ਵਾਸ਼ਿੰਗਟਨ, 17 ਜਨਵਰੀ, (ਪੋਸਟ ਬਿਊਰੋ)- ਅਮਰੀਕੀ ਪਾਰਲੀਮੈਂਟ ਦੇ ਚੁਣੇ ਹੋਏ ਹਾਊਸ ਦੀ ਮੁਖੀ ਨੈਂਸੀ ਪੇਲੋਸੀ ਨੇ ਆਪਣੇ ਦੇਸ਼ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਹਰ ਸਾਲ ਕੀਤੇ ਜਾਣ ਵਾਲੇ ‘ਸਟੇਟ ਆਫ ਦਿ ਯੂਨੀਅਨ’ ਦੇ ਭਾਸ਼ਣ ਉੱਤੇ ਰੋਕ ਲਾ ਦਿੱਤੀ ਹੈ। ਉਸ ਨੇ ਸ਼ੱਟਡਾਊਨ ਦਾ ਹਵਾਲਾ ਦਿੰਦੇ ਹੋਏ ਬੁੱਧਵਾਰ ਨੂੰ ਡੋਨਾਲਡ ਟਰੰਪ ਨੂੰ ਲਿੱਖੀ ਚਿੱਠੀ ਵਿੱਚ 29 ਜਨਵਰੀ ਨੂੰ ਹੋਣ ਵਾਲੇ ਸੰਬੋਧਨ ਦਾ ਆਯੋਜਨ ਨਾ ਕਰਨ ਦੀ ਗੱਲ ਕਹੀ ਹੈ।
ਇਸ ਬਾਰੇ ਨੈਂਸੀ ਪੇਲੋਸੀ ਨੇ ਕਿਹਾ ਕਿ ਸ਼ੱਟਡਾਊਨ ਕਾਰਨ ਇਸ ਪ੍ਰੋਗਰਾਮ ਲਈ ਲੋੜ ਜੋਗੀ ਸੁਰੱਖਿਆ ਪੇਸ਼ ਕਰ ਸਕਣਾ ਸੰਭਵ ਨਹੀਂ, ਕਿਉਂਕਿ ਸੀਕ੍ਰੇਟ ਸਰਵਿਸ ਅਤੇ ਹੋਮਲੈਂਡ ਸਕਿਓਰਟੀ ਵਿਭਾਗ ਦੇ ਕਰਮਚਾਰੀਆਂ ਨੂੰ 25 ਦਿਨਾਂ ਤੋਂ ਤਨਖਾਹ ਨਹੀਂ ਮਿਲੀ। ਉਂਜ ਡੋਨਾਲਡ ਟਰੰਪ ਆਪਣੇ ਭਾਸ਼ਣ ਦੀ ਥਾਂ ਇਕ ਲਿਖਤ ਸੰਦੇਸ਼ ਭੇਜ ਸਕਦੇ ਹਨ, ਜਿਵੇਂ ਸਾਲ 1913 ਤੱਕ ਕੀਤਾ ਜਾਂਦਾ ਰਿਹਾ ਸੀ। ਇਹੀ ਨਹੀਂ, ਉਹ ਸਰਕਾਰ ਦਾ ਕੰਮ ਚਾਲੂ ਹੋਣ ਦੀ ਉਡੀਕ ਵੀ ਕਰ ਸਕਦੇ ਹਨ ਤੇ ਉਸ ਤੋਂ ਬਾਅਦ ਇਸ ਸਾਲਾਨਾ ਭਾਸ਼ਣ ਲਈ ਨਵੀਂ ਤਰੀਕ ਦਾ ਐਲਾਨ ਸਕਦੇ ਹਨ।
ਹੋਮਲੈਂਡ ਸਕਿਓਰਟੀ ਦੇ ਸੈਕਟਰੀ ਕ੍ਰਿਸਟਨ ਨੀਲਸਨ ਨੇ ਕਿਹਾ ਕਿ ਉਨ੍ਹਾਂ ਦਾ ਵਿਭਾਗ ਤੇ ਸੀਕ੍ਰੇਟ ਸਰਵਿਸ ਸਟੇਟ ਆਫ ਯੂਨੀਅਨ ਪ੍ਰੋਗਰਾਮ ਵਾਸਤੇ ਸੁਰੱਖਿਆ ਦੇਣ ਤੇ ਇਸ ਦੇ ਸਮਰਥਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ। ਡੋਨਾਲਡ ਟਰੰਪ ਨੂੰ ਇਸ ਭਾਸ਼ਣ ਲਈ ਸੱਦਾ ਨਾ ਦਿੱਤਾ ਗਿਆ ਤਾਂ ਉਹ ਟੀ ਵੀ ਉੱਤੇ ਦੇਸ਼ ਵਾਸੀਆਂ ਨੂੰ ਸੰਬੋਧਨ ਕਰ ਸਕਦੇ ਹਨ।
ਵਰਨਣ ਯੋਗ ਹੈ ਕਿ ਅਮਰੀਕੀ ਸਰਕਾਰ ਦਾ ਕੰਮਕਾਜ ਵੀਰਵਾਰ 27ਵੇਂ ਦਿਨ ਵੀ ਬੰਦ ਰਿਹਾ ਹੈ ਕਿਉਂਕਿ ਗਵਾਂਢੀ ਦੇਸ਼ ਮੈਕਸੀਕੋ ਦੀ ਸਰਹੱਦ ਉੱਤੇ ਕੰਧ ਬਣਾਉਣ ਲਈ ਫੰਡ ਪਾਸ ਕਰਨ ਦਾ ਅੜਿੱਕਾ ਪਿਆ ਹੋਇਆ ਹੈ। ਕਾਂਗਰਸ ਵਿੱਚ ਬਹੁ-ਮੱਤ ਵਾਲੀ ਡੈਮੋਕ੍ਰੇਟਿਕ ਪਾਰਟੀ ਦੇ ਮੈਂਬਰਾਂ ਨੇ ਕੰਧ ਬਣਾਉਣ ਲਈ 5.6 ਅਰਬ ਡਾਲਰ ਦਾ ਬਜਟ ਪਾਸ ਕਰਨ ਤੋਂ ਨਾਂਹ ਕਰ ਦਿੱਤੀ ਹੈ, ਪਰ ਡੋਨਾਲਡ ਟਰੰਪ ਜਿ਼ਦ ਉੱਤੇ ਹਨ ਕਿ ਜਦੋਂ ਤੱਕ ਕੰਧ ਲਈ ਲੋੜੀਂਦਾ ਫੰਡ ਨਹੀਂ ਮਿਲਦਾ, ਉਦੋਂ ਤੱਕ ਉਹ ਬਜਟ ਨੂੰ ਮਨਜ਼ੂਰੀ ਨਹੀਂ ਦੇਣਗੇ। ਇਸ ਕਾਰਨ ਬਿਨਾਂ ਬਜਟ ਦੇ ਸਰਕਾਰ ਦਾ ਕੰਮ ਠੱਪ ਹੋ ਗਿਆ ਹੈ।