ਪੇਈਚਿੰਗ, 3 ਅਕਤੂਬਰ (ਪੋਸਟ ਬਿਊਰੋ)- ਚੀਨ ਦੇ ਦੱਖਣੀ ਪੱਛਮੀ ਸਿਚੁਆਨ ਪ੍ਰਾਂਤ ਵਿੱਚ ਦੁਨੀਆ ਦੀ ਸਭ ਤੋਂ ਵੱਡੀ ਬੁੱਧ ਮੂਰਤੀ ਚਾਰ ਮਹੀਨੇ ਦੀ ਜਾਂਚ ਪਰਖ ਤੋਂ ਲੰਘੇਗੀ। ਮੂਰਤੀ ਦੀ ਮੁਰੰਮਤ ਲਈ ਚੱਲ ਰਹੀ ਕੋਸਿ਼ਸ਼ ਦੇ ਤਹਿਤ ਮੌਕੇ ਉਤੇ ਜਾ ਕੇ ਇਹ ਜਾਂਚ ਪਰਖ ਕੀਤੀ ਜਾਵੇਗੀ।
ਲੇਸ਼ਾਨ ਸ਼ਹਿਰ ਦੇ ਬਾਹਰੀ ਹਿੱਸੇ ਵਿੱਚ ਬਣਾਈ ਗਈ ਇਸ 71 ਮੀਟਰ ਉਚੀ ਮੂਰਤੀ ਦੀ ਛਾਤੀ ਤੇ ਪੇਟ ਵਾਲੇ ਹਿੱਸੇ ਵਿੱਚ ਦਰਾੜ ਆ ਗਈ ਹੈ ਅਤੇ ਕਿਤੇ-ਕਿਤੇ ਇਹ ਟੁੱਟ ਵੀ ਗਈ ਹੈ। ਲੇਸ਼ਾਨ ਬੁੱਧ ਖੇਤਰ ਦੀ ਪ੍ਰਬੰਧ ਕਮੇਟੀ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ ਹੈ। ਚੀਨ ਦੀ ਸਰਕਾਰੀ ਨਿਊਜ਼ ਏਜੰਸੀ ਸ਼ਿਨਹੂਆ ਨੇ ਖਬਰ ਦਿੱਤੀ ਹੈ ਕਿ ਅੱਠ ਅਕਤੂਬਰ ਤੋਂ ਸ਼ੁਰੂ ਹੋਣ ਜਾ ਰਹੀ ਜਾਂਚ ਦੀ ਪ੍ਰਕਿਰਿਆ ਦੌਰਾਨ ਬੁੱਧ ਦੀ ਮੂਰਤੀ ਦਾ ਪ੍ਰਮੁੱਖ ਹਿੱਸਾ ਥੋੜ੍ਹੇ ਸਮੇਂ ਲਈ ਪੂਰੀ ਤਰ੍ਹਾਂ ਢੱਕ ਦਿੱਤਾ ਜਾਵੇਗਾ। ਸੱਭਿਆਚਾਰਕ ਵਿਰਾਸਤ ਦੇ ਚਿੰਨਾਂ ਦੇ ਦਰਜਨਾਂ ਮਾਹਰਾਂ ਦੀ ਨਿਗਰਾਨੀ ਵਿੱਚ ਮੂਰਤੀ ਦੀ ਜਾਂਚ ਕੀਤੀ ਜਾਵੇਗੀ। ਇਸ ਵਿੱਚ 3ਡੀ ਲੇਜਰ ਸਕੈਨਿੰਗ, ਇੰਫ੍ਰਾਰੈਡ ਥਰਮਲ ਇਮੇਜਿੰਗ ਵਰਗੀ ਤਕਨੀਕ ਦੀ ਵਰਤੋਂ ਹੋਵੇਗੀ ਅਤੇ ਡਰੋਨ ਦੇ ਨਾਲ ਹਵਾਈ ਸਰਵੇਖਣ ਵੀ ਕੀਤਾ ਜਾਵੇਗਾ। ਬੁੱਧ ਦੀ ਇਹ ਮੂਰਤੀ ਬਣਨ ਵਿੱਚ 90 ਸਾਲ ਤੋਂ ਵੱਧ ਸਮਾਂ ਲੱਗਾ ਸੀ। ਇਸ ਨੂੰ ਬਣਾਉਣ ਦੀ ਸ਼ੁਰੂਆਤ ਤਾਂਗ ਵੰਸ਼ (618-907) ਦੇ ਸ਼ਾਸਨ ਦੌਰਾਨ ਸਾਲ 713 ਵਿੱਚ ਹੋਈ ਸੀ। ਯੂਨੇਸਕੋ ਵਲੋਂ ਵਿਸ਼ਵ ਵਿਰਾਸਤ ਐਲਾਨ ਕੀਤੀ ਜਾ ਚੁੱਕੀ ਇਸ ਮੂਰਤੀ ਦੀ ਕਈ ਵਾਰ ਜਾਂਚ ਅਤੇ ਮੁਰੰਮਤ ਹੋ ਚੁੱਕੀ ਹੈ।