ਮੁੰਬਈ, 5 ਦਸੰਬਰ (ਪੋਸਟ ਬਿਊਰੋ)- ਮੁੰਬਈ ਅਤੇ ਨਾਲ ਲੱਗਦੇ ਉਪ ਨਗਰ ਗੋਰੇਗਾਓਂ ਵਿੱਚ ਦਰਜ ਜਬਰੀ ਵਸੂਲੀ ਦੇ ਇੱਕ ਕੇਸ ਵਿੱਚ ਸ਼ਹਿਰ ਦੇ ਸਾਬਕਾ ਪੁਲਸ ਕਮਿਸ਼ਨਰ ਪਰਮਬੀਰ ਸਿੰਘ ਅਤੇ ਤਿੰਨ ਹੋਰਨਾਂ ਖਿਲਾਫ ਮੁੰਬਈ ਪੁਲਸ ਦੇ ਅਪਰਾਧ ਸੈਲ ਨੇ ਕੱਲ੍ਹ ਇੱਕ ਦੋਸ਼ ਪੱਤਰ ਦਾਖਲ ਕੀਤਾ ਹੈ। ਪਰਮਬੀਰ ਸਿੰਘ ਦੇ ਖਿਲਾਫ ਇਹ ਪਹਿਲਾ ਦੋਸ਼ ਪੱਤਰ ਹੈ, ਜਦ ਕਿ ਉਨ੍ਹਾਂ ਖਿਲਾਫ ਜਬਰੀ ਵਸੂਲੀ ਦੇ ਵੱਖ-ਵੱਖ ਕੇਸ ਦਰਜ ਹਨ।
ਜਬਰੀ ਵਸੂਲੀ ਦੇ ਇਨ੍ਹਾਂ ਦੋਸ਼ਾਂ ਦੇ ਸਬੰਧ ਵਿੱਚ ਮਹਾਰਾਸ਼ਟਰ ਸਰਕਾਰ ਨੇ ਦੋ ਦਿਨ ਪਹਿਲਾਂ ਪਰਮਬੀਰ ਸਿੰਘ ਨੂੰ ਸਸਪੈਂਡ ਕਰ ਦਿੱਤਾ ਸੀ। ਪਰਮਬੀਰ ਸਿੰਘ ਤੋਂ ਇਲਾਵਾ ਬਰਖਾਸਤ ਕੀਤੇ ਪੁਲਸ ਅਧਿਕਾਰੀ ਸਚਿਨ ਵਜ਼ੇ, ਸੁਮਿਤ ਸਿੰਘ ਅਤੇ ਅਲਪੇਸ਼ ਪਟੇਲ ਦੇ ਨਾਂਅ ਵੀ ਦੋਸ਼ ਪੱਤਰ ਵਿੱਚ ਹਨ। ਇਹ ਦੋਸ਼ ਪੱਤਰ ਚੀਫ ਮੈਟਰੋਪਾਲੀਟਨ ਮੈਜਿਸਟਰੇਟ ਐਸ ਬੀ ਭਜੀਪਲੇ ਦੀ ਅਦਾਲਤ ਵਿੱਚ ਦਿੱਤਾ ਗਿਆ। ਥਿਮਲ ਅਗਰਵਾਲ ਨਾਂਅ ਦੇ ਵਿਅਕਤੀ ਨੇ ਸ਼ਿਕਾਇਤ ਕੀਤੀ ਸੀ ਕਿ ਉਹ ਭਾਈਵਾਲੀ ਵਿੱਚ ਦੋ ਹੋਰਨਾਂ ਨਾਲ ਰੈਸਟੋਰੈਂਟ ਚਲਾਉਂਦਾ ਹੈ, ਜਿਨ੍ਹਾਂ ਉੱਤੇ ਛਾਪੇ ਨਾ ਮਾਰਨ ਲਈ ਉਸ ਤੋਂ ਨੌਂ ਲੱਖ ਰੁਪਏ ਜਬਰੀ ਵਸੂਲੇ ਗਏ। ਇਸ ਤੋਂ ਇਲਾਵਾ ਉਸ ਉੱਤੇ 2.92 ਲੱਖ ਰੁਪਏ ਕੀਮਤ ਦੇ ਦੋ ਮੋਬਾਈਲ ਫੋਨ ਖਰੀਦ ਕੇ ਦੇਣ ਦਾ ਦਬਾਅ ਵੀ ਬਣਾਇਆ ਗਿਆ। ਪੁਲਸ ਨੇ ਪਹਿਲਾਂ ਕਿਹਾ ਸੀ ਕਿ ਇਹ ਅਪਰਾਧ ਜਨਵਰੀ 2020 ਅਤੇ ਮਾਰਚ 2021 ਵਿਚਾਲੇ ਹੋਇਆ ਸੀ। ਇਸ ਕੇਸ ਵਿੱਚ ਛੇ ਜਣਿਆਂ ਖਿਲਾਫ ਸਿ਼ਕਾਇਤ ਦਰਜ ਹੋਈ ਸੀ।