ਓਸ਼ਾਵਾ, 3 ਅਕਤੂਬਰ (ਪੋਸਟ ਬਿਊਰੋ) : ਅੱਜ ਸਵੇਰੇ ਓਸ਼ਾਵਾ ਵਿੱਚ ਦੋ ਗੱਡੀਆਂ ਦੀ ਟੱਕਰ ਹੋ ਜਾਣ ਕਾਰਨ ਇੱਕ ਵਿਅਕਤੀ ਮਾਰਿਆ ਗਿਆ।
ਇਹ ਹਾਦਸਾ ਟੌਨਟਨ ਰੋਡ ਵੈਸਟ ਤੇ ਥੌਰਨਟਨ ਰੋਡ ਨੌਰਥ ਨੇੜੇ ਹੋਇਆ। ਮੌਕੇ ਤੋਂ ਪ੍ਰਾਪਤ ਹੋਈ ਜਾਣਕਾਰੀ ਅਨੁਸਾਰ ਊਬਰ ਡਰਾਈਵਰ ਟੌਨਟਨ ਰੋਡ ਵੈਸਟ ਉੱਤੇ ਪੱਛਮ ਵੱਲ ਜਾ ਰਿਹਾ ਸੀ ਜਦੋਂ ਉਸ ਦੀ ਕਾਰ ਇੱਕ ਹੌਂਡਾ ਗੱਡੀ ਨਾਲ ਟਕਰਾ ਗਈ। ਇਹ ਹੌਂਡਾ ਟਰੈਫਿਕ ਲਾਈਟ ਉੱਤੇ ਖੜ੍ਹੀ ਸੀ। ਮੌਕੇ ਉੱਤੇ ਹੌਂਡਾ ਕਾਰ ਦਾ ਡਰਾਈਵਰ ਬਿਨਾਂ ਸਾਹ ਸਤ ਦੇ ਮਿਲਿਆ ਤੇ ਬਾਅਦ ਵਿੱਚ ਹਸਪਤਾਲ ਵਿੱਚ ਉਸ ਦੀ ਮੌਤ ਹੋ ਗਈ।
ਪੁਲਿਸ ਅਨੁਸਾਰ ਹਾਦਸੇ ਦਾ ਕਾਰਨ ਤੇਜ਼ ਰਫਤਾਰ ਤੇ ਸ਼ਰਾਬ ਹੋ ਸਕਦੇ ਹਨ। ਊਬਰ ਦਾ ਡਰਾਈਵਰ, ਜੋ ਕਿ ਆਪਣੇ 30ਵਿਆਂ ਵਿੱਚ ਮੰਨਿਆ ਜਾ ਰਿਹਾ ਹੈ, ਇਸ ਸਮੇਂ ਹਿਰਾਸਤ ਵਿੱਚ ਹੈ ਤੇ ਦਰਹਾਮ ਰੀਜਨਲ ਪੁਲਿਸ ਦਾ ਮੇਜਰ ਕੌਲੀਜ਼ਨ ਬਿਊਰੋ ਇਸ ਹਾਦਸੇ ਦੀ ਜਾਂਚ ਕਰ ਰਿਹਾ ਹੈ।