ਸਟਾਕਹੋਮ, 4 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕੀ ਸਾਇੰਸਦਾਨਾਂ ਫਾਂਸਿਸ ਐਰਨਾਲਡ, ਜਾਰਜ ਸਮਿਥ ਤੇ ਬ੍ਰਿਟੇਨ ਦੇ ਖੋਜੀ ਗ੍ਰੇਗਰੀ ਵਿੰਟਰ ਨੂੰ ਇਸ ਸਾਲ ਦਾ ਕੈਮਿਸਟਰੀ ਦਾ ਨੋਬਲ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਤਿੰਨਾਂ ਨੇ ਉਹ ਅੰਜ਼ਾਇਮ ਬਣਾਉਣ ਲਈ ਐਵੋਲਿਊਸ਼ਨ ਦੇ ਸਿਧਾਂਤ ਦਾ ਇਸਤੇਮਾਲ ਕੀਤਾ ਸੀ, ਜਿਸ ਦੀ ਵਰਤੋਂ ਬਾਇਓ ਫਿਊਲ ਤੋਂ ਲੈ ਕੇ ਦਵਾਈਆਂ ਬਣਾਉਣ ਤੱਕ ਕੀਤੀ ਜਾ ਸਕਦੀ ਹੈ।
ਫਰਾਂਸੇਸ ਐਰਨਾਲਡ ਅਜਿਹੀ ਪੰਜਵੀਂ ਮਹਿਲਾ ਵਿਗਿਆਨੀ ਹੈ, ਜਿਨ੍ਹਾਂ ਨੂੰ ਕੈਮਿਸਟਰੀ ਦਾ ਇਹ ਪ੍ਰਸਿੱਧ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਹੈ। ਉਨ੍ਹਾਂ ਨੂੰ ਕੁੱਲ ਇਨਾਮ ਰਾਸ਼ੀ 10.10 ਲੱਖ ਡਾਲਰ ਵਿੱਚੋਂ ਅੱਧਾ ਮਿਲੇਗਾ। ਬਾਕੀ ਦਾ ਅੱਧਾ ਹਿੱਸਾ ਹੋਰ ਦੋ ਸਾਇੰਸਦਾਨਾਂ ਸਮਿਥ ਤੇ ਵਿੰਟਰ ਨੂੰ ਦਿੱਤਾ ਜਾਵੇਗਾ। ਸਵੀਡਿਸ਼ ਰਾਇਲ ਅਕੈਡਮੀ ਆਫ ਸਾਇੰਸਿਜ਼ ਨੇ ਕੱਲ੍ਹ ਜਾਰੀ ਬਿਆਨ 'ਚ ਕਿਹਾ ਕਿ ਤਿੰਨਾਂ ਵਿਗਿਆਨੀਆਂ ਨੇ ਐਵੋਲਿਊਸ਼ਨ ਸਿਧਾਂਤ ਦੀ ਵਰਤੋਂ ਉਨ੍ਹਾਂ ਉਦੇਸ਼ਾਂ ਲਈ ਕੀਤੀ ਹੈ, ਜਿਸ ਨਾਲ ਮਨੁੱਖਤਾ ਨੂੰ ਸਭ ਤੋਂ ਵੱਧ ਫਾਇਦਾ ਪਹੁੰਚਦਾ ਹੈ। ਤਿੰਨਾਂ ਵਿਗਿਆਨੀਆਂ ਨੇ ਪ੍ਰੋਟੀਨਾਂ ਦੇ ਵਿਕਾਸ ਲਈ ਐਵੋਲਿਊਸ਼ਨ ਦੇ ਸਿਧਾਂਤਾਂ ਜੈਨੇਟਿਕ ਬਦਲਾਅ ਅਤੇ ਚੋਣ ਦੀ ਵਰਤੋਂ ਕੀਤੀ ਹੈ। ਇਸ ਪ੍ਰੋਟੀਨਾਂ ਦੀ ਵਰਤੋਂ ਵੱਖ-ਵੱਖ ਖੇਤਰਾਂ 'ਚ ਕੀਤੀ ਜਾਂਦੀ ਹੈ। ਅਕਾਦਮੀ ਦੀ ਨੋਬਲ ਕੈਮਿਸਟਰੀ ਕਮੇਟੀ ਦੇ ਮੁਖੀ ਕਲਾਈਜ ਗੁਸਤਾਫਸਨ ਨੇ ਦੱਸਿਆ ਕਿ ਤਿੰਨਾਂ ਵਿਗਿਆਨੀਆਂ ਨੇ ਟੈਸਟ ਟਿਊਬ 'ਚ ਡਾਰਵਿਨ ਦੇ ਸਿਧਾਂਤ ਲਾਗੂ ਕੀਤੇ ਹਨ।