ਓਟਵਾ, 31 ਜਨਵਰੀ (ਪੋਸਟ ਬਿਊਰੋ) : ਇਮੀਗ੍ਰੇਸ਼ਨ, ਰਫਿਊਜੀਜ਼ ਤੇ ਸਿਟੀਜ਼ਨਸਿ਼ਪ ਬਾਰੇ ਸ਼ੇਡੋ ਮੰਤਰੀ ਮਿਸ਼ੇਲ ਰੈਂਪਲ ਨੇ ਪੇਰੈਂਟ ਤੇ ਗ੍ਰੈਂਡਪੇਰੈਂਟ ਸਪਾਂਸਰਸਿ਼ਪ ਪ੍ਰੋਗਰਾਮ ਸਬੰਧੀ ਬਿਆਨ ਜਾਰੀ ਕਰਕੇ ਪ੍ਰਧਾਨ ਮੰਤਰੀ ਟਰੂਡੋ ਦੀ ਨੁਕਤਾਚੀਨੀ ਕੀਤੀ।
ਬਿਆਨ ਜਾਰੀ ਕਰਦਿਆਂ ਰੈਂਪਲ ਨੇ ਆਖਿਆ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਪੇਰੈਂਟ ਤੇ ਗ੍ਰੈਂਡਪੇਰੈਂਟ ਸਪਾਂਸਰਸਿ਼ਪ ਪ੍ਰੋਗਰਾਮ ਬਾਰੇ ਕੈਨੇਡੀਅਨਾਂ ਤੇ ਨਿਊਕਮਰਜ਼ ਨੂੰ ਗੁੰਮਰਾਹ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਟਰੂਡੋ ਨੇ ਇਸ ਪ੍ਰੋਗਰਾਮ ਨਾਲ ਸਬੰਧਤ ਅਰਜ਼ੀਆਂ ਦੀ ਗਿਣਤੀ ਵਿੱਚ ਵਾਧਾ ਕਰ ਦਿੱਤਾ ਹੈ ਜਦਕਿ ਹਰ ਸਾਲ ਪਰਮਾਨੈਂਟ ਰੈਜ਼ੀਡੈਂਸ ਹਾਸਲ ਕਰਨ ਵਾਲੇ ਪੇਰੈਂਟਸ ਤੇ ਗ੍ਰੈਂਡਪੇਰੈਂਟਸ ਦੀ ਗਿਣਤੀ ਵਿੱਚ ਕੋਈ ਵਾਧਾ ਨਹੀਂ ਕੀਤਾ ਗਿਆ।
ਰੈਂਪਲ ਨੇ ਆਖਿਆ ਕਿ ਅਰਜ਼ੀਆਂ ਦੀ ਗਿਣਤੀ ਵਧਾ ਕੇ ਅਸਲ ਵਿੱਚ ਟਰੂਡੋ ਬੈਕਲੌਗ ਖੜ੍ਹਾ ਕਰ ਰਹੇ ਹਨ। ਉਡੀਕ ਸੂਚੀ ਵਿੱਚ ਨਾਂ ਆਉਣ ਦਾ ਮਤਲਬ ਕੈਨੇਡਾ ਵਿੱਚ ਪਹੁੰਚ ਹੋਣਾ ਨਹੀਂ ਹੁੰਦਾ ਤੇ ਕੈਨੇਡੀਅਨਜ਼ ਅਤੇ ਨਿਊਕਮਰਜ਼ ਇਸ ਤੋਂ ਕਿਤੇ ਬਿਹਤਰ ਦੀ ਉਮੀਦ ਕਰਦੇ ਹਨ। ਉਨ੍ਹਾਂ ਆਖਿਆ ਕਿ ਪਿਛਲੀ ਕੰਜ਼ਰਵੇਟਿਵ ਸਰਕਾਰ ਤਹਿਤ ਅਸੀਂ ਹਰ ਸਾਲ 20,000 ਤੋਂ 25,000 ਪੇਰੈਂਟਸ ਤੇ ਗ੍ਰੈਂਡਪੇਰੈਂਟਸ ਨੂੰ ਪਰਮਾਨੈਂਟ ਰੈਜ਼ੀਡੈਂਸੀ ਮੁਹੱਈਆ ਕਰਵਾਈ। ਜਸਟਿਨ ਟਰੂਡੋ ਇਸ ਨੰਬਰ ਵਿੱਚ ਵਾਧਾ ਨਹੀਂ ਕਰ ਸਕੇ। ਇਸ ਦੀ ਥਾਂ ਉੱਤੇ ਉਨ੍ਹਾਂ ਗੈਰਕਾਨੂੰਨੀ ਤੌਰ ਉੱਤੇ ਸਰਹੱਦ ਪਾਰ ਕਰਨ ਵਾਲੇ ਸੈਂਕੜੇ ਲੋਕਾਂ ਨੂੰ ਤਰਜੀਹ ਦਿੱਤੀ।
ਰੈਂਪਲ ਨੇ ਆਖਿਆ ਕਿ ਪਿਛਲੇ ਸਾਲ ਟਰੂਡੋ ਨੇ ਲਾਟਰੀ ਸਿਸਟਮ ਸ਼ੁਰੂ ਕਰਕੇ ਨਵਾਂ ਤਜ਼ਰਬਾ ਕੀਤਾ ਸੀ ਤੇ ਇਸ ਸਾਲ ਉਹ ਬਿਨੈਕਾਰਾਂ ਨੂੰ ਸਪਾਂਸਰਸਿ਼ਪ ਫਾਰਮ ਭਰਨ ਲਈ ਸਿਰਫ 10 ਮਿੰਟ ਦਾ ਸਮਾਂ ਦੇ ਰਹੇ ਹਨ। ਕੈਨੇਡੀਅਨਜ਼ ਜਾਣਦੇ ਹਨ ਕਿ ਇਹ ਸਹੀ ਨਹੀਂ ਹੈ। ਰੈਂਪਲ ਨੇ ਆਖਿਆ ਕਿ ਇਸ ਲਈ ਕੰਜ਼ਰਵੇਟਿਵ ਟਰੂਡੋ ਸਰਕਾਰ ਦੀ ਜਵਾਬਦੇਹੀ ਤੈਅ ਕਰਨੀ ਜਾਰੀ ਰੱਖਣਗੇ ਤੇ ਜਨਤਾ ਨੂੰ ਗੁੰਮਰਾਹ ਕਰਨ ਦੀ ਟਰੂਡੋ ਸਰਕਾਰ ਦੀ ਕੋਸਿ਼ਸ਼ ਤੋਂ ਵੀ ਪਰਦਾਫਾਸ਼ ਕਰਦੇ ਰਹਿਣਗੇ।