ਨਵੀਂ ਦਿੱਲੀ, 8 ਜਨਵਰੀ (ਪੋਸਟ ਬਿਊਰੋ)- ਭਾਰਤ ਦੇ ਵੱਖ ਵੱਖ ਡਾਕਘਰਾਂ ਦੇ ਬੱਚਤ ਖਾਤੇ ਵਿੱਚ 9395 ਕਰੋੜ ਰੁਪਏ ਦੀ ਰਕਮ ਲਾਵਾਰਸ ਪਈ ਹੈ। ਸਭ ਤੋਂ ਜ਼ਿਆਦਾ 2429 ਕਰੋੜ ਰੁਪਏ ਦੀ ਰਾਸ਼ੀ ਕਿਸਾਨ ਵਿਕਾਸ ਪੱਤਰ ਵਿੱਚ ਲਾਵਾਰਸ ਪਈ ਹੈ। ਇਸ ਪਿੱਛੋਂ ਮੰਥਲੀ ਇਨਕਮ ਸਕੀਮ ਵਿੱਚ 2056 ਕਰੋੜ ਰੁਪਏ ਲਾਵਾਰਸ ਪਏ ਹਨ। ਇਸੇ ਤਰ੍ਹਾਂ ਐੱਨ ਐੱਸ ਸੀ 'ਚ ਵੀ 1888 ਕਰੋੜ ਰੁਪਏ ਦਾ ਦਾਅਵਾ ਕਰਨ ਵਾਲਾ ਕੋਈ ਨਹੀਂ ਹੈ।
ਸਭ ਤੋਂ ਵੱਡੀ ਗੱਲ ਇਹ ਕਿ ਲਾਵਾਰਸ ਪਈ ਲਗਭਗ ਅੱਧੀ ਰਕਮ ਪੱਛਮੀ ਬੰਗਾਲ, ਦਿੱਲੀ, ਪੰਜਾਬ ਅਤੇ ਉਤਰ ਪ੍ਰਦੇਸ਼ ਦੇ ਡਾਕਘਰਾਂ ਵਿੱਚ ਹੈ। ਇਸ ਤੋਂ ਪਹਿਲਾਂ ਭਾਰਤੀ ਜੀਵਨ ਬੀਮਾ ਨਿਗਮ (ਐੱਲ ਆਈ ਸੀ) ਦੇ ਖਾਤੇ ਵਿੱਚ ਭਾਰੀ ਮਾਤਰਾ ਵਿੱਚ ਰਕਮ ਲਾਵਾਰਸ ਹੋਣ ਦੀ ਗੱਲ ਸਾਹਮਣੇ ਆਈ ਸੀ। ਸਰਕਾਰੀ ਅੰਕੜਿਆਂ ਮੁਤਾਬਕ 31 ਮਾਰਚ 2018 ਨੂੰ ਲਾਵਾਰਸ ਕੁੱਲ ਰਕਮ 15,166.47 ਕਰੋੜ ਰੁਪਏ ਸੀ। ਅਜਿਹੀਆਂ ਕੰਪਨੀਆਂ ਦੀ ਸੂਚੀ 'ਚ ਜਨਤਕ ਖੇਤਰ ਦੀ ਕੰਪਨੀ ਜੀਵਨ ਬੀਮਾ ਨਿਗਮ ਸਿਖਰ 'ਤੇ ਹੈ, ਜਿਸ ਕੋਲ ਕੁੱਲ 10,509 ਕਰੋੜ ਰੁਪਏ ਦਾ ਕੋਈ ਦਾਅਵੇਦਾਰ ਨਹੀਂ ਹੈ, ਜਦ ਕਿ ਨਿੱਜੀ ਕੰਪਨੀਆਂ ਕੋਲ ਅਜਿਹੀ ਰਕਮ 4,657.45 ਕਰੋੜ ਰੁਪਏ ਹੈ।