ਬਰਨਾਬੀ, 20 ਫਰਵਰੀ (ਪੋਸਟ ਬਿਊਰੋ) : ਫੈਡਰਲ ਐਨਡੀਪੀ ਆਗੂ ਜਗਮੀਤ ਸਿੰਘ ਉੱਤਰੀ ਬ੍ਰਿਟਿਸ਼ ਕੋਲੰਬੀਆ ਵਿੱਚ 40 ਬਿਲੀਅਨ ਡਾਲਰ ਦੇ ਐਲਐਨਜੀ ਕੈਨੇਡਾ ਪ੍ਰੋਜੈਕਟ ਦੇ ਹੱਕ ਵਿੱਚ ਹਨ ਜਦਕਿ ਉਨ੍ਹਾਂ ਨੂੰ ਆਪਂਣੀ ਪਾਰਟੀ ਦੇ ਅੰਦਰੋਂ ਹੀ ਵਾਤਾਵਰਣ ਵਿੱਚ ਹੋਣ ਵਾਲੀਆਂ ਤਬਦੀਲੀਆਂ ਲਈ ਕੋਈ ਸਖ਼ਤ ਕਦਮ ਚੁੱਕਣ ਵਾਸਤੇ ਆਖਿਆ ਜਾ ਰਿਹਾ ਹੈ।
ਜਨਰਲ ਚੋਣਾਂ ਵਿੱਚ ਬਰਨਾਬੀ ਨੌਰਥ-ਸੇਅਮੌਰ ਤੋਂ ਐਨਡੀਪੀ ਉਮੀਦਵਾਰ ਵੈਂਡ ਰੌਬਿਨਸਨ ਵੱਲੋਂ ਕਿਸੇ ਵੀ ਤਰ੍ਹਾਂ ਦੇ ਨਵੇਂ ਤੇਲ ਤੇ ਗੈਸ ਇਨਫਰਾਸਟ੍ਰਕਚਰ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ। ਮਾਂਟਰੀਅਲ ਵਿੱਚ ਆਊਟਰਮੌਂਟ ਤੋਂ ਜਿ਼ਮਨੀ ਚੋਣ ਲੜਨ ਵਾਲੀ ਜੂਲੀਆ ਸਾਂਚੇਜ਼ ਵੱਲੋਂ ਵੀ ਅਜਿਹੇ ਪ੍ਰੋਜੈਕਟਾਂ ਲਈ ਜਨਤਾ ਦਾ ਪੈਸਾ ਲਾਉਣ ਤੋਂ ਇਤਰਾਜ਼ ਪ੍ਰਗਟਾਇਆ ਗਿਆ ਹੈ। ਜਿ਼ਕਰਯੋਗ ਹੈ ਕਿ ਜਗਮੀਤ ਸਿੰਘ ਬਰਨਾਬੀ ਸਾਊਥ ਤੋਂ ਜਿ਼ਮਨੀ ਚੋਣ ਲੜ ਕੇ ਪਾਰਲੀਆਮੈਂਟ ਵਿੱਚ ਥਾਂ ਪੱਕੀ ਕਰਨੀ ਚਾਹੁੰਦੇ ਹਨ।
ਜਗਮੀਤ ਸਿੰਘ ਵੱਲੋਂ ਟਰਾਂਸ ਮਾਊਨਟੇਨ ਪਾਈਪਲਾਈਨ ਦੇ ਪਸਾਰ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ। ਅਜਿਹਾ ਇਸ ਲਈ ਕਿਉਂਕਿ ਇਸ ਨਾਲ ਮੈਟਰੋ ਵੈਨਕੂਵਰ ਸ਼ਹਿਰ ਤੋਂ ਟੈਂਕਰ ਟਰੈਫਿਕ ਵੱਧ ਜਾਵੇਗਾ ਪਰ ਉਨ੍ਹਾਂ ਲੀਕੁਈਫਾਈਡ ਨੈਚੂਰਲ ਗੈਸ ਪਾਈਪਲਾਈਨ ਤੇ ਐਕਸਪੋਰਟ ਫੈਸਿਲਿਟੀ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਇੰਡੀਜੀਨਸ ਚੀਫਜ਼ ਵੱਲੋਂ ਵੀ ਇਸ ਤਰ੍ਹਾਂ ਦੇ ਪ੍ਰੋਜੈਕਟ ਦਾ ਵਿਰੋਧ ਕੀਤਾ ਜਾ ਰਿਹਾ ਸੀ ਤੇ ਆਰਸੀਐਮਪੀ ਨੇ 14 ਲੋਕਾਂ ਨੂੰ ਪਿਛਲੇ ਮਹੀਨੇ ਗ੍ਰਿਫਤਾਰ ਵੀ ਕੀਤਾ ਸੀ ਪਰ ਬਾਅਦ ਵਿੱਚ ਇਨ੍ਹਾਂ ਚੀਫਜ਼ ਨਾਲ ਪੁਲਿਸ ਵੱਲੋਂ ਡੀਲ ਸਿਰੇ ਚੜ੍ਹਾਈ ਗਈ ਤੇ ਉਹ ਪਾਈਪਲਾਈਨ ਦਾ ਕੰਮ ਜਾਰੀ ਰੱਖਣ ਲਈ ਰਾਜ਼ੀ ਹੋ ਗਏ।
ਘੱਟ ਫੰਡਰੇਜਿ਼ੰਗ ਤੇ ਚੋਣਾਂ ਵਿੱਚ ਪਾਰਟੀ ਦਾ ਸਮਰਥਨ ਘਟਣ ਕਾਰਨ ਜਗਮੀਤ ਸਿੰਘ ਨੂੰ ਪਾਰਟੀ ਵਿੱਚੋਂ ਹੀ ਨੁਕਤਾਚੀਨੀ ਦਾ ਸਾਹਮਣਾ ਕਰਦਿਆਂ ਹੋਇਆਂ ਵੀ ਏਕਤਾ ਦਾ ਮੁਜ਼ਾਹਰਾ ਕਰਨ ਦੀ ਕੋਸਿ਼ਸ਼ ਕੀਤੀ ਹੈ। ਜੇ ਉਹ ਸੋਮਵਾਰ ਨੂੰ ਜਿ਼ਮਨੀ ਚੋਣ ਜਿੱਤ ਜਾਂਦੇ ਹਨ ਤਾਂ ਉਹ ਵਾਤਾਵਰਣ ਵਿੱਚ ਹੋ ਰਹੀਆਂ ਤਬਦੀਲੀਆਂ ਲਈ ਆਪਣੇ ਹੀ ਕਾਕਸ ਵੱਲੋਂ ਸਖ਼ਤ ਕਦਮ ਚੁੱਕਣ ਦੀ ਕੀਤੀ ਜਾ ਰਹੀ ਮੰਗ ਦਾ ਟਾਕਰਾ ਕਰ ਸਕਣਗੇ।