-ਆਨਲਾਈਨ ਧਮਕੀਆਂ ਮਿਲਣ ਬਾਅਦ ਬੋਰਡ ‘ਤੇ ਚੁੱਪ ਰਹਿਣ ਦਾ ਲਾਇਆ ਦੋਸ਼
ਓਟਵਾ, 4 ਜੂਨ (ਪੋਸਟ ਬਿਊਰੋ): ਓਟਵਾ ਦੇ ਸਭ ਤੋਂ ਵੱਡੇ ਸਕੂਲ ਬੋਰਡ ਲਈ ਟਰੱਸਟੀ ਡਾ. ਨੀਲੀ ਕਪਲਾਨ-ਮਿਰਥ ਨੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਮੰਗਲਵਾਰ ਰਾਤ ਓਟਾਵਾ-ਕਾਰਲੇਟਨ ਡਿਸਟ੍ਰਿਕਟ ਸਕੂਲ ਬੋਰਡ ਦੀ ਮੀਟਿੰਗ ਦੀ ਸਮਾਪਤੀ 'ਤੇ ਬੋਲਦੇ ਹੋਏ, ਕਪਲਾਨ-ਮਿਰਥ ਨੇ ਆਪਣਾ ਅਸਤੀਫਾ ਪੱਤਰ ਪੜ੍ਹਿਆ, ਜਿਸ ਵਿੱਚ ਕਿਹਾ ਗਿਆ ਕਿ ਉਸਨੂੰ ਉਸਦੇ ਕਾਰਜਕਾਲ ਦੌਰਾਨ ਇੱਕ ਪ੍ਰਗਤੀਸ਼ੀਲ ਟਰੱਸਟੀ ਵਜੋਂ ਨਿਸ਼ਾਨਾ ਬਣਾਇਆ ਗਿਆ ਸੀ ਅਤੇ ਬੋਰਡ 'ਤੇ ਵਿਗਾੜ ਨੂੰ ਉਤਸ਼ਾਹਿਤ ਕਰਨ ਦਾ ਦੋਸ਼ ਲਾਇਆ। ਉਨ੍ਹਾਂ ਕਿਹਾ ਕਿ ਉਹ ਬੋਰਡ ਦੇ ਬਾਹਰੋਂ ਅਤੇ ਅੰਦਰੋਂ ਵੀ ਟੌਕਸੀਸਿਟੀ (ਜ਼ਹਿਰੀਲੇਪਣ) ਕਾਰਨ ਅਸਤੀਫਾ ਦੇ ਰਹੇ ਹਨ। ਕਪਲਾਨ-ਮਿਰਥ, ਇੱਕ ਸਥਾਨਕ ਪਰਿਵਾਰਕ ਡਾਕਟਰ, ਸੋਸ਼ਲ ਮੀਡੀਆ 'ਤੇ ਸਪੱਸ਼ਟ ਬੋਲਦੇ ਰਹੇ ਹਨ ਅਤੇ 2022 ਦੀਆਂ ਮਿਉਂਸਪਲ ਚੋਣਾਂ ਵਿੱਚ ਜ਼ੋਨ 9 ਦੀ ਸੇਵਾ ਲਈ ਚੁਣੇ ਜਾਣ ਤੋਂ ਬਾਅਦ ਵਿਵਾਦ `ਚ ਰਹੇ ਹਨ।
ਉਨ੍ਹਾਂ ਨੇ ਹੋਰ ਬੋਰਡ ਮੈਂਬਰਾਂ 'ਤੇ ਮਾਸਕ ਹੁਕਮਾਂ ਦਾ ਪ੍ਰਚਾਰ ਅਤੇ ਪ੍ਰਗਤੀਸ਼ੀਲ ਕਾਰਨਾਂ ਦੀ ਵਕਾਲਤ ਕਰਦਿਆਂ ਆਨਲਾਈਨ ਨਫ਼ਰਤ ਅਤੇ ਧਮਕੀ ਭਰੇ ਸੁਨੇਹੇ ਪ੍ਰਾਪਤ ਕਰਨ 'ਤੇ ਚੁੱਪ ਰਹਿਣ ਦਾ ਦੋਸ਼ ਲਾਇਆ ਹੈ। ਉਹ ਇੱਕ ਯਹੂਦੀ ਵਜੋਂ ਆਨਲਾਈਨ ਅਤੇ ਵਿਅਕਤੀਗਤ ਤੌਰ 'ਤੇ ਨਸਲਵਾਦੀ ਅਤੇ ਲਿੰਗਵਾਦੀ ਟਿੱਪਣੀਆਂ ਦਾ ਨਿਸ਼ਾਨਾ ਰਹੇ ਹਨ। ਨਵੰਬਰ 2022 ਵਿੱਚ, ਉਨ੍ਹਾਂ ਸਕੂਲਾਂ ਵਿੱਚ ਲਾਜ਼ਮੀ ਮਾਸਕ ਹੁਕਮ ਦੀ ਮੰਗ ਕਰਦਿਆਂ ਇੱਕ ਪ੍ਰਸਤਾਵ ਪੇਸ਼ ਕੀਤਾ, ਜਿਸ ਨਾਲ ਮਾਪਿਆਂ ਵੱਲੋਂ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੀਆਂ ਗਤੀਵਿਧੀਆਂ ਅਤੇ ਕਥਿਤ ਤੌਰ 'ਤੇ ਹੋਰ ਟਰੱਸਟੀਆਂ ਨੂੰ ਇਸ ਪ੍ਰਸਤਾਵ ਲਈ ਵੋਟਿੰਗ ਕਰਨ ਲਈ ਡਰਾਉਣ-ਧਮਕਾਉਣ ਲਈ ਵਿਵਾਦ ਪੈਦਾ ਹੋਇਆ। ਭਾਰੀ ਬਹਿਸ ਤੋਂ ਬਾਅਦ ਹੁਕਮ ਲਈ ਵੋਟ ਪਾਸ ਨਹੀਂ ਹੋਈ।
ਕਪਲਾਨ-ਮਿਰਥ ਨੇ 2023 ਵਿੱਚ ਸਕੂਲ ਬੋਰਡ ਖਿਲਾਫ ਇੱਕ ਮਨੁੱਖੀ ਅਧਿਕਾਰ ਸ਼ਿਕਾਇਤ ਦਾਇਰ ਕੀਤੀ, ਜਿਸ ਵਿੱਚ ਦਲੀਲ ਦਿੱਤੀ ਗਈ ਸੀ ਕਿ ਬੋਰਡ ਉਸਦੀਆਂ ਵਾਰ-ਵਾਰ ਸ਼ਿਕਾਇਤਾਂ ਦਾ ਹੱਲ ਕਰਨ ਵਿੱਚ ਅਸਫਲ ਰਿਹਾ ਕਿ ਉਸ ਨਾਲ ਆਨਲਾਈਨ ਅਤੇ ਵਿਅਕਤੀਗਤ ਤੌਰ 'ਤੇ ਯਹੂਦੀ ਵਿਰੋਧੀ ਵਿਵਹਾਰ ਕੀਤਾ ਗਿਆ ਸੀ। ਉਨ੍ਹਾਂ ਆਪਣੇ ਖਿਲਾਫ ਪਾਬੰਦੀਆਂ ਦੀ ਨਿਆਂਇਕ ਸਮੀਖਿਆ ਦੀ ਵੀ ਮੰਗ ਕੀਤੀ। ਉਨ੍ਹਾਂ ਦਾ ਅਸਤੀਫਾ ਬੋਰਡ ਵੱਲੋਂ ਪਿਛਲੇ ਮਹੀਨੇ ਆਪਣੀ ਵਿਵਾਦਪੂਰਨ ਐਲੀਮੈਂਟਰੀ ਪ੍ਰੋਗਰਾਮ ਸਮੀਖਿਆ ਪਾਸ ਕਰਨ ਤੋਂ ਬਾਅਦ ਆਇਆ ਹੈ, ਜਿਸਦਾ ਕਪਲਾਨ-ਮਿਰਥ ਨੇ ਵਿਰੋਧ ਕੀਤਾ ਸੀ।