ਕੰਗਨਾ ਰਣੌਤ ਨੇ ਆਪਣੀ ਚਿਰਾਂ ਤੋਂ ਉਡੀਕੀ ਜਾ ਰਹੀ ਫਿਲਮ ‘ਮਣੀਕਰਣਿਕਾ’ ਦੇ ਕੁਝ ਹਿੱਸਿਆਂ ਦੀ ਸ਼ੂਟਿੰਗ ਦੁਬਾਰਾ ਸ਼ੁਰੂ ਕਰ ਦਿੱਤੀ ਹੈ ਅਤੇ ਇਸ ਵਾਰ ਨਿਰਦੇਸ਼ਨ ਦੀ ਕਮਾਨ ਉਸ ਦੇ ਹੱਥਾਂ 'ਚ ਹੈ।
ਹੁਣੇ ਜਿਹੇ ਫਿਲਮ ਲਈ ਕੰਗਨਾ ਤੇ ਜੀਸ਼ੂ ਸੇਨਗੁਪਤਾ 'ਤੇ ਇੱਕ ਰੋਮਾਂਟਿਕ ਗੀਤ ਫਿਲਮਾਇਆ ਗਿਆ ਹੈ। ਗੀਤ ਦੀ ਪੂਰੀ ਸ਼ੂਟਿੰਗ ਇੱਕ ਹੀ ਦਿਨ ਵਿੱਚ ਨਿਪਟਾ ਲਈ ਗਈ, ਜਿਸ ਨੂੰ ਸਰੋਜ ਖਾਨ ਨੇ ਕੋਰੀਓਗਰਾਫ ਕੀਤਾ ਹੈ। ਇਸ ਤੋਂ ਪਹਿਲਾਂ ਫਿਲਮ ‘ਤਨੂ ਵੈਡਸ ਮਨੂ’ ਸੀਰੀਜ਼ ਦੀਆਂ ਫਿਲਮਾਂ 'ਚ ਵੀ ਸਰੋਜ ਨਾਲ ਕੰਗਨਾ ਕੰਮ ਕਰ ਚੁੱਕੀ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਗੀਤ ਦੀ ਸ਼ੂਟਿੰਗ ਤੋਂ ਪਹਿਲਾਂ ਕਲਾਕਾਰਾਂ ਨੇ ਇੱਕ ਹਫਤੇ ਤੱਕ ਇਸ ਦੀ ਰਿਹਰਸਲ ਕੀਤੀ ਸੀ। ਫਿਰ ਵੀ ਇੱਕ ਦਿਨ ਵਿੱਚ ਇਸ ਦੀ ਸ਼ੂਟਿੰਗ ਪੂਰੀ ਕਰਨਾ ਇੱਕ ਵੱਡਾ ਚੈਲੇਂਜ ਸੀ ਕਿਉਂਕਿ ਫਿਲਮ ਦੇ ਹੋਰ ਸੀਨਜ਼ ਦੀ ਹੀ ਤਰ੍ਹਾਂ ਇਸ ਨੂੰ ਵੀ ਇੱਕ ਸ਼ਾਨਦਾਰ ਸੈੱਟ 'ਤੇ ਫਿਲਮਾਇਆ ਜਾਣਾ ਸੀ।
ਗੀਤ ਦੀ ਸ਼ੂਟਿੰਗ ਅੱਧੀ ਰਾਤ ਤੋਂ ਬਾਅਦ ਜਾ ਕੇ ਪੂਰੀ ਹੋਈ, ਜਿਸ ਲਈ ਕੰਗਨਾ, ਸਰੋਜ, ਜੀਸ਼ੂ ਤੇ ਪੂਰੀ ਟੀਮ ਨੇ ਖੂਬ ਮਿਹਨਤ ਕੀਤੀ ਸੀ ਅਤੇ ਉਹ ਸਾਰੇ ਖੁਸ਼ ਹਨ ਕਿ ਸਭ ਕੁਝ ਚੰਗੀ ਤਰ੍ਹਾਂ ਨਾਲ ਸਮੇਂ 'ਤੇ ਹੋ ਗਿਆ। ਇਸ ਗੀਤ ਲਈ ਇੱਕ ਲਾਇਬਰੇਰੀ ਵੀ ਬਣਾਈ ਗਈ ਸੀ ਕਿਉਂਕਿ ਰਾਜਾ ਗੰਗਾਧਰ ਰਾਓ (ਰਾਣੀ ਲਕਸ਼ਮੀ ਬਾਈ ਦੇ ਪਤੀ ਜਿਸ ਦੀ ਭੂਮਿਕਾ ਜੀਸ਼ੂ ਸੇਨਗੁਪਤਾ ਨਿਭਾਅ ਰਿਹਾ ਹੈ) ਕੋਲ ਉਸ ਸਮੇਂ ਏਸ਼ੀਆ ਦੀਆਂ ਤੋਂ ਵੱਡੀਆਂ ਲਾਇਬਰੇਰੀਆਂ 'ਚੋਂ ਇੱਕ ਲਾਇਬਰੇਰੀ ਸੀ।