ ਹੈ।