ਸਟੌਕਹੋਮ, 2 ਅਕਤੂਬਰ (ਪੋਸਟ ਬਿਊਰੋ) : ਲੇਜ਼ਰਜ਼ ਪ੍ਰਤੀ ਆਪਣੇ ਕੰਮ ਨੂੰ ਲੈ ਕੇ ਮੰਗਲਵਾਰ ਨੂੰ ਤਿੰਨ ਵਿਗਿਆਨੀਆਂ ਨੂੰ ਫਿਜਿ਼ਕਸ (ਭੌਤਿਕ ਵਿਗਿਆਨ) ਦੇ ਖੇਤਰ ਵਿੱਚ ਨੋਬਲ ਪ੍ਰਾਈਜ਼ ਦਿੱਤਾ ਗਿਆ। ਇਨ੍ਹਾਂ ਤਿੰਨ ਵਿਗਿਆਨੀਆਂ ਵਿੱਚੋਂ ਇੱਕ ਕੈਨੇਡੀਅਨ ਵਿਗਿਆਨੀ ਵੀ ਹੈ।
ਅਮਰੀਕਾ ਦੇ ਆਰਥਰ ਐਸਕਿਨ ਨੂੰ 1.01 ਮਿਲੀਅਨ ਡਾਲਰ ਵਿੱਚੋਂ ਅੱਧੀ ਰਕਮ ਦਿੱਤੀ ਜਾਵੇਗੀ ਜਦਕਿ ਬਾਕੀ ਅੱਧੀ ਰਕਮ ਫਰਾਂਸ ਦੇ ਗੇਰਾਰਡ ਮੋਊਰੋਊ ਤੇ ਕੈਨੇਡੀਅਨ ਡੌਨਾ ਸਟ੍ਰਿਕਲੈਂਡ ਨੂੰ ਦਿੱਤੀ ਜਾਵੇਗੀ। ਸਵੀਡਨ ਦੀ ਰਾਇਲ ਅਕੈਡਮੀ ਆਫ ਸਾਇੰਸਿਜ਼, ਜਿਸ ਵੱਲੋਂ ਇਨ੍ਹਾਂ ਜੇਤੂਆਂ ਦੀ ਚੋਣ ਕੀਤੀ ਗਈ ਹੈ, ਨੇ ਆਖਿਆ ਕਿ 96 ਸਾਲਾ ਐਸਕਿਨ ਵੱਲੋਂ ਆਪਟੀਕਲ ਟਵੀਜ਼ਰਜ਼ ਦਾ ਵਿਕਾਸ ਕੀਤਾ ਗਿਆ, ਇਨ੍ਹਾਂ ਟਵੀਜ਼ਰਜ਼ ਨਾਲ ਨਿੱਕੇ ਨਿੱਕੇ ਕਣ ਜਿਵੇਂ ਕਿ ਵਾਇਰਸ ਆਦਿ ਨੂੰ ਵੀ ਬਿਨਾਂ ਕਿਸੇ ਹੋਰ ਹਿੱਸੇ ਨੂੰ ਨੁਕਸਾਨ ਪਹੁੰਚਾਇਆਂ ਫੜ੍ਹਿਆ ਜਾ ਸਕਦਾ ਹੈ।
ਸਟ੍ਰਿਕਲੈਂਡ ਤੇ ਮੋਊਰੋਊ ਨੇ ਨਿੱਕੀਆਂ ਤੇ ਤੇਜ਼ ਪਲਸਿਜ਼ ਵਿਕਸਤ ਕੀਤੀਆਂ ਜਿਨ੍ਹਾਂ ਦਾ ਇੰਡਸਟਰੀਅਲ ਤੇ ਮੈਡੀਕਲ ਐਪਲੀਕੇਸ਼ਨਜ਼ ਵਿੱਚ ਕਾਫੀ ਵੱਡਾ ਯੋਗਦਾਨ ਹੈ। ਸਟ੍ਰਿਕਲੈਂਡ ਪਹਿਲੀ ਮਹਿਲਾ ਵਿਗਿਆਨੀ ਹੈ ਜਿਸ ਨੂੰ ਪਿਛਲੇ ਤਿੰਨ ਸਾਲਾਂ ਵਿੱਚ ਕੋਈ ਨੋਬਲ ਇਨਾਮ ਦਿੱਤਾ ਗਿਆ ਹੈ। ਉਹ ਅਜਿਹੀ ਤੀਜੀ ਮਹਿਲਾ ਹੈ ਜਿਸ ਨੂੰ ਫਿਜਿ਼ਕਸ ਦੇ ਖੇਤਰ ਵਿੱਚ ਐਨਾ ਵੱਡਾ ਐਵਾਰਡ ਦਿੱਤਾ ਗਿਆ ਹੋਵੇ। ਸੱਭ ਤੋਂ ਪਹਿਲਾਂ 1903 ਵਿੱਚ ਮੈਰੀ ਕਿਊਰੀ ਨੂੰ ਇਹ ਇਨਾਮ ਦਿੱਤਾ ਗਿਆ ਸੀ।
ਸਟ੍ਰਿਕਲੈਂਡ ਨੇ ਇਸ ਐਲਾਨ ਤੋਂ ਬਾਅਦ ਫੋਨ ਉੱਤੇ ਗੱਲ ਕਰਦਿਆਂ ਆਖਿਆ ਕਿ ਸਾਨੂੰ ਮਹਿਲਾ ਭੌਤਿਕ ਵਿਗਿਆਨੀਆਂ ਨੂੰ ਵੀ ਮੌਕਾ ਦੇਣਾ ਚਾਹੀਦਾ ਹੈ ਤੇ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ਉੱਤੇ ਖੁਸ਼ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਆਸ ਪ੍ਰਗਟਾਈ ਕਿ ਹੋ ਸਕਦਾ ਹੈ ਸਮਾਂ ਰਹਿੰਦਿਆਂ ਇਹ ਸੱਭ ਤੇਜ਼ੀ ਨਾਲ ਹੋਣ ਲੱਗ ਜਾਵੇ। ਸੋਮਵਾਰ ਨੂੰ ਅਮਰੀਕਾ ਦੇ ਜੇਮਜ਼ ਐਲੀਸਨ ਤੇ ਜਾਪਾਨ ਦੇ ਤਾਸੂਕੂ ਹੌਂਜੋ ਨੇ ਮੈਡੀਸਨ ਦੇ ਖੇਤਰ ਵਿੱਚ ਨੋਬਲ ਪ੍ਰਾਈਜ਼ ਜਿੱਤਿਆ।