ਨਵੀਂ ਦਿੱਲੀ, 20 ਜੂਨ (ਪੋਸਟ ਬਿਊਰੋ)- ਸਿੱਖਿਆ ਖੇਤਰ 'ਚ ਸੁਧਾਰ ਦੇ ਬਾਵਜੂਦ ਭਾਰਤ ਦੀ ਕੋਈ ਯੂਨੀਵਰਸਿਟੀ ਵੀ ‘ਵਿਸ਼ਵ ਯੂਨੀਵਰਸਿਟੀ ਰੈਂਕਿੰਗ' ਦੀ ਸੂਚੀ ਵਿੱਚ ਟਾਪ-100 ਯੂਨੀਵਰਸਿਟੀਆਂ 'ਚ ਥਾਂ ਬਣਾਉਣ 'ਚ ਕਾਮਯਾਬ ਨਹੀਂ ਹੋ ਸਕੀ। ਭਾਰਤ ਦੀਆਂ ਵੱਡੀਆਂ ਸਿੱਖਿਆ ਸੰਸਥਾਵਾਂ’ ਆਈ ਆਈ ਟੀ ਬੰਬੇ, ਆਈ ਆਈ ਟੀ ਦਿੱਲੀ, ਆਈ ਆਈ ਐਸ ਸੀ ਬੈਂਗਲੁਰੂ ਆਦਿ ਨੇ ਵਿਸ਼ਵ ਯੂਨੀਵਰਸਿਟੀਆਂ ਦੀ ਰੈਂਕਿੰਗ ਦੇ ਟਾਪ-200 ਵਿੱਚ ਥਾਂ ਬਣਾਈ ਹੈ।
ਵਿਸ਼ਵ ਰੈਂਕਿੰਗ 'ਚ ਆਈ ਆਈ ਬੰਬੇ ਲਗਾਤਾਰ ਦੂਸਰੀ ਵਾਰ ਦੇਸ਼ ਦੀ ਟਾਪ ਸੰਸਥਾ ਬਣੀ ਹੈ। ਇਸ ਨੇ ਵਿਸ਼ਵ ਸੂਚੀ ਵਿੱਚ 10 ਅੰਕਾਂ ਦੀ ਛਾਲ ਲਾ ਕੇ 162ਵੇਂ ਤੋਂ ਬਦਲ ਕੇ 152ਵਾਂ ਸਥਾਨ ਹਾਸਲ ਕੀਤਾ ਹੈ। ਵਿਸ਼ਵ ਯੂਨੀਵਰਸਿਟੀ ਰੈਂਕਿੰਗ ਵਿੱਚ ਆਈ ਆਈ ਟੀ ਦਿੱਲੀ, ਕਾਨਪੁਰ, ਰੁੜਕੀ, ਖੜਗਪੁਰ ਦੀ ਰੈਂਕਿੰਗ 'ਚ ਗਿਰਾਵਟ ਆਈ ਹੈ। ਆਈ ਆਈ ਐਸ ਸੀ ਬੈਂਗਲੁਰੂ ਦੀ ਓਵਰਆਲ ਰੈਂਕਿੰਗ 'ਚ ਲਗਾਤਾਰ ਗਿਰਾਵਟ ਹੈ, ਪਰ ਖੋਜ ਦੇ ਖੇਤਰ ਵਿੱਚ ਇਸ ਰੈਂਕਿੰਗ 'ਚ ਉਸ ਦਾ ਦੁਨੀਆ ਵਿੱਚ ਦੂਸਰਾ ਸਥਾਨ ਹੈ। ਵਿਸ਼ਵ ਯੂਨੀਵਰਸਿਟੀ ਰੈਂਕਿੰਗ ਵਿੱਚ ਭਾਰਤ ਦੀਆਂ 23 ਸੰਸਥਾਵਾਂ ਨੂੰ ਥਾਂ ਮਿਲੀ ਹੈ। ਆਈ ਆਈ ਟੀ ਦਿੱਲੀ ਨੇ 182ਵਾਂ ਅਤੇ ਆਈ ਆਈ ਐਸ ਸੀ ਬੈਂਗਲੁਰੂ ਨੇ 184ਵਾਂ ਸਥਾਨ ਹਾਸਲ ਕੀਤਾ ਹੈ। ਇਸ ਤੋਂ ਪਿਛਲੇ ਸਾਲ ਦੀ ਤੁਲਨਾ 'ਚ 23 ਭਾਰਤੀ ਸਿੱਖਿਆ ਸੰਸਥਾਵਾਂ ਨੇ ਵਿਸ਼ਵ ਰੈਂਕਿੰਗ 'ਚ ਸੁਧਾਰ ਕੀਤਾ ਹੈ।