ਤਿਰੁਵਨੰਤਪੁਰਮ, 8 ਅਕਤੂਬਰ (ਪੋਸਟ ਬਿਊਰੋ)- ਕੇਰਲਾ ਸਰਕਾਰ ਵੱਲੋਂ ਸ਼ਬਰੀਮਾਲਾ ਮੰਦਰ ਦੇ ਤਿੰਨ ਮੁੱਖ ਪੁਜਾਰੀਆਂ ਨਾਲ ਗੱਲ ਕਰਨ ਦੇ ਯਤਨਾਂ ਨੂੰ ਉਸ ਸਮੇਂ ਝਟਕਾ ਲੱਗਿਆ, ਜਦੋਂ ਇੱਕ ਮੁੱਖ ਪੁਜਾਰੀ ਕਾਂਡਾਰਾਰੂ ਮੋਹਨਾਰੂ ਨੇ ਕਿਹਾ ਕਿ ਵਿਚਾਰ ਵਟਾਂਦਰਾ ਕਰਨ ਦੀ ਕੋਈ ਤੁਕ ਨਹੀਂ ਹੈ। ਇਸ ਤੋਂ ਬਾਅਦ ਹਾਲਾਤ ਵਿੱਚ ਨਵਾਂ ਮੋੜ ਆ ਗਿਆ ਹੈ।
ਸੁਪਰੀਮ ਕੋਰਟ ਵੱਲੋਂ ਸ਼ਬਰੀਮਾਲਾ ਮੰਦਰ 'ਚ ਔਰਤਾਂ ਦੇ ਦਾਖਲੇ ਦਾ ਫੈਸਲਾ ਸੁਣਾਏ ਜਾਣ ਨਾਲ ਉਥੋਂ ਦੇ ਮੁੱਖ ਪੁਜਾਰੀਆਂ ਵਿੱਚ ਰੋਸ ਹੈ ਤੇ ਉਹ ਪ੍ਰਦਰਸ਼ਨ ਕਰ ਰਹੇ ਹਨ। ਭਗਵਾਨ ਅਯੱਪਾ ਮੰਦਰ ਨਾਲ ਜੁੜੇ ਪੰਡਾਲਮ ਸ਼ਾਸਕਾਂ ਨੇ ਵੀ ਇਸ ਵੇਲੇ ਗੱਲਬਾਤ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ ਕਿਉਂਕਿ ਸੀ ਪੀ ਐੱਮ ਦੀ ਅਗਵਾਈ ਹੇਠਲੀ ਖੱਬਾ ਮੋਰਚਾ ਸਰਕਾਰ ਨੇ ਸੁਪਰੀਮ ਕੋਰਟ ਦਾ ਫੈਸਲੇ ਲਾਗੂ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਦੌਰਾਨ ਭਗਵਾਨ ਅਯੱਪਾ ਦੇ ਸ਼ਰਧਾਲੂਆਂ ਨੇ ਸਦੀਆਂ ਪੁਰਾਣੀ ਰਵਾਇਤ ਨੂੰ ਬਹਾਲ ਰੱਖਣ ਦੀ ਮੰਗ ਕਰਦਿਆਂ ਸੂਬੇ ਦੇ ਕਈ ਹਿੱਸਿਆਂ 'ਚ ਪ੍ਰਦਰਸ਼ਨ ਕੀਤੇ ਹਨ। ਮੁੱਖ ਪੁਜਾਰੀ ਮੋਹਨਾਰੂ ਨੇ ਕਿਹਾ ਕਿ ਉਹ ਨਜ਼ਰਸਾਨੀ ਪਟੀਸ਼ਨ ਦਾਖਲ ਕਰਨਗੇ ਅਤੇ ਪੰਡਾਲਮ ਸ਼ਾਸਕ ਪਰਵਾਰ ਦੇ ਵਿਚਾਰ ਜਾਨਣ ਪਿੱਛੋਂ ਸਰਕਾਰੀ ਧਿਰ ਨਾਲ ਵਾਰਤਾ ਕਰਨਗੇ। ਮੁੱਖ ਪੁਜਾਰੀ ਨੇ ਸਰਕਾਰ ਵੱਲੋਂ ਸ਼ਨੀਧਾਮ 'ਚ ਪਹਿਲਾ ਪੁਲਸ ਕਰਮੀ ਤੈਨਾਤ ਕਰਨ ਦੇ ਕਦਮ ਦਾ ਵੀ ਵਿਰੋਧ ਕੀਤਾ ਹੈ।