ਨਵੀਂ ਦਿੱਲੀ, 13 ਫਰਵਰੀ, (ਪੋਸਟ ਬਿਊਰੋ)- ਅਗਲੇ ਮਹੀਨੇ ਸੁਰੂ ਹੋਣ ਜਾ ਰਹੀਆਂ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਮੋਦੀ ਨੇ ਅੱਜ ਪਾਰਲੀਮੈਂਟ ਨੂੰ ਆਖਰੀ ਵਾਰ ਸੰਬੋਧਨ ਕਰਨ ਦੇ ਵਕਤ ਜਿੱਥੇ ਆਪਣੀ ਸਰਕਾਰ ਦੀਆਂ ਪ੍ਰਾਪਤੀਆਂ ਗਿਣਾਈਆਂ, ਓਥੇ ਨਾਲ ਹੀ ਪਾਰਲੀਮੈਂਟ ਵਿੱਚ ਗੁਜ਼ਰੇ ਉਨ੍ਹਾਂ ਪਲਾਂ ਨੂੰ ਯਾਦ ਕੀਤਾ, ਜਿਸ ਨਾਲ ਪਾਰਲੀਮੈਂਟ ਦਾ ਇਹ ਪੰਜ ਸਾਲਾ ਦੌਰ ਮੀਡੀਆ ਦੀਆਂ ਸੁਰਖੀਆਂ ਵਿੱਚ ਰਿਹਾ ਸੀ।
ਪ੍ਰਧਾਨ ਮੰਤਰੀ ਮੋਦੀ ਨੇ ਦੋਵਾਂ ਸਦਨਾਂ ਦੇ ਪਾਰਲੀਮੈਂਟ ਮੈਂਬਰਾਂ ਦਾ ਧੰਨਵਾਦ ਕੀਤਾ ਤੇ ਹਲਕੇ ਅੰਦਾਜ਼ ਵਿਚ ਰਾਹੁਲ ਗਾਂਧੀ ਉੱਤੇ ਵਿਅੰਗ ਕੱਸੇ। ਉਨ੍ਹਾਂ ਕਿਹਾ ਕਿ ਪਹਿਲੀ ਵਾਰ ਮੈਨੂੰ ਪਤਾ ਲੱਗਾ ਕਿ ਗਲੇ ਲੱਗਣਾ ਅਤੇ ਗਲ ਪੈਣਾ ਵਿੱਚ ਕਿੰਨਾ ਫਰਕ ਹੈ। ਉਨ੍ਹਾਂ ਕਿਹਾ ਕਿ ਪਹਿਲੀ ਵਾਰ ਵੇਖਿਆ ਕਿ ਸਦਨ ਵਿਚ ਅੱਖਾਂ ਨਾਲ ਵੀ ਗੁਸਤਾਖੀਆਂ ਹੁੰਦੀਆਂ ਹਨ। ਮੋਦੀ ਨੇ ਕਿਹਾ ਕਿ 2014 ਵਿਚ ਮੈਂ ਪਹਿਲੀ ਵਾਰ ਪਾਰਲੀਮੈਂਟ ਵਿੱਚ ਆਏ ਮੈਂਬਰਾਂ ਵਿੱਚੋਂ ਇਕ ਸੀ। ਮੈਨੂੰ ਪਾਰਲੀਮੈਂਟ ਦਾ ਕੁਝ ਪਤਾ ਨਹੀਂ ਸੀ। ਮੇਰੇ ਲਈ ਹਰ ਚੀਜ ਨਵੀਂ ਸੀ। ਕਰੀਬ ਤਿੰਨ ਦਹਾਕੇ ਬਾਅਦ ਇਕ ਪੂਰਨ ਬਹੁਮਤ ਵਾਲੀ ਸਰਕਾਰ ਬਣੀ ਸੀ। ਇਸ ਲੋਕ ਸਭਾ ਵਿਚ 100 ਫੀਸਦੀ ਤੋਂ ਵੱਧ ਕੰਮ ਹੋਇਆ। ਉਨ੍ਹਾ ਕਿਹਾ ਕਿ ਇਸ ਲੋਕ ਸਭਾ ਉੱਤੇ ਇਸ ਗੱਲ ਲਈ ਮਾਣ ਕਰਾਂਗੇ ਕਿ ਪਹਿਲੀ ਵਾਰ ਸਭ ਤੋਂ ਵੱਧ ਮਹਿਲਾ ਪਾਰਲੀਮੈਂਟ ਮੈਂਬਰ ਚੁਣ ਕੇ ਆਈਆਂ। ਮੋਦੀ ਨੇ ਕਿਹਾ ਕਿ ਪਹਿਲੀ ਵਾਰ ਕਾਂਗਰਸ ਗੋਤਰ ਦੇ ਬਿਨਾਂ ਮਿਲੀ ਜੁਲੀ ਸਰਕਾਰ ਵਾਜਪਾਈ ਦੀ ਬਣੀ ਸੀ। ਪਹਿਲੀ ਵਾਰ ਬਿਨਾਂ ਕਾਂਗਰਸ ਗੋਤਰ ਦੀ ਬਹੁਮਤ ਵਾਲੀ ਸਰਕਾਰ ਸਾਡੀ ਬਣੀ। ਮੋਦੀ ਨੇ ਕਿਹਾ ਕਿ ਅੱਜ ਸੰਸਾਰ ਵਿਚ ਭਾਰਤ ਦਾ ਇਕ ਵੱਖਰਾ ਸਥਾਨ ਹੈ, ਜਿਸ ਦਾ ਪੂਰਾ ਮਾਣ ਪੂਰਨ ਬਹੁਮਤ ਦੀ ਸਰਕਾਰ ਬਣਾਉਣ ਵਾਲੇ ਦੇਸ਼ ਦੇ ਸਵਾ ਸੌ ਕਰੋੜ ਦੇਸ਼ ਵਾਸੀਆਂ ਨੂੰ ਜਾਂਦਾ ਹੈ।