ਓਟਵਾ, 4 ਫਰਵਰੀ (ਪੋਸਟ ਬਿਊਰੋ) : ਟੋਰਾਂਟੋ ਤੋਂ ਲਿਬਰਲ ਐਮਪੀ ਨੇ ਸ਼ਨਿੱਚਰਵਾਰ ਸਵੇਰੇ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੇ ਸਬੰਧ ਵਿੱਚ ਕੀਤੇ ਗਏ ਆਪਣੇ ਟਵੀਟ ਲਈ ਮੁਆਫੀ ਮੰਗੀ ਹੈ।
ਐਡਮ ਵਾਅਨ ਨੇ ਆਖਿਆ ਸੀ ਕਿ ਲੋਕਾਂ ਨੂੰ ਫੋਰਡ ਨੂੰ ਪਟੋਲੀ ਮਾਰਨੀ ਚਾਹੀਦੀ ਹੈ। ਬਾਅਦ ਵਿੱਚ ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਨੇ ਤਾਂ ਗੇਮ ਵ੍ਹੈਕ-ਅ-ਮੋਲ ਦਾ ਜਿ਼ਕਰ ਕੀਤਾ ਸੀ। ਵਾਅਨ ਉਦੋਂ ਤੋਂ ਫੋਰਡ ਸਰਕਾਰ ਦੀ ਆਲੋਚਨਾ ਕਰਦੇ ਰਹੇ ਹਨ ਜਦੋਂ ਦੋਵੇਂ ਟੋਰਾਂਟੋ ਸਿਟੀ ਕਾਉਂਸਲ ਵਿੱਚ ਬੈਠਦੇ ਹੁੰਦੇ ਸਨ। 2014 ਵਿੱਚ ਫੈਡਰਲ ਸਿਆਸਤ ਵਿੱਚ ਪੈਰ ਧਰਨ ਤੋਂ ਪਹਿਲਾਂ ਵਾਅਨ ਨੇ ਟੋਰਾਂਟੋ ਦੇ ਸਾਬਕਾ ਮੇਅਰ ਰੌਬ ਫੋਰਡ, ਡੱਗ ਫੋਰਡ ਦੇ ਭਰਾ ਜਿਨ੍ਹਾਂ ਦੀ ਮੌਤ 2016 ਵਿੱਚ ਹੋਈ ਸੀ, ਦੀਆਂ ਨੀਤੀਆਂ ਦੀ ਵੀ ਜੰਮ ਕੇ ਨਿਖੇਧੀ ਕੀਤੀ ਸੀ।
ਪ੍ਰੋਵਿੰਸ ਵਿੱਚ ਫੁੱਲ ਡੇਅ ਕਿੰਡਰਗਾਰਟਨ ਨੂੰ ਰੱਦ ਕਰਨ ਦੇ ਫੈਸਲੇ ਉੱਤੇ ਗੱਲ ਕਰਨ ਤੋਂ ਟਾਲਾ ਵੱਟਣ ਵਾਲੀ ਫੋਰਡ ਸਰਕਾਰ ਵੱਲੋਂ ਇਸ ਸਬੰਧੀ ਕੀਤੇ ਟਵੀਟ ਬਾਬਤ ਹੀ ਵਾਅਨ ਨੇ ਸ਼ਨਿੱਚਰਵਾਰ ਨੂੰ ਇਹ ਟਵੀਟ ਕੀਤਾ ਸੀ। ਪਰ ਇਸ ਉੱਤੇ ਕਈ ਲੋਕਾਂ ਵੱਲੋਂ ਇਤਰਾਜ਼ ਪ੍ਰਗਟਾਏ ਜਾਣ ਉਪਰੰਤ ਸ਼ਨਿੱਚਰਵਾਰ ਰਾਤ ਨੂੰ ਵਾਅਨ ਨੇ ਮੁਆਫੀ ਮੰਗ ਲਈ।