ਤਰਨ ਤਾਰਨ, 5 ਦਸੰਬਰ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੀਬਹੁਤ ਜਿ਼ਆਦਾ ਭੀੜ ਭਰੀ ਜੰਡਿਆਲਾ ਰੋਡ ਉੱਤੇ ਐਚ ਡੀ ਐਫ ਸੀ ਬੈਂਕ ਦੇ ਖਜ਼ਾਨਚੀ ਤੋਂ ਦਿਨ ਦਿਹਾੜੇ ਪੁਲਸ ਵਰਦੀ ਵਿੱਚ ਆਏ ਦੋ ਲੁਟੇਰਿਆਂ ਨੇ ਹਥਿਆਰਾਂ ਦੀ ਨੋਕ ਉੱਤੇ ਤੀਹ ਲੱਖ 85 ਹਜ਼ਾਰ ਰੁਪਏ ਲੁੱਟ ਲਏ ਤੇ ਮੱਸਿਆ ਦੀ ਭੀੜ ਮੋਟਰ ਸਾਈਕਲ ਉੱਤੇ ਫਰਾਰ ਹੋ ਗਏ।
ਵਾਰਦਾਤ ਦੀ ਸੂਚਨਾ ਮਿਲਦੇ ਸਾਰ ਐਸ ਐਸ ਪੀ ਹਰਵਿੰਦਰ ਸਿੰਘ ਵਿਰਕ ਮੌਕੇ ਉੱਤੇਪੁੱਜੇ ਤੇ ਜਾਇਜ਼ਾ ਲਿਆ। ਲੁਟੇਰਿਆਂ ਨੇ ਡੇਢ ਕੁ ਮਿੰਟ ਵਿੱਚ ਹੀ ਬੈਂਕ ਵਿੱਚ ਲੁੱਟ ਕਰ ਦਿੱਤੀ। ਇਸ ਬੈਂਕ ਵਿੱਚ ਸੁਰੱਖਿਆ ਗਾਰਡ ਸੀ, ਪਰ ਉਸ ਕੋਲ ਹਥਿਆਰ ਨਾ ਹੋਣ ਕਾਰਨ ਉਹ ਵੀ ਬੇਵੱਸ ਹੋ ਗਿਆ। ਘਟਨਾ ਤੋਂ ਬਾਅਦ ਭਾਵੇਂ ਪੁਲਸ ਨੇ ਇਲਾਕੇ ਵਿੱਚ ਚਾਰੇ ਪਾਸੇ ਨਾਕਾਬੰਦੀ ਕਰ ਦਿੱਤੀ, ਪਰ ਲੁਟੇਰੇ ਖਿਸਕਣ ਵਿੱਚ ਕਾਮਯਾਬ ਹੋ ਗਏ। ਐਸ ਐਸ ਪੀ ਵਿਰਕ ਨੇ ਦੱਸਿਆ ਕਿ ਦੁਪਹਿਰੇ ਤਿੰਨ ਵਜੇ ਦੇ ਕਰੀਬ ਦੋ ਵਿਅਕਤੀ ਐਚ ਡੀ ਐਫ ਸੀ ਬੈਂਕ ਜੰਡਿਆਲਾ ਰੋਡ ਵਿੱਚ ਆਏ, ਜਿਨ੍ਹਾਂ ਵਿੱਚੋਂ ਇੱਕ ਨੇ ਪੁਲਸ ਦੀ ਵਰਦੀ ਪਹਿਨੀ ਹੋਈ ਤੇ ਦੂਸਰੇ ਨੇ ਪੁਲਸ ਵਰਦੀ ਦੀ ਪੱਗ ਬੰਨ੍ਹੀ ਸੀ। ਵਰਦੀਧਾਰੀ ਲੁਟੇਰਾ ਸਿੱਧਾ ਬੈਂਕ ਦੀ ਖਜ਼ਾਨਚੀ ਪਵਨਦੀਪ ਕੌਰ ਦੇ ਕੈਬਿਨ ਵਿੱਚ ਗਿਆ ਅਤੇ ਪਿਸਤੌਲ ਦੀ ਨੋਕ ਉੱਤੇ ਤੀਹ ਲੱਖ 85 ਹਜ਼ਾਰ ਰੁਪਏ ਦੇ ਕਰੀਬ ਨਕਦੀ ਲੁੱਟ ਲਈ, ਜਦ ਕਿ ਦੂਸਰਾ ਬੰਦਾ ਸੁਰੱਖਿਆ ਗਾਰਡ ਦੇ ਕੋਲ ਖੜ੍ਹਾ ਰਿਹਾ। ਡੇਢ ਮਿੰਟ ਵਿੱਚ ਵਰਦੀਧਾਰੀ ਲੁਟੇਰਾ ਆਇਆ ਤੇ ਦੋਵੇਂ ਜਾਣੇ ਮੋਟਰ ਸਾਈਕਲ ਉੱਤੇ ਬੱਸ ਅੱਡੇ ਵੱਲ ਫਰਾਰ ਹੋ ਗਏ।ਇਸ ਮੌਕੇ ਫੋਰੈਂਸਿਕ ਮਾਹਿਰਾਂ ਤੇ ਡਾਗ ਸਕੁਐਡ ਵੀ ਬੁਲਾਏ ਗਏ ਅਤੇ ਸੀ ਸੀ ਟੀ ਵੀ ਕੈਮਰਿਆਂ ਦੀ ਫੁਟੇਜ ਨੂੰ ਫੋਲਿਆ ਜਾ ਰਿਹਾ ਹੈ।