ਲੰਡਨ, 16 ਮਈ (ਪੋਸਟ ਬਿਊਰੋ)- ਸਰਬਜੀਤ ਕੌਰ ਦੇ ਕਤਲ ਕੇਸ ਦਾ ਸਾਹਮਣਾ ਕਰ ਰਹੇ ਉਸ ਦੇ ਪਤੀ ਗੁਰਪ੍ਰੀਤ ਸਿੰਘ ਨੇ ਅਦਾਲਤ 'ਚ ਖੁਦ ਨੂੰ ਬੇਕਸੂਰ ਦੱਸਦੇ ਹੋਏ ਇਨਸਾਫ ਦੀ ਮੰਗ ਕੀਤੀ ਹੈ।
ਪਤਾ ਲੱਗਾ ਹੈ ਕਿ 44 ਸਾਲਾ ਗੁਰਪ੍ਰੀਤ ਸਿੰਘ ਨੇ ਕਿਹਾ ਕਿ ਉਹ ਮਾਨਸਿਕ, ਸਰੀਰਕ ਅਤੇ ਆਰਥਿਕ ਪੀੜਾਂ 'ਚੋਂ ਲੰਘ ਰਿਹਾ ਹੈ। ਸਰਕਾਰੀ ਵਕੀਲ ਡੇਵਿਡ ਮੇਸਨ ਕਿਊ ਸੀ ਨੇ ਪੁੱਛਿਆ ਸੀ ਕਿ ਉਹ ਖੁਦ ਲਈ ਇਨਸਾਫ ਚਾਹੁੰਦਾ ਹੈ ਜਾਂ ਆਪਣੀ ਪਤਨੀ ਲਈ, ਜਿਸ ਦੇ ਜਵਾਬ 'ਚ ਗੁਰਪ੍ਰੀਤ ਨੇ ਕਿਹਾ ਕਿ ਉਹ ਆਪਣੇ ਲਈ ਅਤੇ ਆਪਣੀ ਪਤਨੀ ਦੋਵਾਂ ਲਈ ਇਨਸਾਫ ਚਾਹੁੰਦਾ ਹੈ। ਗੁਰਪ੍ਰੀਤ ਨੇ ਹੰਝੂ ਡੋਲਦੇ ਹੋਏ ਕਿਹਾ ਕਿ ਮੈਂ ਹਿਰਾਸਤ ਵਿੱਚ ਹਾਂ, ਮੈਨੂੰ ਜਾਂਚ ਟੀਮ, ਪੁਲਸ ਅਤੇ ਤੁਸੀਂ ਲੋਕਾਂ ਨੇ ਖਤਮ ਕਰ ਦਿੱਤਾ ਹੈ। ਮੈਂ ਪੰਜ ਲੱਖ ਪੌਂਡ ਟੈਕਸ ਦੇਂਦਾ ਹਾਂ। ਸਿੱਧੇ ਅਸਿੱਧੇ ਤੌਰ 'ਤੇ 50-60 ਲੋਕ ਮੇਰੇ ਹੇਠਾਂ ਕੰਮ ਕਰਦੇ ਹਨ। ਉਹ ਸਭ ਖਤਮ ਹੋ ਗਿਆ, ਮੇਰਾ ਕਾਰੋਬਾਰ ਚਲਾ ਗਿਆ, ਮੇਰਾ ਮਾਣ ਸਨਮਾਨ ਖਤਮ ਹੋ ਗਿਆ। ਮਿ. ਮੇਸਨ ਨੇ ਕਿਹਾ ਕਿ ਤੈਨੂੰ ਆਪਣੀ ਅਤੇ ਆਪਣੇ ਕਾਰੋਬਾਰ ਦੀ ਆਪਣੀ ਪਤਨੀ ਤੋਂ ਵੱਧ ਚਿੰਤਾ ਹੈ। ਅਦਾਲਤ 'ਚ ਇਹ ਵੀ ਦੱਸਿਆ ਗਿਆ ਕਿ ਸਰਬਜੀਤ ਕੌਰ ਨੇ ਆਪਣੇ ਪਰਵਾਰਕ ਡਾਕਟਰ ਕੋਲ 15 ਜਨਵਰੀ 2018 ਨੂੰ ਕਿਹਾ ਸੀ ਕਿ ਉਹ ਆਤਮ ਹੱਤਿਆ ਕਰਨ ਦੀ ਸੋਚਦੀ ਸੀ। ਉਹ ਆਪਣੇ ਬੱਚੇ ਚਾਹੁੰਦੀ ਹੈ। ਉਹ ਇਕੱਲਾ ਮਹਿਸੂਸ ਕਰਦੀ ਹੈ, ਪਰ ਗੁਰਪ੍ਰੀਤ ਹੋਰ ਬੱਚੇ ਨਹੀਂ ਚਾਹੁੰਦੇ। ਗੁਰਪ੍ਰੀਤ ਨੇ ਕਿਹਾ ਕਿ ਉਸ ਦੀ ਪਤਨੀ ਸਰਬਜੀਤ ਨੇ ਅਜਿਹਾ ਉਸ ਨੂੰ ਕਦੇ ਨਹੀਂ ਦੱਸਿਆ। ਗੁਰਪ੍ਰੀਤ ਨੇ ਇਸ ਗੱਲ ਤੋਂ ਵੀ ਇਨਕਾਰ ਕੀਤਾ ਕਿ ਜਿਸ ਦਿਨ ਸਰਬਜੀਤ ਕੌਰ ਦੀ ਮੌਤ ਹੋਈ, ਉਸ ਦਿਨ 8.15 ਵਜੇ ਸਵੇਰੇ ਕਿਸੇ ਨੂੰ ਘਰ ਆਉਣ ਦਿੱਤਾ ਸੀ। ਉਸ ਨੇ ਕਿਹਾ ਕਿ ਉਹ ਕਮਰੇ ਵਿੱਚ ਬੈਠਾ ਟੀ ਵੀ ਉੱਤੇ ਪੰਜਾਬੀ ਖਬਰਾਂ ਸੁਣ ਰਿਹਾ ਸੀ। ਗੁਰਪ੍ਰੀਤ ਸਿੰਘ ਨੇ ਆਪਣੀ ਪਤਨੀ ਸਰਬਜੀਤ ਕੌਰ ਅਤੇ ਪਹਿਲੀ ਪਤਨੀ ਅਮਨਦੀਪ ਕੌਰ ਦੇ ਕਤਲ 'ਚ ਕਿਸੇ ਤਰ੍ਹਾਂ ਦੀ ਸ਼ਮੂਲੀਅਤ ਤੋਂ ਨਾਂਹ ਕਰਦਿਆਂ ਖੁਦ ਨੂੰ ਬੇਕਸੂਰ ਕਿਹਾ ਹੈ, ਜਦ ਕਿ ਕੇਸ ਦੀ ਸੁਣਵਾਈ ਅਜੇ ਜਾਰੀ ਹੈ।