ਟੋਰਾਂਟੋ, 13 ਜਨਵਰੀ (ਪੋਸਟ ਬਿਊਰੋ) : 2022 ਵਿੱਚ ਟੋਰਾਂਟੋ ਵਾਸੀਆਂ ਨੂੰ 4·4 ਫੀ ਸਦੀ ਵੱਧ ਪ੍ਰਾਪਰਟੀ ਟੈਕਸ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।ਟੋਰਾਂਟੋ ਸਿਟੀ ਆਪਣੇ ਬਜਟ ਦੇ ਪ੍ਰਸਤਾਵ ਵਿੱਚ ਅਜਿਹਾ ਕਰ ਸਕਦੀ ਹੈ।
ਮੇਅਰ ਵਜੋਂ ਜੌਹਨ ਟੋਰੀ ਦੇ ਕਾਰਜਕਾਲ ਵਿੱਚ ਇਹ ਸੱਭ ਤੋਂ ਵੱਡਾ ਵਾਧਾ ਹੋਵੇਗੀ। 2021 ਵਿੱਚ ਹੋਮਓਨਰਜ਼ ਲਈ ਪ੍ਰਾਪਰਟੀ ਟੈਕਸ ਵਿੱਚ ਸੱਭ ਤੋਂ ਘੱਟ ਵਾਧਾ ਕੀਤਾ ਗਿਆ ਸੀ।14·9 ਬਿਲੀਅਨ ਡਾਲਰ ਦੇ ਬਜਟ ਵਿੱਚ 2·9 ਫੀ ਸਦੀ ਬੇਸ ਵਾਧਾ ਪਲੱਸ 1·5 ਫੀ ਸਦੀ ਬਿਲਡਿੰਗ ਲੈਵੀ , ਜੋ ਕਿ 2019 ਵਿੱਚ ਹਾਊਸਿੰਗ ਤੇ ਟਰਾਂਜਿ਼ਟ ਵਰਗੀਆਂ ਚੀਜ਼ਾਂ ਨੂੰ ਫੰਡ ਕਰਨ ਲਈ ਮਨਜ਼ੂਰ ਕੀਤਾ ਗਿਆ ਸੀ, ਸ਼ਾਮਲ ਹੋਵੇਗੀ।
ਇਸ ਸਾਲ ਇੱਕ ਹੋਮਓਨਰ, ਜਿਸ ਦੀ ਪ੍ਰਾਪਰਟੀ ਦੀ ਵੈਲਿਊ 697,000 ਡਾਲਰ ਤੋਂ ਥੋੜ੍ਹੀ ਜਿ਼ਆਦਾ ਹੈ, ਉਸ ਨੂੰ ਟੈਕਸ ਵਿੱਚ 141 ਡਾਲਰ ਦਾ ਵਾਧਾ ਵੇਖਣ ਨੂੰ ਮਿਲੇਗਾ। ਔਸਤ ਕੀਮਤ ਵਾਲੇ ਘਰ ਲਈ ਪ੍ਰਾਪਰਟੀ ਟੈਕਸ ਬਿੱਲ 3,339 ਡਾਲਰ ਹੋਵੇਗਾ।ਇੱਕ ਬਿਆਨ ਵਿੱਚ ਮੇਅਰ ਟੋਰੀ ਨੇ ਆਖਿਆ ਕਿ ਉਹ ਮੰਨਦੇ ਹਨ ਕਿ ਸਾਰੇ ਹੀ ਮੰਨ ਕੇ ਚੱਲ ਰਹੇ ਸੀ ਕਿ 2022 ਵਿੱਚ ਅਸੀਂ ਬਿਹਤਰ ਸਥਿਤੀ ਵਿੱਚ ਹੋਵਾਂਗੇ ਪਰ ਓਮਾਈਕ੍ਰੌਨ ਦੇ ਆਉਣ ਕਾਰਨ ਸਥਿਤੀ ਹੋਰ ਵੀ ਖਰਾਬ ਹੋ ਗਈ ਹੈ।