ਨਵੀਂ ਦਿੱਲੀ, 3 ਅਕਤੂਬਰ, (ਪੋਸਟ ਬਿਊਰੋ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਵਾਤਾਵਰਨ ਲਈ ਇਤਿਹਾਸਿਕ ਕਦਮਾਂ ਲਈ ਯੂ ਐੱਨ ਓ ਨੇ ਅੱਜ ‘ਚੈਂਪੀਅਨਜ਼ ਆਫ ਅਰਥ ਅਵਾਰਡ` ਨਾਲ ਸਨਮਾਨਿਤ ਕੀਤਾ ਹੈ। ਯੂ ਐੱਨ ਜਨਰਲ ਸੈਕਟਰੀ ਐਂਤੋਨਿਓ ਗੁਤਾਰੇਸ ਨੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਇਹ ਅਵਾਰਡ ਦਿੱਤਾ ਹੈ। ਗੁਤਾਰੇਸ ਭਾਰਤ ਆਏ ਹੋਏ ਹਨ।
‘ਚੈਂਪੀਅਨਜ਼ ਆਫ ਅਰਥ ਅਵਾਰਡ` ਮਿਲਣ ਪਿੱਛੋਂ ਪ੍ਰੋਗਰਾਮ ਨੂੰ ਸੰਬੋਧਤ ਕਰਦੇ ਹੋਏ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਇਹ ਸਨਮਾਨ ਭਾਰਤ ਦਾ ਹੈ, ਇਸ ਅਵਾਰਡ ਲਈ ਮੈਂ ਧੰਨਵਾਦੀ ਹਾਂ। ਉਨ੍ਹਾਂ ਕਿਹਾ ਕਿ ਇਹ ਭਾਰਤ ਦੇ ਆਦਿਵਾਸੀ, ਕਿਸਾਨ ਅਤੇ ਮਛੇਰਿਆਂ ਦਾ ਸਨਮਾਨ ਹੈ। ਮੋਦੀ ਨੇ ਕਿਹਾ ਕਿ ਭਾਰਤ ਹਮੇਸ਼ਾ ਕੁਦਰਤ ਨੂੰ ਮਾਂ ਵਜੋਂ ਦੇਖਦਾ ਹੈ ਤੇ ਨਾਰੀ ਕੁਦਰਤ ਦਾ ਰੂਪ ਹੈ। ਇਹ ਸਨਮਾਨ ਭਾਰਤੀ ਨਾਰੀ ਦਾ ਵੀ ਹੈ, ਜੋ ਪੌਦਿਆਂ ਦਾ ਧਿਆਨ ਰੱਖਦੀ ਹੈ।
ਯੂ ਐੱਨ ਓ ਨੇ 26 ਸਤੰਬਰ ਨੂੰ ਜਨਰਲ ਅਸੈਂਬਲੀ ਦੀ ਉਚ ਪੱਧਰੀ ਬੈਠਕ ਦੌਰਾਨ ਐਲਾਨ ਕੀਤਾ ਸੀ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਫਰਾਂਸ ਦੇ ਰਾਸ਼ਟਰਪਤੀ ਅਮੈਨੁਏਲ ਮੈਕਰਾਂ ਨੂੰ ਪਾਲਿਸੀ ਲੀਡਰਸਿ਼ਪ ਕੈਟੇਗਰੀ ਵਿੱਚ ਇਹ ਚੈਂਪੀਅਨਜ਼ ਆਫ ਅਰਥ ਐਵਾਰਡ ਦਿੱਤਾ ਜਾਵੇਗਾ। ਇਹ ਸਭ ਤੋਂ ਵੱਡਾ ਵਾਤਾਵਰਨ ਪੁਰਸਕਾਰ ਹੈ।