ਕੁਆਲਾਲੰਪੁਰ, 3 ਅਕਤੂਬਰ, (ਪੋਸਟ ਬਿਊਰੋ)- ਮਲੇਸ਼ੀਆ ਦੀ ਪੁਲਸ ਦੇ ਸਿੱਖ ਚੀਫ ਅਮਰ ਸਿੰਘ ਦੀ ਦਸਤਾਰ ਬਾਰੇ ਇੱਕ ਬਲਾਗਰ ਨੇ ਬੇਤੁਕੀ ਟਿਪਣੀ ਕਰ ਦਿੱਤੀ ਤਾਂ ਇਹ ਬਲਾਗਰ ਰਾਜਾ ਪੈਟਰਾ ਕਮਰੁਦੀਨ ਇਸ ਟਿਪਣੀ ਦੇ ਨਾਲ ਫਸ ਗਏ ਅਤੇ ਉਨ੍ਹਾਂ ਨੂੰ ਮੁਆਫ਼ੀ ਮੰਗਣੀ ਪਈ ਹੈ।
ਬਲਾਗਰ ਕਮਰੁਦੀਨ ਨੇ ਆਪਣੇ ਲੇਖ ਵਿਚ ਪੁਲਸ ਮੁਖੀ ਅਮਰ ਸਿੰਘ ਦੀ ਕਾਰਗੁਜ਼ਾਰੀ ਉਤੇ ਟਿਪਣੀ ਕਰਦੇ ਹੋਏ ਕਿਹਾ ਸੀ, ‘ਅਮਰ ਸਿੰਘ ਨੂੰ ਆਪਣੀ ਪੱਗ ਜ਼ਰਾ ਕੱਸ ਕੇ ਬੰਨ੍ਹਣੀ ਚਾਹੀਦੀ ਹੈ, ਤਾਂ ਕਿ ਆਪਣੇ ਦਿਮਾਗ ਦੇ ਵਿਚ ਖੂਨ ਦੇ ਪ੍ਰਵਾਹ ਨੂੰ ਸੀਮਤ ਕਰ ਸਕਣ।` ਇਸ ਟਿਪਣੀ ਨਾਲ ਹੰਗਾਮਾ ਖੜ੍ਹਾ ਹੋ ਗਿਆ। ਕਮਰੁਦੀਨ ਦੀ ਇਸ ਟਿਪਣੀ ਨੂੰ ਨਸਲੀ ਤੇ ਵਿਤਕਰੇ ਵਾਲੀ ਮੰਨਿਆ ਗਿਆ। ਉਸ ਨੇ ਆਪਣੀ ਇਸ ਟਿਪਣੀ ਤੋਂ ਬਾਅਦ ਮੁਆਫ਼ੀ ਮੰਗ ਲਈ। ਉਸ ਦਾ ਕਹਿਣਾ ਸੀ ਕਿ ਉਸ ਨੂੰ ਅੰਦਾਜ਼ਾ ਨਹੀਂ ਸੀ ਕਿ ਦਸਤਾਰ ਦੀ ਇੰਨੀ ਜ਼ਿਆਦਾ ਅਹਿਮੀਅਤ ਹੈ।
ਇਸ ਟਿਪਣੀ ਪਿੱਛੋਂ ਮਲੇਸ਼ੀਆ ਗੁਰਦੁਆਰਾ ਕੌਂਸਲ ਅਤੇ ਸਿੱਖ ਭਾਈਚਾਰੇ ਵਿੱਚ ਰੋਸ ਦੀ ਲਹਿਰ ਸੀ। ਕੌਂਸਲ ਦਾ ਕਹਿਣਾ ਸੀ ਕਿ ਇਸ ਟਿਪਣੀ ਕਾਰਨ ਸਿੱਖਾਂ ਦੀ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪੁੱਜੀ ਹੈ। ਮਲੇਸ਼ੀਆਈ ਸਿੱਖਾਂ ਨੇ ਪੁਲਸ ਦੇ ਮੁਖੀ ਦੀ ਦਸਤਾਰ `ਤੇ ਟਿਪਣੀ ਕਰਨ ਲਈ ਬਲਾਗਰ ਨੂੰ ਝਾੜ ਪਾਈ ਹੈ। ਇਸ ਟਿਪਣੀ ਦਾ ਪੁਲਸ ਮੁਖੀ ਅਮਰ ਸਿੰਘ ਨੇ ਵੀ ਗੰਭੀਰ ਨੋਟਿਸ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਸਿੱਖਾਂ ਵਿੱਚ ਦਸਤਾਰ ਦੀ ਬਹੁਤ ਮਹੱਤਤਾ ਹੈ, ਇਹ ਸਾਡੀ ਸ਼ਾਨ ਹੈ ਤੇ ਮਜ਼ਬੂਤੀ ਦਿੰਦੀ ਹੈ। ਇਸ ਤਰ੍ਹਾਂ ਦੀਆਂ ਅਣਮਨੁੱਖੀ ਅਤੇ ਅਪਮਾਨ ਜਨਕ ਟਿਪਣੀ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ।