ਇਸਲਾਮਾਬਾਦ, 13 ਜਨਵਰੀ (ਪੋਸਟ ਬਿਊਰੋ)- ਪਾਕਿਸਤਾਨ ਆਪਣੀ ਪਲੇਠੀ ਕੌਮੀ ਸੁਰੱਖਿਆ ਨੀਤੀ ਹੇਠ ਭਾਰਤ ਸਮੇਤ ਆਪਣੇ ਸਾਰੇ ਗੁਆਂਢੀਆਂ ਨਾਲ ਅਮਨ ਦੇ ਰਿਸ਼ਤੇ ਰੱਖਣ ਦਾ ਚਾਹਵਾਨ ਹੈ। ਮੀਡੀਆ ਰਿਪੋਰਟ ਮੁਤਾਬਕ ਨਵੀਂ ਨੀਤੀ ਵਿੱਚ ਨਵੀਂ ਦਿੱਲੀ ਨਾਲ ਵਪਾਰ ਵਾਸਤੇ ਦਰ ਖੋਲ੍ਹਣ ਦੀ ਗੱਲ ਵੀ ਆਖੀ ਗਈ ਹੈ। ਜਿੱਥੋਂ ਤਕ ਕਸ਼ਮੀਰ ਮਸਲੇ ਦੀ ਗੱਲ ਹੈ ਤਾਂ ਕੌਮੀ ਸੁਰੱਖਿਆ ਨੀਤੀ ਇਹ ਕਹਿੰਦੀ ਹੈ ਕਿ ਦੁਵੱਲੀ ਗੱਲਬਾਤ ਜ਼ਰੀਏ ਇਸ ਦਿਸ਼ਾ ਵਿੱਚ ਕੰਮ ਜਾਰੀ ਹੈ। ਕੌਮੀ ਸੁਰੱਖਿਆ ਕਮੇਟੀ ਤੇ ਕੇਂਦਰੀ ਕੈਬਨਿਟ ਨੇ ਪਿਛਲੇ ਮਹੀਨੇ ਵੱਖੋ-ਵੱਖਰੇ ਤੌਰ ਉੱਤੇ ਕੌਮੀ ਸੁਰੱਖਿਆ ਨੀਤੀ ਦੀ ਤਾਈਦ ਕੀਤੀ ਸੀ। ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਸ਼ੁੱਕਰਵਾਰ ਨੂੰ ਇਸ ਤੋਂ ਰਸਮੀ ਪਰਦਾ ਪਰਦਾ ਚੁੱਕਣਗੇ।

ਇਸ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਦੀ ਵਿਦੇਸ਼ ਨੀਤੀ ਦਾ ਕੇਂਦਰੀ ਵਿਸ਼ਾ ਆਪਣੇ ਗੁਆਂਢੀਆਂ ਨਾਲ ਅਮਨ ਅਤੇ ਆਰਥਿਕ ਕੂਟਨੀਤੀ ਹੋਵੇਗਾ। ਪੰਜ ਸਾਲਾਂ (2022-26) ਦੀ ਨੀਤੀ ਵਾਲਾ ਇਹ ਪਾਲਿਸੀ ਦਸਤਾਵੇਜ਼ ਪਾਕਿਸਤਾਨੀ ਸਰਕਾਰ ਦਾ ਅਜਿਹਾ ਪਹਿਲਾ ਰਣਨੀਤਕ ਦਸਤਾਵੇਜ਼ ਹੈ, ਜੋ ਕੌਮੀ ਸੁਰੱਖਿਆ ਬਾਰੇ ਰਾਜਨੀਤਕ ਸੂਝ-ਬੂਝ ਨਾਲ ਹਾਸਲ ਕੀਤੇ ਜਾਣ ਵਾਲੇ ਟੀਚਿਆਂ ਲਈ ਰੂਪ ਰੇਖਾ ਬਿਆਨ ਕਰਦਾ ਹੈ। ਰਿਪੋਰਟ ਵਿੱਚ ਇੱਕ ਅਧਿਕਾਰੀ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਸੌ ਸਫਿਆਂ ਵਾਲੀ ਇਸ ਅਸਲ ਪਾਲਿਸੀ, ਜਿਸ ਨੂੰ ਹਾਲੇ ਜਨਤਕ ਨਹੀਂ ਕੀਤਾ ਗਿਆ, ਦੇ ਤਹਿਤ ਲੰਮੇ ਸਮੇਂ ਤੋਂ ਜਾਰੀ ਕਸ਼ਮੀਰ ਵਿਵਾਦ ਨੂੰ ਹੱਲ ਕੀਤੇ ਬਿਨਾਂ ਭਾਰਤ ਨਾਲ ਵਣਜ ਤੇ ਕਾਰੋਬਾਰੀ ਸੰਬੰਧਾਂ ਦਾ ਰਾਹ ਖੁੱਲ੍ਹੇਗਾ। ਅਧਿਕਾਰੀ ਨੇ ਆਪਣਾ ਨਾਂਅ ਨਾ ਦੱਸੇ ਜਾਣ ਦੀ ਸ਼ਰਤ ਉੱਤੇਕਿਹਾ, ‘‘ਅਸੀਂ ਅਗਲੇ ਸੌ ਸਾਲਾਂ ਤਕ ਭਾਰਤ ਨਾਲ ਵੈਰ ਨਹੀਂ ਰੱਖ ਸਕਦੇ। ਨਵੀਂ ਪਾਲਿਸੀ ਆਪਣੇ ਗੁਆਂਢੀਆਂ ਨਾਲ ਅਮਨ ਰੱਖਣ ਦੀ ਹਾਮੀ ਹੈ।'' ਅਧਿਕਾਰੀ ਨੇ ਕਿਹਾ ਕਿ ਜੇ ਸੰਵਾਦ ਹੁੰਦਾ ਹੈ ਤਾਂ ਇਸ ਗੱਲ ਦੀ ਪੂਰੀ ਸੰਭਾਵਨਾ ਹੈ ਕਿ ਭਾਰਤ ਨਾਲ ਵਣਜ ਤੇ ਵਪਾਰਕ ਰਿਸ਼ਤੇ ਆਮ ਵਾਂਗ ਹੋ ਜਾਣ।