ਨਵੀਂ ਦਿੱਲੀ, 19 ਫਰਵਰੀ (ਪੋਸਟ ਬਿਊਰੋ)- ਜੈਸ਼ ਇ ਮੁਹੰਮਦ ਦੇ ਮੁਖੀ ਮੌਲਾਨਾ ਮਸੂਦ ਅਜ਼ਹਰ ਦੀ 1994 ਵਿੱਚ ਹੋਈ ਗ੍ਰਿਫਤਾਰੀ ਤੋਂ ਬਾਅਦ ਉਸ ਤੋਂ ਪੁੱਛ ਪੜਤਾਲ ਕਰਨ ਵਾਲੇ ਇਕ ਸਾਬਕਾ ਪੁਲਸ ਅਧਿਕਾਰੀ ਨੇ ਦਾਅਵਾ ਕੀਤਾ ਹੈ ਕਿ ਦੁਨੀਆ ਦੇ ਸਭ ਤੋਂ ਖਤਰਨਾਕ ਅੱਤਵਾਦੀਆਂ ਵਿੱਚ ਸ਼ੁਮਾਰ ਅਜ਼ਹਰ ‘ਇਕ ਥੱਪੜ ਦੀ ਮਾਰ ਹੈ' ਅਤੇ ਹਿਰਾਸਤ ਵਿੱਚ ਪੁੱਛਗਿੱਛ ਵੇਲੇ ਉਹ ‘ਕੰਬਣ' ਲੱਗ ਜਾਂਦਾ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਮਸੂਦ ਅਜ਼ਹਰ ਪੁਰਤਗਾਲ ਦੇ ਪਾਸਪੋਰਟ ਉੱਤੇ ਬੰਗਲਾਦੇਸ਼ ਵੱਲ ਦੀ ਭਾਰਤ ਦਾਖਲ ਹੋਇਆ ਸੀ ਤੇ ਉਸ ਤੋਂ ਬਾਅਦ ਕਸ਼ਮੀਰ ਪੁੱਜ ਗਿਆ ਸੀ। ਉਸ ਨੂੰ 1994 ਵਿੱਚ ਦੱਖਣੀ ਕਸ਼ਮੀਰ ਦੇ ਅਨੰਤਨਾਗ ਤੋਂ ਗ੍ਰਿਫਤਾਰ ਕੀਤਾ ਗਿਆ ਸੀ। ਇੰਟੈਲੀਜੈਂਸ ਬਿਊਰੋ ਵਿੱਚ ਕਰੀਬ ਦੋ ਦਹਾਕੇ ਸੇਵਾਵਾਂ ਦਿੰਦੇ ਰਹੇ ਅਤੇ ਸਿੱਕਿਮ ਪੁਲਸ ਦੇ ਸਾਬਕਾ ਡਾਇਰੈਕਟਰ ਜਨਰਲ ਅਵਿਨਾਸ਼ ਮੋਹਨਾਨੇ ਨੇ ਕਿਹਾ ਕਿ ਹਿਰਾਸਤ ਦੌਰਾਨ ਏਜੰਸੀਆਂ ਨੂੰ ਜ਼ਿਆਦਾ ਜੱਦੋ ਜਹਿਦ ਨਹੀਂ ਕਰਨੀ ਪਈ ਤੇ ਇੱਕੋ ਚਪੇੜ ਪਿੱਛੋਂ ਮਸੂਦ ਅਜ਼ਹਰ ਨੇ ਭੇਤ ਦੱਸਣੇ ਸ਼ੁਰੂ ਕਰ ਦਿੱਤੇ ਸਨ। ਉਸ ਨੇ ਪਾਕਿਸਤਾਨ ਵਿਚਲੇ ਅੱਤਵਾਦੀ ਟਿਕਾਣਿਆਂ ਦੀ ਜਾਣਕਾਰੀ ਵੀ ਦੇ ਦਿੱਤੀ ਸੀ। ਬਾਅਦ ਵਿੱਚ ਮਸੂਦ ਅਜ਼ਹਰ ਨੂੰ ਅਗਵਾ ਕੀਤੀ ਗਈ ਇੰਡੀਅਨ ਏਅਰਲਾਈਨਜ਼ ਦੀ ਉਡਾਨ ਬਦਲੇ 1999 ਵਿੱਚ ਓਦੋਂ ਦੀ ਭਾਜਪਾ ਸਰਕਾਰ ਨੇ ਰਿਹਾਅ ਕੀਤਾ ਸੀ। ਇਸ ਤੋਂ ਬਾਅਦ ਅਜ਼ਹਰ ਨੇ ਜੈਸ਼-ਏ-ਮੁਹੰਮਦ ਬਣਾਈ ਤੇ ਭਾਰਤ ਖਿਲਾਫ ਕਈ ਵੱਡੇ ਅੱਤਵਾਦੀ ਹਮਲੇ ਕੀਤੇ ਸਨ। ਇਨ੍ਹਾਂ ਵਿੱਚ ਪਾਰਲੀਮੈਂਟ ਉੱਤੇ ਹਮਲਾ, ਪਠਾਨਕੋਟ ਏਅਰਬੇਸ, ਉੜੀ ਫੌਜੀ ਕੈਂਪ ਅਤੇ 14 ਫਰਵਰੀ ਨੂੰ ਪੁਲਵਾਮਾ ਵਿੱਚ ਕੀਤਾ ਗਿਆ ਹਮਲਾ ਵੌ ਸ਼ਾਮਲ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਅਜ਼ਹਰ ਨੇ ਅੱਤਵਾਦੀ ਸੰਗਠਨਾਂ ਲਈ ਹੁੰਦੀ ਭਰਤੀ ਅਤੇ ਇਨ੍ਹਾਂ ਦੀ ਕਾਰਜਪ੍ਰਣਾਲੀ, ਆਈ ਐਸ ਆਈ ਦੀ ਭੂਮਿਕਾ ਬਾਰੇ ਵੀ ਜਾਣਕਾਰੀ ਦੇ ਦਿੱਤੀ ਸੀ। ਸਾਬਕਾ ਆਈ ਪੀ ਐਸ ਅਧਿਕਾਰੀ ਅਵਿਨਾਸ਼ ਓਦੋਂ ਕਸ਼ਮੀਰ ਡੈਸਕ ਦੇਖਦੇ ਸਨ ਤੇ ਉਨ੍ਹਾਂ ਵਿੱਚ ਅਜ਼ਹਰ ਕੋਲੋਂ ਕਈ ਵਾਰ ਪੁੱਛ ਪੜਤਾਲ ਕੀਤੀ ਸੀ।