ਯੂ ਐੱਨ, 25 ਮਾਰਚ (ਪੋਸਟ ਬਿਊਰੋ)- ਭਾਰਤ ਨੇ ਸਾਲ 2017 ਤੱਕ ਐੱਚ ਆਈ ਵੀ ਤੋਂ ਪੀੜਤ ਲੋਕਾਂ ਦੀਆਂ ਟੀ ਬੀ ਨਾਲ ਹੋਣ ਵਾਲੀਆਂ ਮੌਤਾਂ ਨੂੰ 84 ਫੀਸਦੀ ਤੱਕ ਘੱਟ ਕਰਨ ਵਿੱਚ ਕਾਮਯਾਬੀ ਹਾਸਲ ਕੀਤੀ ਹੈ।
ਇਸ ਸੰਬੰਧ ਵਿੱਚ ਐੱਚ ਆਈ ਵੀ ਏਡਜ਼ ਉਤੇ ਯੂ ਐੱਨ ਦੇ ਸਾਂਝੇ ਪ੍ਰੋਗਰਾਮ (ਯੂ ਐੱਨ ਏਡਜ਼) ਨੇ ਦੱਸਿਆ ਕਿ ਇਹ ਕਮੀ 2020 ਦੀ ਤੈਅ ਕੀਤੀ ਹੋਈ ਮਿਆਦ ਤੋਂ ਤਿੰਨ ਸਾਲ ਪਹਿਲਾਂ ਹਾਸਲ ਕੀਤੀ ਗਈ ਹੈ ਅਤੇ ਟੀ ਬੀ ਨਾਲ ਹੋਣ ਵਾਲੀਆਂ ਮੌਤਾਂ ਦੇ ਮਾਮਲੇ ਵਿੱਚ 20 ਤੋਂ ਵੱਧ ਦੇਸ਼ਾਂ ਵਿੱਚ ਭਾਰਤ ਵਿੱਚ ਸਭ ਤੋਂ ਵੱਧ ਗਿਰਾਵਟ ਦੇਖੀ ਗਈ ਹੈ। ਯੂ ਐੱਨ ਏਡਜ਼ ਨੇ ਬੀਤੇ ਦਿਨ ਵਿਸ਼ਵ ਟੀ ਬੀ ਦਿਵਸ ਦੇ ਮੱਦੇਨਜ਼ਰ 2020 ਤੱਕ ਐੱਚ ਆਈ ਵੀ ਨਾਲ ਜਿਉਂਦੇ ਲੋਕਾਂ ਵਿੱਚ ਟੀ ਬੀ ਨਾਲ ਹੋਣ ਵਾਲੀਆਂ ਮੌਤਾਂ ਨੂੰ 75 ਫੀਸਦੀ ਤੱਕ ਘੱਟ ਕਰਨ ਦਾ ਟੀਚਾ ਪੂਰਾ ਕਰਨ ਲਈ ਦੇਸ਼ਾਂ ਨੂੰ ਤੇਜ਼ੀ ਨਾਲ ਕਦਮ ਚੁੱਕਣ ਦੀ ਅਪੀਲ ਕੀਤੀ ਸੀ। ਵਿਸ਼ਵ ਸਿਹਤ ਸੰਗਠਨ ਦੇ ਅਨੁਸਾਰ ਦੁਨੀਆ ਭਰ ਵਿੱਚ ਐੱਚ ਆਈ ਵੀ ਨਾਲ ਜੀਅ ਰਹੇ ਲੋਕਾਂ ਵਿੱਚ ਟੀ ਬੀ ਨਾਲ ਹੋਣ ਵਾਲੀਆਂ ਮੌਤਾਂ ਵਿੱਚ 2010 ਦੇ ਬਾਅਦ ਤੋਂ 42 ਫੀਸਦੀ ਕਮੀ ਆਈ ਹੈ। ਸਾਲ 2010 ਤੋਂ ਲੈ ਕੇ 2017 ਤੱਕ ਦੌਰਾਨ ਟੀ ਬੀ ਨਾਲ ਹੋਣ ਵਾਲੀਆਂ ਮੌਤਾਂ 2017 ਵਿੱਚ ਟੀ ਬੀ ਨਾਲ ਹੋ ਰਹੀਆਂ ਮੌਤਾਂ 5,20,000 ਤੋਂ ਘਟ ਕੇ 3,00,000 ਰਹਿ ਗਈਆਂ ਹਨ। ਯੂ ਐੱਨ ਏਡਜ਼ ਦੇ ਕਾਰਜਕਾਰੀ ਡਾਇਰੈਕਟਰ ਮਾਈਕਲ ਸਿਡਿਬੀ ਨੇ ਕਿਹਾ ਕਿ ਟੀ ਬੀ ਬੀਤੇ ਦੌਰ ਦੀ ਬਿਮਾਰੀ ਹੋਣੀ ਚਾਹੀਦਾ ਹੈ। ਦਹਾਕਿਆਂ ਤੋਂ ਇਸ ਦਾ ਇਲਾਜ ਸੰਭਵ ਹੈ ਅਤੇ ਇਸ ਤੋਂ ਬਚਿਆ ਜਾ ਸਕਦਾ ਹੈ। ਦੁਨੀਆ ਦੇ ਗਰੀਬ ਲੋਕਾਂ ਦੇ ਮੌਲਿਕ ਸਿਹਤ ਦੇਖਭਾਲ, ਭੋਜਨ ਅਤੇ ਰਿਹਾਇਸ਼ ਦੇ ਅਧਿਕਾਰ ਨੂੰ ਸਾਲਾਂ ਤੱਕ ਨਜ਼ਰਅੰਦਾਜ਼ ਕਰਨ ਕਾਰਨ ਟੀ ਬੀ ਨੂੰ ਫੈਲਣ ਦਾ ਮੌਕਾ ਮਿਲਿਆ।