ਜਲੰਧਰ, 18 ਅਪ੍ਰੈਲ (ਪੋਸਟ ਬਿਊਰੋ)- ਆਈ ਪੀ ਐਲ ਕ੍ਰਿਕਟ ਮੈਚਾਂ 'ਤੇ ਸੱਟਾ ਲਗਵਾਉਣ ਦੇ ਦੋਸ਼ਾਂ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਕਾਰ ਬਾਜ਼ਾਰ ਦਾ ਮਾਲਕ ਮੁਕੇਸ਼ ਸੇਠੀ ਜਲੰਧਰ ਵਿੱਚ ਕਿਰਾਏ 'ਤੇ ਕਮਰਾ ਲੈ ਕੇ ਬੁਕੀ ਦਾ ਕੰਮ ਚਲਾਉਂਦਾ ਸੀ। ਜਿਥੇ ਵੀ ਉਹ ਸੱਟਾ ਲਗਵਾਉਂਦਾ, ਉਸ ਥਾਂ ਨੂੰ ਸਿਰਫ ਇਕੋ ਵਾਰ ਵਰਤਦਾ ਅਤੇ ਟਿਕਾਣੇ ਬਦਲ ਲੈਂਦਾ ਸੀ। ਸੇਠੀ ਸਮੇਤ ਉਸ ਦੇ ਸਾਰੇ ਸਾਥੀਆਂ ਨੂੰ ਦੋ ਦਿਨ ਦਾ ਰਿਮਾਂਡ ਖਤਮ ਹੋਣ ਦੇ ਬਾਅਦ ਜੇਲ੍ਹ ਭੇਜ ਦਿੱਤਾ ਗਿਆ ਹੈ।
ਇਸ ਸ਼ਹਿਰ ਵਿੱਚ ਸੱਟੇ ਦਾ ਜਾਲ ਵਿਛਾਉਣ ਵਾਲੇ ਮੁਕੇਸ਼ ਸੇਠੀ ਨੂੰ ਕਾਫੀ ਸਮੇਂ ਤੋਂ ਪੁਲਸ ਲੱਭ ਰਹੀ ਸੀ, ਪਰ ਉਹ ਅਕਸਰ ਚਕਮਾ ਦੇ ਕੇ ਨਿਕਲ ਜਾਂਦਾ ਸੀ। ਸੀ ਆਈ ਏ ਸਟਾਫ ਦੇ ਇੰਚਾਰਜ ਹਰਮਿੰਦਰ ਸਿੰਘ ਦੇ ਜਾਲ ਵਿੱਚ ਫਸੇ ਮੁਕੇਸ਼ ਸੇਠੀ ਦੇ ਸੱਟੇ ਦੇ ਕਾਰਬਾਰ ਦੇ ਲਿੰਕ ਖੋਲ੍ਹੇ ਜਾ ਰਹੇ ਹਨ। ਪੁਲਸ ਦੀ ਪੁੱਛਗਿੱਛ ਵਿੱਚ ਇਹ ਗੱਲ ਸਾਹਮਣੇ ਆਈ ਕਿ ਮੁਕੇਠ ਸੇਠੀ ਖੁਦ ਦਿੱਲੀ ਜਾ ਕੇ ਮੋਬਾਈਲਾਂ ਵਾਲਾ ਅਟੈਚੀ ਬਣਵਾ ਕੇ ਲਿਆਉਂਦਾ ਸੀ ਅਤੇ ਉਸ ਦੇ ਲੈਪਟਾਪ ਤੋਂ ਮਿਲੇ ਰਿਕਾਰਡ ਨੂੰ ਪੁਲਸ ਫੋਲ ਰਹੀ ਹੈ। ਪੁਲਸ ਨੂੰ ਮੁਕੇਸ਼ ਸੇਠੀ ਨਾਲ ਜੁੜੇ ਪੰਜ ਹੋਰ ਬੁਕੀਜ਼ ਦੇ ਨਾਮ ਵੀ ਪਤਾ ਲੱਗੇ ਹਨ।
ਸੀ ਆਈ ਏ ਸਟਾਫ ਦੀ ਪੁਲਸ ਨੇ ਮੁਕੇਸ਼ ਸੇਠੀ, ਪ੍ਰਿੰਸ ਪੁਰੀ ਵਾਸੀ ਕ੍ਰਿਸ਼ਨ ਨਗਰ, ਅਤੁਲ ਉਰਫ ਚਿੰਟੂ ਵਾਸੀ ਮੁਹੱਲਾ ਗੋਬਿੰਦਗੜ੍ਹ, ਅਰੁਣ ਉਰਫ ਗਗਨ ਵਾਸੀ ਮਧੂਬਨ ਕਾਲੋਨੀ, ਸੁਖਪਾਲ ਸਿੰਘ ਵਾਸੀ ਹਰਦੇਵ ਨਗਰ ਅਤੇ ਕੀਰਤੀ ਵਾਸੀ ਬੀ ਟੀ ਕਾਲੋਨੀ ਘਾਹ ਮੰਡੀ ਨੂੰ ਗ੍ਰਿਫਤਾਰ ਕੀਤਾ ਸੀ। ਸਾਰੇ ਦੋਸ਼ੀ ਕਪੂਰਥਲਾ ਤੋਂ ਆਈ ਪੀ ਐਲ ਮੈਚਾਂ 'ਤੇ ਸੱਟਾ ਲਵਾ ਕੇ ਮੁੜ ਰਹੇ ਸਨ। ਦੋਸ਼ੀਆਂ ਤੋਂ ਮੋਬਾਈਲ ਲੱਗੇ ਅਟੈਚੀ, ਦੋ ਲੈਪਟਾਪ ਤੇ 23 ਹਜ਼ਾਰ ਰੁਪਏ ਬਰਾਮਦ ਹੋਏ ਸਨ।