ਬੀਜਿੰਗ, 4 ਅਕਤੂਬਰ (ਪੋਸਟ ਬਿਊਰੋ)- ਚੀਨ ਦੀ ਸਭ ਤੋਂ ਵੱਧ ਕਮਾਊ ਅਭਿਨੇਤਰੀ ਫੈਨ ਬਿੰਗਬਿੰਗ ਨੂੰ ਤਿੰਨ ਮਹੀਨੇ ਦੀ ਖੁਫੀਆ ਹਿਰਾਸਤ ਤੋਂ ਛੱਡ ਦਿੱਤਾ ਗਿਆ ਹੈ। ਟੈਕਸ ਚੋਰੀ ਦੇ ਦੋਸ਼ ਲੱਗਣ ਪਿੱਛੋਂ ਬਿੰਗਬਿੰਗ ਜੂਨ ਮਹੀਨੇ ਤੋਂ ਅਚਾਨਕ ਗਾਇਬ ਹੋ ਗਈ ਸੀ। ਐਕਸ-ਮੈਨ ਅਤੇ ਆਇਰਨ ਮੈਨ ਆਦਿ ਫਿਲਮਾਂ ਵਿੱਚ ਕੰਮ ਕਰ ਚੁੱਕੀ ਅਭਿਨੇਤਰੀ ਦੇ ਅਚਾਨਕ ਗਾਇਬ ਹੋ ਜਾਣ ਕਾਰਨ ਦੁਨੀਆ ਭਰ ਵਿੱਚ ਮੌਜੂਦ ਉਸ ਦੇ ਪ੍ਰਸ਼ੰਸਕ ਚਿੰਤਤ ਸਨ। ਬਾਅਦ ਵਿੱਚ ਪਤਾ ਲੱਗਾ ਕਿ ਉਹ ਖੁਫੀਆ ਹਿਰਾਸਤ ਵਿੱਚ ਹੈ। ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਮੁਕਤ ਕਰਨ ਦੇ ਨਾਲ ਟੈਕਸ ਚੋਰੀ ਕਰਨ ਦੇ ਜੁਰਮ ਵਿੱਚ 13 ਕਰੋੜ ਡਾਲਰ ਜਮ੍ਹਾਂ ਕਰਵਾਉਣ ਦਾ ਵੀ ਆਦੇਸ਼ ਦਿੱਤਾ ਹੈ।
ਫੈਨ ਬਿੰਗਬਿੰਗ ਪਹਿਲੀ ਵਾਰ ਟੈਕਸ ਚੋਰੀ ਦੀ ਦੋਸ਼ੀ ਪਾਈ ਗਈ ਹੈ। ਇਸੇ ਕਾਰਨ ਜੇ ਤੈਅ ਹੱਦ ਦੇ ਅੰਦਰ ਸਾਰੇ ਟੈਕਸ ਅਤੇ ਜੁਰਮਾਨਾ ਜਮ੍ਹਾਂ ਕਰਵਾ ਦਿੰਦੀ ਹੈ ਤਾਂ ਉਸ ਉਤੇ ਕੇਸ ਨਹੀਂ ਚਲਾਇਆ ਜਾਵੇਗਾ। ਟੈਕਸ ਜਮ੍ਹਾਂ ਕਰਵਾਉਣ ਦੀ ਆਖਰੀ ਤਰੀਕ ਜਨਤਕ ਨਹੀਂ ਕੀਤੀ ਗਈ। ਕੁਝ ਰਿਪੋਰਟਾਂ ਅਨੁਸਾਰ ਅਭਿਨੇਤਰੀ ਨੂੰ ਜਿਆਂਗਸੂ ਸੂਬੇ ਦੇ ‘ਹਾਲੀਡੇ ਰਿਜ਼ਾਰਟ' ਵਿੱਚ ਰੱਖਿਆ ਗਿਆ ਸੀ। ਟੈਕਸ ਚੋਰੀ ਕਰਨ ਦੀ ਦੋਸ਼ੀ ਪਾਏ ਜਾਣ ਉੱਤੇ ਫੈਨ ਨੇ ਸ਼ਰਮਿੰਦਗੀ ਪ੍ਰਗਟ ਕਰਦੇ ਹੋਏ ਸੋਸ਼ਲ ਮੀਡੀਆ ਉਤੇ ਸਭ ਤੋਂ ਮੁਆਫੀ ਮੰਗੀ ਹੈ।