ਓਟਵਾ, 3 ਫਰਵਰੀ (ਪੋਸਟ ਬਿਊਰੋ) : ਪਾਰਲੀਆਮੈਂਟ ਦੇ ਸਿਆਹ ਕਾਕਸ ਦੇ ਮੁਖੀ ਦਾ ਕਹਿਣਾ ਹੈ ਕਿ ਸਿਆਹ ਨਸਲ ਦੇ ਕੈਨੇਡੀਅਨਾਂ ਨੂੰ ਦਰਪੇਸ਼ ਸਮੱਸਿਆਵਾਂ ਨੂੰ ਸੁਲਝਾਉਣ ਲਈ ਫੈਡਰਲ ਸਰਕਾਰ ਵੱਲੋਂ ਕੋਸਿ਼ਸ਼ਾਂ ਤੇਜ਼ ਕਰਨ ਦਾ ਜਿਹੜਾ ਵਾਅਦਾ ਕੀਤਾ ਗਿਆ ਸੀ ਉਸ ਨੂੰ ਅਜੇ ਬੂਰ ਨਹੀਂ ਪਿਆ ਹੈ। ਉਨ੍ਹਾਂ ਇਸ ਮਾਮਲੇ ਵਿੱਚ ਸਰਕਾਰ ਦੀ ਧੀਮੀ ਰਫਤਾਰ ਦੀ ਵੀ ਸਿ਼ਕਾਇਤ ਕੀਤੀ।
ਇੱਕ ਸਾਲ ਪਹਿਲਾਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇੱਕ ਮਿਲੀਅਨ ਤੋਂ ਵੀ ਵੱਧ ਸਿਆਹ ਕੈਨੇਡੀਅਨਾਂ ਨੂੰ ਬਰਾਬਰ ਮੌਕੇ ਤੇ ਉਨ੍ਹਾਂ ਨਾਲ ਇੱਕੋ ਜਿਹੇ ਵਿਵਹਾਰ ਦਾ ਵਾਅਦਾ ਕੀਤਾ ਸੀ। ਉਨ੍ਹਾਂ ਆਖਿਆ ਸੀ ਕਿ ਸਿਆਹ ਨਸਲ ਦੇ ਕੈਨੇਡੀਅਨਾਂ ਨੂੰ ਕਈ ਤਰ੍ਹਾਂ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਤੇ ਇਸ ਵਿੱਚ ਸਿਆਹ ਲੋਕਾਂ ਨਾਲ ਹੋਣ ਵਾਲਾ ਨਸਲਵਾਦ ਵੀ ਸ਼ਾਮਲ ਹੈ।
ਕਰੌਸ ਪਾਰਟੀ ਕਾਕਸ ਦੇ ਚੇਅਰਮੈਨ ਗ੍ਰੈੱਗ ਫਰਗਸ, ਜੋ ਕਿ ਕਿਊਬਿਕ ਤੋਂ ਲਿਬਰਲ ਐਮਪੀ ਵੀ ਹਨ, ਨੇ ਐਤਵਾਰ ਨੂੰ ਆਖਿਆ ਕਿ ਉਨ੍ਹਾਂ ਨੂੰ ਲੱਗਿਆ ਸੀ ਕਿ ਟਰੂਡੋ ਦੇ ਇਸ ਵਾਅਦੇ ਨਾਲ ਫੈਡਰਲ ਸਰਕਾਰ ਦੇ ਸਿਆਹ ਕਮਿਊਨਿਟੀਜ਼ ਨਾਲ ਵਿਵਹਾਰ ਵਿੱਚ ਤਬਦੀਲੀ ਆਵੇਗੀ। ਪਰ ਅਜਿਹਾ ਕੁੱਝ ਨਹੀਂ ਹੋਇਆ ਸਗੋਂ ਬਿਊਰੋਕਰੈਸੀ ਦੇ ਕੰਨ ਤੇ ਤਾਂ ਕੋਈ ਜੂੰ ਵੀ ਨਹੀਂ ਰੇਂਗੀ ਲੱਗਦੀ। ਉਨ੍ਹਾਂ ਆਖਿਆ ਕਿ ਹੁਣ ਉਨ੍ਹਾਂ ਨੂੰ ਪਤਾ ਲੱਗਿਆ ਹੈ ਕਿ ਉਹ ਕਿੰਨੀ ਵੱਡੀ ਗਲਤਫਹਿਮੀ ਵਿੱਚ ਸਨ। ਇਹ ਗੱਲ ਗ੍ਰੈੱਗ ਨੇ ਸ਼ਨਿੱਚਰਵਾਰ ਨੂੰ ਸ਼ੁਰੂ ਹੋਈ ਚਾਰ ਰੋਜ਼ਾ ਨੈਸ਼ਨਲ ਬਲੈਕ ਕੈਨੇਡੀਅਨਜ਼ ਸਿਖਰ ਵਾਰਤਾ ਵਿੱਚ ਆਖੀ।
ਜਿ਼ਕਰਯੋਗ ਹੈ ਕਿ ਲਿਬਰਲਾਂ ਨੇ ਸਿਆਹ ਕਮਿਊਨਿਟੀਜ਼ ਲਈ ਮਾਨਸਿਕ ਸਿਹਤ ਤੇ ਯੂਥ ਪ੍ਰੋਗਰਾਮ ਵਾਸਤੇ ਪੰਜ ਸਾਲਾਂ ਵਿੱਚ 19 ਮਿਲੀਅਨ ਡਾਲਰ ਖਰਚਣ ਦਾ ਵਾਅਦਾ ਕੀਤਾ ਸੀ ਤੇ ਇਸ ਤੋਂ ਇਲਾਵਾ 23 ਮਿਲੀਅਨ ਡਾਲਰ ਨਸਲਵਾਦ ਵਿਰੋਧੀ ਰਣਨੀਤੀ ਖਿਲਾਫ ਖਰਚਣ ਦਾ ਕਰਾਰ ਕੀਤਾ ਸੀ। ਪਰ ਅਜੇ ਤੱਕ ਅਜਿਹਾ ਕੁੱਝ ਨਹੀਂ ਹੋਇਆ। ਸੋਮਵਾਰ ਨੂੰ ਸਿਆਹ ਕਾਕਸ ਵੱਲੋਂ ਲਾਬੀ ਡੇਅ ਰੱਖਿਆ ਗਿਆ ਹੈ ਜਿੱਥੇ ਇਸ ਸਿਖਰ ਵਾਰਤਾ ਵਿੱਚ ਹਿੱਸਾ ਲੈਣ ਆਏ ਦਰਜਨਾਂ ਨੁਮਾਇੰਦੇ ਕੈਬਨਿਟ ਮੰਤਰੀਆਂ ਤੇ ਐਮਪੀਜ਼ ਨਾਲ ਮੁਲਾਕਾਤ ਕਰਨਗੇ ਤੇ ਆਪਣਾ ਪੱਖ ਰੱਖਣਗੇ।