ਜਰਮਨੀ, 26 ਸਤੰਬਰ (ਪੋਸਟ ਬਿਊਰੋ)- ਬਰਲਿਨ ਵਿੱਚ ਹੋਣ ਵਾਲੀ ਪਹਿਲੀ ਇੰਟਰਨੈਸ਼ਨਲ ਟਰਾਂਸਪੋਰਟ ਪ੍ਰਦਰਸ਼ਨੀ ਵਿੱਚ ਪਹਿਲੀ ਚਾਲਕ ਰਹਿਤ ਟ੍ਰਾਮ ਦਾ ਸਫਲ ਪ੍ਰੀਖਣ ਕੀਤਾ ਗਿਆ। ਇਸ ਵਿੱਚ ਸਾਰੇ ਕੰਮ ਇੱਕ ਕੰਪਿਊਟਰ ਕਰਦਾ ਹੈ। ਦੁਨੀਆ ਵਿੱਚ ਇਸ ਤਰ੍ਹਾਂ ਦੀਆਂ ਹੋਰ ਵੀ ਤਕਨੀਕਾਂ ਹਨ, ਪਰ ਜਰਮਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਤਕਨੀਕ ਸਭ ਤੋਂ ਅਲੱਗ ਹੈ। ਇਹ ਟ੍ਰਾਮ ਉਨ੍ਹਾਂ ਟਰੈਕਾਂ 'ਤੇ ਹੀ ਚੱਲੇਗੀ, ਜਿਨ੍ਹਾਂ 'ਤੇ ਹੋਰ ਡਰਾਈਵਰ ਟ੍ਰਾਮ ਚਲਾਉਂਦੇ ਹਨ।
ਦੁਨੀਆ ਦੀ ਇਸ ਪਹਿਲੀ ਚਾਲਕ ਰਹਿਤ ਟ੍ਰਾਮ ਨੂੰ 50 ਕੰਪਿਊਟਰ ਵਿਗਿਆਨੀਆਂ ਅਤੇ ਇੰਜੀਨੀਅਰਾਂ ਦੀ ਟੀਮ ਨੇ ਵਿਕਸਿਤ ਕੀਤਾ ਹੈ। ਇਹ ਟ੍ਰਾਮ ਰਡਾਰ ਤੇ ਕੈਮਰਾ ਸੈਂਸਰ ਨਾਲ ਲੈਸ ਹੈ। ਇਸ ਦੇ ਨਾਲ ਇਹ ਟ੍ਰਾਮ 19 ਐਲਗੋਰਿਮਦ 'ਤੇ ਆਧਾਰਤ ਹੈ, ਜੋ ਟਰੈਕਸਾਈਡ ਸਿਗਨਲ ਦਿੰਦੀ ਤੇ ਪੈਦਲ ਚੱਲਣ ਵਾਲਿਆਂ ਤੇ ਵਾਹਨਾਂ ਨੂੰ ਪਾਰ ਕਰਨ ਦੇ ਖਤਰਿਆਂ ਨੂੰ ਪਹਿਲਾਂ ਦੱਸ ਦਿੰਦੀ ਹੈ। ਐਮਰਜੈਂਸੀ ਹਾਲਤ ਲਈ ਸੁਰੱਖਿਆ ਚਾਲਕ ਨਾਲ ਇਸ ਨੂੰ ਛੇ ਕਿਲੋਮੀਟਰ ਟੈਸਟਿੰਗ ਟਰੈਕ 'ਤੇ ਚਲਾਇਆ ਗਿਆ ਹੈ। ਇਸ ਯੋਜਨਾ ਦੇ ਮੈਨੇਜਰ ਓਲਿਵਰ ਗਲੇਸਰ ਨੇ ਕਿਹਾ ਕਿ ਉਨ੍ਹਾਂ ਦੀ ਪਹਿਲ ਸੁਰੱਖਿਆ ਹੈ, ਜਿਸ ਵਿੱਚ 420 ਮੁਲਾਜ਼ਮ ਹਨ ਤੇ ਸਾਲਾਨਾ 33 ਮਿਲੀਅਨ ਯਾਤਰੀਆਂ ਦੀ ਸੁਰੱਖਿਆ ਹੈ। ਉਨ੍ਹਾਂ ਭਰੋਸਾ ਜਤਾਇਆ ਕਿ ਇਸ ਯੋਜਨਾ ਨਾਲ ਨੌਕਰੀਆਂ 'ਤੇ ਮਾੜਾ ਅਸਰ ਨਹੀਂ ਪਏਗਾ।