ਨਵੀਂ ਦਿੱਲੀ, 23 ਮਈ (ਪੋਸਟ ਬਿਊਰੋ)- ਭਾਰਤੀ ਓਲੰਪਿਕ ਐਸੋਸੀਏਸ਼ਨ (ਆਈ ਓ ਏ) ਦੇ ਪ੍ਰਧਾਨ ਨਰਿੰਦਰ ਬੱਤਰਾ ਦਾ ਨਾਂ ਸੰਸਾਰ ਓਲੰਪਿਕ ਕਮੇਟੀ (ਆਈ ਓ ਸੀ) ਦੇ ਕਾਰਜਕਾਰੀ ਬੋਰਡ ਨੇ ਖੇਡਾਂ ਦੀ ਇਸ ਸਿਖਰਲੀ ਸੰਸਥਾ ਦੇ ਮੈਂਬਰ ਵਜੋਂ ਚੋਣ ਕਰਨ ਲਈ ਪੇਸ਼ ਕੀਤਾ ਹੈ। ਆਈ ਓ ਸੀ ਦੇ ਕਾਰਜਕਾਰੀ ਬੋਰਡ ਨੇ ਬੱਤਰਾ ਅਤੇ ਨੌਂ ਹੋਰ ਮੈਂਬਰਾਂ ਨੂੰ ਚੁਣਨ ਦਾ ਪ੍ਰਸਤਾਵ ਬੁੱਧਵਾਰ ਨੂੰ ਆਈ ਓ ਸੀ ਨੂੰ ਸੌਂਪਿਆ, ਜੋ ਜੂਨ ਵਿਚ ਲੁਸਾਨੇ ਵਿਚ ਮੀਟਿੰਗ ਕਰੇਗਾ।
ਇਸ ਸੰਬੰਧ ਵਿੱਚ ਆਈ ਓ ਸੀ ਨੇ ਕਿਹਾ ਕਿ 10 ਪ੍ਰਸਤਾਵਿਤ ਨਵੇਂ ਮੈਂਬਰਾਂ ਵਿਚੋਂ ਸੱਤ ਨਿੱਜੀ ਮੈਂਬਰ ਅਤੇ ਤਿੰਨ ਉਮੀਦਵਾਰ ਉਹ ਹਨ, ਜਿਹੜੇ ਰਾਸ਼ਟਰੀ ਉਲੰਪਿਕ ਕਮੇਟੀ ਜਾਂ ਰਾਸ਼ਟਰੀ ਉਲੰਪਿਕ ਕਮੇਟੀ ਦੀ ਐਸੋਸੀਏਸ਼ਨ ਦੇ ਪ੍ਰਬੰਧ ਨਾਲ ਜੁੜੇ ਹਨ। ਇਸ ਸੀਟ ਲਈ ਵੋਟਿੰਗ 26 ਜੂਨ ਨੂੰ ਹੋਵੇਗੀ। ਬੱਤਰਾ ਉਨ੍ਹਾਂ ਤਿੰਨ ਲੋਕਾਂ ਵਿਚ ਸ਼ਾਮਲ ਹਨ ਜਿਨ੍ਹਾਂ ਨੂੰ ਰਾਸ਼ਟਰੀ ਉਲੰਪਿਕ ਕਮੇਟੀ ਦੇ ਪ੍ਰਬੰਧ ਨਾਲ ਜੁੜੇ ਹੋਣ ਕਾਰਨ ਚੁਣਿਆ ਗਿਆ। ਉਨ੍ਹਾਂ ਨੂੰ ਰਾਸ਼ਟਰੀ ਉਲੰਪਿਕ ਕਮੇਟੀਆਂ ਦੀ ਐਸੋਸੀਏਸ਼ਨ ਨਾਲ ਸਲਾਹ ਪਿੱਛੋਂ ਚੁਣਿਆ ਗਿਆ। ਆਈ ਓ ਸੀ ਨੇ ਕਿਹਾ ਕਿ 10 ਨਵੇਂ ਮੈਂਬਰਾਂ ਦੇ ਸ਼ਾਮਲ ਹੋਣ ਨਾਲ ਆਈ ਓ ਸੀ ਮੈਂਬਰਾਂ ਦੀ ਕੁੱਲ ਗਿਣਤੀ 105 ਹੋ ਜਾਵੇਗੀ। ਬੱਤਰਾ ਦੀ ਚੋਣ ਨਾਲ ਆਈ ਓ ਸੀ ਦੇ ਸਰਗਰਮ ਮੈਂਬਰ ਵਜੋਂ ਭਾਰਤੀਆਂ ਦੀ ਗਿਣਤੀ ਦੋ ਹੋ ਜਾਏਗੀ। ਰਿਲਾਇੰਸ ਫਾਊਂਡੇਸ਼ਨ ਦੀ ਪ੍ਰਧਾਨ ਨੀਤਾ ਅੰਬਾਨੀ ਨੂੰ 2016 ਵਿਚ ਆਈ ਓ ਸੀ ਦਾ ਨਿੱਜੀ ਮੈਂਬਰ ਚੁਣਿਆ ਗਿਆ ਸੀ। ਇਸ ਸੀਟ ਉੱਤੇ ਚੁਣੇ ਜਾਣ ਵਾਲੀ ਉਹ ਪਹਿਲੀ ਭਾਰਤੀ ਔਰਤ ਹੈ। ਆਈ ਓ ਏ ਦੇ ਨਿੱਜੀ ਮੈਂਬਰ ਵਜੋਂ ਬੱਤਰਾ ਦਾ ਨਾਂ ਪੇਸ਼ ਹੋਣ ਤੋਂ ਪਹਿਲਾਂ ਉਹ ਲੰਬੇ ਸਮੇਂ ਤਕ ਹਾਕੀ ਇੰਡੀਆ ਦੇ ਪ੍ਰਧਾਨ ਰਹੇ ਹਨ।