ਨਵੀਂ ਦਿੱਲੀ, 5 ਦਸੰਬਰ (ਪੋਸਟ ਬਿਊਰੋ)- ਭਾਰਤ ਵਿੱਚ ਕੋਰੋਨਾ ਵਾਇਰਸ ਦੇ ਨਵੇਂ ਰੂਪ ਓਮੀਕੌਰੋਨ ਦਾ ਪਤਾ ਲੱਗਣ ਪਿੱਛੋਂ ਚਿੰਤਾ ਦੇ ਬਾਵਜੂਦ ਮਾਸਕ ਪਹਿਨਣ ਦੇ ਨਿਯਮ ਦਾ ਪਾਲਣ ਹੇਠਲੇ ਪੱਧਰ ਉੱਤੇ ਹੈ ਅਤੇ ਇੱਕ ਸਰਵੇਖਣ ਮੁਤਾਬਕ ਸਿਰਫ ਦੋ ਫੀਸਦੀ ਲੋਕਾਂ ਨੇ ਮੰਨਿਆ ਕਿ ਉਨ੍ਹਾਂ ਦੇ ਇਲਾਕੇ, ਸ਼ਹਿਰ ਜਾਂ ਜ਼ਿਲ੍ਹੇ ਵਿੱਚ ਲੋਕ ਇਸ ਨਿਯਮ ਦੀ ਪਾਲਣਾ ਕਰ ਰਹੇ ਹਨ। ਬਹੁਤੇ ਲੋਕ ਮਾਸਕ ਪਹਿਨਣ ਦੀ ਲੋੜ ਨਹੀਂ ਸਮਝਦੇ।
ਡਿਜੀਟਲ ਪਲੇਟਫਾਰਮ ‘ਲੋਕਲ ਸਰਕਲ’ ਵੱਲੋਂ ਕੀਤੇ ਸਰਵੇਖਣ ਅਨੁਸਾਰ ਹਰ ਤਿੰਨਾਂ ਵਿੱਚੋਂ ਇੱਕ ਭਾਰਤੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਖੇਤਰ ਦੇ ਬਹੁਤੇ ਲੋਕ ਆਪਣੇ ਘਰੋਂ ਨਿਕਲਦੇ ਸਮੇਂ ਮਾਸਕ ਨਹੀਂ ਪਹਿਨਦੇ। ਅਪ੍ਰੈਲ ਵਿੱਚ ਕੀਤੇ ਸਰਵੇਖਣ ਵਿੱਚ ਭਾਰਤ ਦੇ 364 ਜ਼ਿਲ੍ਹਿਆਂ ਵਿੱਚ ਰਹਿੰਦੇ 25 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਪ੍ਰਤੀਕਿਰਿਆ ਮਿਲੀ ਸੀ ਤੇ ਉਸ ਸਰਵੇ ਅਨੁਸਾਰ 29 ਫੀਸਦੀ ਲੋਕਾਂ ਨੇ ਕਿਹਾ ਸੀ ਕਿ ਮਾਸਕ ਪਹਿਨਣ ਦੇ ਨਿਯਮ ਦੀ ਪਾਲਣਾ ਦੀ ਦਰ ਕਾਫੀ ਵੱਧ ਹੈ। ਮਾਸਕ ਪਹਿਨਣ ਦੀ ਦਰ ਸਤੰਬਰ ਵਿੱਚ ਡਿੱਗ ਕੇ 12 ਫੀਸਦੀ ਤਕ ਆ ਗਈ ਅਤੇ ਫਿਰ ਤੇਜ਼ੀ ਨਾਲ ਡਿੱਗ ਕੇ ਨਵੰਬਰ ਵਿੱਚ ਸਿਰਫ ਦੋ ਫੀਸਦੀ ਰਹਿ ਗਈ। ਲੋਕਲ ਸਰਕਲ ਦੇ ਮੋਢੀ ਸਚਿਨ ਟਾਪਰੀਆ ਨੇ ਕਿਹਾ, ‘ਇਹ ਮਹੱਤਵਪੂਰਨ ਹੈ ਕਿ ਕੇਂਦਰ ਸਰਕਾਰ, ਰਾਜ ਸਰਕਾਰਾਂ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਓਮੀਕਰੋਨ ਰੂਪ ਕਾਰਨ ਮਾਸਕ ਬਾਰੇ ਜਾਗਰੂਕਤਾ ਪੈਦਾ ਕਰਨ ਅਤੇ ਇਸ ਪਾਲਣਾ ਨੂੰ ਬਰਕਰਾਰ ਰੱਖਣ ਬਾਰੇ ਜ਼ਰੂਰ ਸਜ਼ਾ ਲਾਗੂ ਕਰਨ ਲਈ ਸਾਰੇ ਕਦਮ ਚੁੱਕਣ।''