ਰਣਵੀਰ ਸਿੰਘ ਇਨ੍ਹੀਂ ਦਿਨੀਂ ਆਪਣੀ ਅਗਲੀ ਫਿਲਮ ‘ਗਲੀ ਬੁਆਏ’ ਦੇ ਪ੍ਰਚਾਰ ਵਿੱਚ ਪੂਰੀ ਤਰ੍ਹਾਂ ਜੁਟਿਆ ਹੋਇਆ ਹੈ। ਉਸ ਦੀ ਇਹ ਫਿਲਮ ਬਰਲਿਨ ਵਰਲਡ ਪ੍ਰੀਮੀਅਰ ਲਈ ਚੁਣੀ ਜਾ ਚੁੱਕੀ ਹੈ। ਉਹ ਕਹਿੰਦਾ ਹੈ, ‘‘ਜੇ ਇਸ ਫਿਲਮ 'ਚ ਮੇਰੀ ਜਗ੍ਹਾ ਕੋਈ ਹੋਰ ਹੁੰਦਾ ਤਾਂ ਸੱਚ ਕਹਾਂ ਮੈਨੂੰ ਬਹੁਤ ਬੁਰਾ ਲੱਗਦਾ। ਇਸ ਫਿਲਮ ਵਿੱਚ ਚੁੱਪ ਰਹਿਣਾ ਹੈ। ਇਥੋਂ ਤੱਕ ਕਿ ਮੈਂ ਸੀਨ ਖਤਮ ਹੋਣ ਤੋਂ ਬਾਅਦ ਮਾਨੀਟਰ 'ਤੇ ਜਾ ਕੇ ਕਦੇ ਨਹੀਂ ਦੇਖਿਆ ਕਿ ਮੈਂ ਕਿਸ ਤਰ੍ਹਾਂ ਦਾ ਪ੍ਰਫਾਰਮ ਕੀਤਾ, ਪਰ ਪਿੱਛੇ ਜਿਹੇ ਜਦੋਂ ਇਸ ਦੀ ਨਿਰਦੇਸ਼ਿਕਾ ਜ਼ੋਇਆ ਅਖਤਰ ਨੇ ਮੈਨੂੰ ਸਿਰਫ ਇੱਕ ਲਾਈਨ ਡਬਿੰਗ ਕਰਨ ਲਈ ਬੁਲਾਇਆ ਤਾਂ ਟੀਜ਼ਰ ਦੇਖ ਕੇ ਮੈਂ ਖੁਦ ਹੈਰਾਨ ਰਹਿ ਗਿਆ। ਫਿਲਮ ਬਹੁਤ ਚੰਗੀ ਲੱਗ ਰਹੀ ਹੈ।”
ਕਰਣ ਜੌਹਰ ਦੀ ਫਿਲਮ ‘ਤਖਤ’ ਬਾਰੇ ਵੀ ਉਹ ਕਾਫੀ ਉਤਸ਼ਾਹਤ ਹੈ। ਉਸ ਨੇ ਕਿਹਾ, ‘‘ਕਰਣ ਜੌਹਰ ਨਾਲ ਕੰਮ ਕਰਨ ਦੀ ਮੇਰੀ ਹਮੇਸ਼ਾ ਤੋਂ ਖਾਹਿਸ਼ ਰਹੀ ਤੇ ਜਦੋਂ ਉਨ੍ਹਾਂ ਨੇ ਮੈਨੂੰ ਕਹਾਣੀ ਸੁਣਾਉਣ ਅਤੇ ਫਿਲਮ ਆਫਰ ਕਰਨ ਲਈ ਬੁਲਾਇਆ ਤਾਂ ਮੈਨੂੰ ਵੱਖਰੇ ਕਰਣ ਦਿਖਾਈ ਦਿੱਤੇ। ਉਹ ਬਹੁਤ ਸਰਲ ਸਿੱਧੇ ਰੂਪ 'ਚ ਨਜ਼ਰ ਆਉਂਦੇ ਹਨ, ਪਰ ਮੈਂ ਪਹਿਲੀ ਵਾਰ ਇੱਕ ਸੀਰੀਅਸ ਕਰਣ ਨੂੰ ਦੇਖਿਆ। ਉਹ ਬਹੁਤ ਉਤਸ਼ਾਹੀ ਫਿਲਮ ਮੇਕਰ ਹਨ।”