ਬੁਲੰਦਸ਼ਹਿਰ, 14 ਅਪ੍ਰੈਲ (ਪੋਸਟ ਬਿਊਰੋ)- ਬਹੁਜਨ ਸਮਾਜ ਪਾਰਟੀ ਦੀ ਮੁਖੀ ਮਾਇਆਤੀ ਨੇ ਅਲੀ ਤੇ ਬਜਰੰਗ ਬਲੀ ਬਾਰੇ ਬਿਆਨ ਦੇਣ ਕਾਰਨ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੂੰ ਕਰਾਰਾ ਜਵਾਬ ਦਿੰਦੇ ਹੋਏ ਕਿਹਾ ਕਿ ਅਲੀ ਵੀ ਸਾਡੇ ਹਨ ਅਤੇ ਬਜਰੰਗ ਬਲੀ ਵੀ, ਦੋਵੇਂ ਸਾਡੇ ਆਪਣੇ ਹਨ, ਦੋਵਾਂ ਵਿੱਚੋਂ ਕੋਈ ਵੀ ਗੈਰ ਨਹੀਂ ਹੈ। ਸਾਨੂੰ ਅਲੀ ਵੀ ਚਾਹੀਦਾ ਹੈ ਅਤੇ ਬਜਰੰਗ ਬਲੀ ਵੀ। ਭਾਜਪਾ ਨੂੰ ਨਾ ਤਾਂ ਅਲੀ ਦੇ ਵੋਟ ਮਿਲਣਗੇ ਅਤੇ ਨਾ ਬਜਰੰਗ ਬਲੀ ਦੇ। ਸਾਡਾ ਗਠਜੋੜ ਦੋਵਾਂ ਦੀ ਮਦਦ ਨਾਲ ਸ਼ਾਨਦਾਰ ਜਿੱਤ ਹਾਸਲ ਕਰੇਗਾ।
ਵਰਨਣ ਯੋਗ ਹੈ ਕਿ ਮਾਇਆਵਤੀ ਏਥੇ ਬਦਾਯੂੰ ਤੋਂ ਸਮਾਜਵਾਦੀ ਪਾਰਟੀ ਦੇ ਉਮੀਦਵਾਰ ਧਰਮਿੰਦਰ ਯਾਦਵ ਦੇ ਸਮਰਥਨ ਵਿੱਚ ਸਮਾਜਵਾਦੀ ਪਾਰਟੀ ਦੇ ਮੁਖੀ ਅਖਿਲੇਸ਼ ਯਾਦਵ ਦੇ ਨਾਲ ਤੇ ਬੁਲੰਦਸ਼ਹਿਰ ਦੇ ਅਨੂਪਸ਼ਹਿਰ ਵਿੱਚ ਬਸਪਾ ਉਮੀਦਵਾਰ ਦੇ ਹੱਕ ਵਿੱਚ ਜਯੰਤ ਚੌਧਰੀ ਦੇ ਨਾਲ ਰੈਲੀ ਨੂੰ ਸੰਬੋਧਨ ਕਰਨ ਆਏ ਸਨ। ਉਨ੍ਹਾਂ ਨੇ ਕਿਹਾ ਕਿ ਭੀੜ ਨੂੰ ਦੇਖ ਕੇ ਲੱਗਦਾ ਹੈ ਕਿ ਨਮੋ-ਨਮੋ ਵਾਲੇ ਜਾ ਰਹੇ ਹਨ, ਜੈ ਭੀਮ ਵਾਲੇ ਆ ਰਹੇ ਹਨ। ਇਸ ਦੌਰਾਨ ਬਜਰੰਗ ਬਲੀ ਨੂੰ ਦਲਿਤ ਦੱਸਣ ਵਾਲੇ ਯੋਗੀ ਆਦਿਤਿਆਨਾਥ ਦੇ ਬਿਆਨ ਉਤੇ ਵਿਅੰਗ ਕੱਸਦੇ ਹੋਏ ਮਾਇਆਵਤੀ ਨੇ ਕਿਹਾ ਕਿ ਸਾਨੂੰ ਬਜਰੰਗ ਬਲੀ ਦੀ ਜ਼ਰੂਰਤ ਇਸ ਲਈ ਵੀ ਜ਼ਿਆਦਾ ਹੈ ਕਿ ਉਹ ਆਪਣੀ ਜਾਤ ਦੇ ਹਨ, ਦਲਿਤ ਹਨ, ਯੋਗੀ ਨੇ ਹੀ ਉਨ੍ਹਾਂ ਦੀ ਜਾਤ ਦੀ ਖੋਜ ਕੀਤੀ ਸੀ। ਇਸ ਦੇ ਲਈ ਉਹ ਯੋਗੀ ਦੀ ਸ਼ੁਕਰਗੁਜ਼ਾਰ ਹੈ।
ਇਸ ਦੋਰਾਨ ਅਖਿਲੇਸ਼ ਨੇ ਕਿਹਾ, ਮਾਹੌਲ ਸਾਡੇ ਮਹਾਗਠਜੋੜ ਦੇ ਹੱਕ ਵਿੱਚ ਹੈ। ਪ੍ਰਧਾਨ ਮੰਤਰੀ ਤੋਂ ਲੈ ਕੇ ਭਾਜਪਾ ਦੇ ਛੋਟੇ ਨੇਤਾ ਤੱਕ ਜਿਸ ਤਰ੍ਹਾਂ ਖੁਦ ਨੂੰ ਚੌਕੀਦਾਰ ਦੱਸਦੇ ਹਨ, ਉਨ੍ਹਾਂ ਦੀ ਹਾਜ਼ਰੀ ਵਿੱਚ ਖਾਦ ਚੋਰੀ ਹੋ ਗਈ। ਬੇਰੋਜ਼ਗਾਰਾਂ ਦੇ ਸੁਫਨੇ, ਬਜ਼ੁਰਗਾਂ ਦੀ ਪੈਨਸ਼ਨ ਅਤੇ ਨੌਜਵਾਨਾਂ ਦੀਆਂ ਉਮੀਦਾਂ 'ਤੇ ਪਾਣੀ ਫੇਰ ਦਿੱਤਾ ਗਿਆ।